Moisés takäpfwaye Israel lhayis
1Tä tatäy lhimphaj chik y'il Dios lakawo Moisés, lham takäpfwaye Israel lhayis 2wet yok:
“Lhawuk tälhehte Sinaí, inuphä,
hätet iwoye ifwala tä tälhche Seír,
wet ihutunpe n'amel tä tälhe chenaj Parán.
Nekche len'äyij tä tälhe Meriba-kadés,
wet ichäjilhi takwey tä lefwomkat häp itäj
tä häpe lhämtes tä ihän n'amehen.
3Lhawuk ihumin laka wichi,
wet t'uye lhamel tä lhayen t'amajchetayej.
Lhamel takhoschufwi wet iwoyepej lhämtes
4tä olham Moisés ow'enhomche,
yämthilek lewuk t'at
lhamel tä letes Jacob.
5Lhawuk lhayen Niyatayej Israel lhayis
häp ifwalahte lhaihutwek lhamel
tä tälhehen doce letetsel,
lhäy'e laka niyatey.”
6Wet Moisés lhämet tä iwoyeje Rubén lhayis yok:
“Is chik iläy Rubén.
Isit'ak niwuja'pe laka hin'ol.”
7Wet tä äp yäme Judá lhayis, yok:
“Iwuk, ch'ahuye Judá lechos,
häne laka wichi yämthilek lhaip'ajtej.
Isiyeja akhajyhayaj,
ch'ote wet tayhlä letayhfwas.”
8Wet tä äp yäme Leví lhayis, yok:
“Iwuk, w'enho Leví lhayis
aka Tumim lhäy'e aka Urim
tä häpe akalelhthayajchal.
W'enho lhamel tä t'ifwti amej,
häp hin'ol tä lhelhtshayen tä ihi Masah
wet letäkleyejlhi tä iwhäye
inätw'etes tä ihi Meriba.
9Lhamel itetshanhit'a m'ak tä lajcha lhäy'e lako iwoye.
Itetshanhit'a m'ak tä lepuhfwas iwoye
lhäy'e m'ak tä leles iwoye.
Tsi Leví lhayis t'amajej ämet,
wet lhaimälhtejwek tä iwoye ämet tä lewoyeje lhamel.
10Lhamel ichufwenej aka wichi Israel
häp ämtes yämthilek isej.
Wet itihi tä letatache häp incienso,
wet iti'pe aka altar häp itshätäy
tä õ'wunhomche tä õyen awayhata.
11Iwuk, käpfwayeje m'ak tä is
lechumtes tä lhamel iwoye,
häpkhilek isen.
Wo lhipeya letayhfwas,
häpkhilek nemhit nechephä
wichi tä n'äyiho lhamel.”
12Wet tä Moisés äp yäme Benjamín lhayis, yok:
“Wichi tä Lhawuk lehumnhay
letamsekis ihiche t'at.
Lajit lepesa tä Lhawuk t'uye t'at lhamel,
wet iti'pe lefwapol tä tilhäj.”
13Wet tä äp yäme José lhayis, yok:
“Is chik Lhawuk takäpfwayeje
m'ak tä is lhamel laka honhat.
Is chik ayas tä is tä tälh puleye nitsäype,
lhäy'e inät tä tälh honhatch'oye,
14wet nekchämpej wuj lakäs lhay tä iche tä ilanhi
tä lhaichihelit iwel'apej,
15Is chik Lhawuk takäpfwayeje
m'ak tä wuj tä is
tä tälho chenhas tä pajchehen,
lhäy'e m'ayhay tä lhäy'e lhip tä laha ihi
tä iche'pe chenhas tä nittäya,
16lhäy'e yachuyaj lhay tä tapoyejej honhat.
Is chik Hin'ohte ihi amlhäj lhawayuk
itiyejpej lhamel häp lech'otyaj.
Nilhokej tähestso is chik iyej José lhayis,
häp lham tä Lhawuk tatshupiye p'ante
tä iyej lepuhfwas.
17José lhayis lewujyaj ihi,
hätet iwoye w'asetaj lhäs tä lechunkatsek.
Wet lech'ul hätet iwoye weyis ch'ul
wet inhäpäjiyejena nilhokej wichi,
pajla'tha nichätehen honhat lepesey.
José lhayis häpe t'at wichi tä wujpey
tä tälhe letes Efraín,
lhäy'e wichi tä wujpey
tä tälhe letes Manasés.”
18Wet tä Moisés äp yäme Zabulón lhayis lhäy'e Isacar lhayis, yok:
“Wo akäjyaja, Zabulón, tä lhekhen.
Wet amel, Isacar lhayis, wo akäjyaja
tä lhechechufwi awukwey tä tsänt'ähes.
19Let'änhiyela wichi tä i'pe honhat
yämthilek lhamel ihoye aka chenaj,
wet lelänhihena itshätäy
tä lhen han'okhayajayej Lhawuk.
Wet lewohla kotsayej m'ayhay tä wuj tä ihi lewomekitas,
lhäy'e m'ayhay tä laha ihi tä nin'äla tä ihi holo.”
20Wet tä Moisés äp yäme Gad lhayis, yok:
“Dios lakäpfwayaj tä is
iyej elh tä y'ayhattshi Gad kahonhat.
Gad lhayis hätet iwoye t'owalhas tä t'upechehen,
ilanche n'otkweyey lhäy'e n'olhethey.
21Wuj tä isilataj honhat tä lhayen lewuka.
T'uhawetej chik niyatey t'at chik lew'et.
Gad lhayis ichunlä wichi,
iwoye t'at Lhawuk lhämet tä ne'tek iwoye,
wet wuj tä is m'ak tä iwoye
tä iyej Israel lhayis.”
22Wet tä Moisés äp yäme Dan lhayis, yok:
“Dan lhayis hätet iwoye t'owalhaj les
tä tiyäjchephä tä tälhe Basán.”
23Wet tä äp yäme Neftalí lhayis, yok:
“Lhawuk matche tä akäjejlhi häp Neftalí lhayis,
wet yäm wuj lakäpfwayajay tä itiyej.
Lewomek lewuhuy t'at
pajtha nichäte lhip tä tapinhiye.”
24Wet tä äp yäme Aser lhayis, yok:
“Dios lakäpfwayaj tä itiyej Aser lhayis,
is chik inu'pe tä itiyej wichi
tä tälhehen Jacob leles iyhäj.
Is chik lepuhfwas iwujyen.
Is chik wuj tä hiw'en m'ayek
tä tälhe olivos tä wuj tä hiw'en.
25Is chik õhp'oyeji lepelis
häp chinaj lhäy'e bronce,
wet is chik wichi lakhajyhayaj ihi t'at
ifwalas tä iläy.
26“Israel lhayis,
nehit katsik w'awulhi aka Dios tä lewujyaj ihi.
Yen lew'uteya pule lhayis
wet nek tä tach'ot amehen.
27Dios tä n'ilataj häpe t'at aletnhawet,
wet itipej achafwihen takweyey tä takhajayhen.
Yokwes atayhfwas yämthilek lekalhi,
wet ne'tek letäyhat.
28Israel lhayis letamsekis ihihila,
pajla'tha nichäte leles tä lepes lheley.
Yachuyaj lhay tapohiyeja laka honhat,
wet pelhay tatäyhit'ala.
29Dios lakäpfwayaj tä is i'amej, Israel.
Ihichet'a elh chik w'awulh amhi.
Lhawuk lham t'at tä aifwayhat,
häpe afwamthi wet afwajnhat tä ikalhi atayhfwas.
Lhamel lhayachajila ame,
wet let'äsichela'pe.”
