Deut 7

₁Moisés tahuyej wichi wet yok:

Lhawuk Dios itiyäjaynhila amhohen honhat yämthilek alhenay lewuhuya. Wet itihiyeja kanhi wichi tä wujpey wet äp takhajayhen, häp Het lhayis, Gerges lhayis, Amorreo lhayis, Canaán lhayis, Ferez lhayis, Hiv lhayis, lhäy'e Jebús lhayis. ₂Wet chik Lhawuk Dios tach'otla amehen yämthilek lekalhi nilhokej wichi tä lheyis tähestso, is chik amel letäyhthen nilhokej. Yej woyejela ämet chik häpe chik let'untejche lhamel, wet yej p'altsena. ₃Wet yej alep'ajteja atsinhay, wok ales tä hin'ol lhäy'e ales tsinhay chik yen ch'efwasa lhamel laka mamses lhäy'e leles tsinhay. ₄Tsi lhamel iwetahatla ales, wet lhamel ilehiyeja Lhawuk wet yenla lewuhuya dios lhayis tä w'enha lhamej. Wet chik mälhhiyejatso, Lhawuk itihla amejen lewäk wet yofwajkwet anofwej.

₅M'ak tä is chik lewoyaye, wasthichela laka altares, wet wola lhipeya tuntey tä lhamel yen t'amajchetesa. Isthena hal'äy tä Asera lepeykas tä lhamel yen laka dios tsinhaya, wet wunhomchela lecheyälis. ₆Tsi amel ahäpehen Lhawuk Dios laka wichi t'at. Lham tatshupi amehen tä lhewej wichi tä i'pe honhat, yämthilek ahäpehen laka wichi tä t'amajchet.

₇Lhawuk tatshupi amehen. Häpkhit'a chik ahäpehen wichi tä inu'pe nilhokej wichi tä i'pe honhat wet tamenej tä t'akänyaj iti amejen. Mat ahäpehen t'at wichi tä lhimphaj tä lhewej wichi tä i'pe honhat. ₈M'ak tä tamenej tä Lhawuk tatshupi amehen, häp tä aihumnhen wet t'uhläk imatitche lhämet p'ante hit'untejche atetsel. Wet häp tä itonphä amel tä lhehi Egipto tä ayen kwenkaya, häp tä isej lakhajyhayaj tä wuj, wet ikalhi Egipto kaniyat.

₉Tä mälhyejtso, is chik lehanayej tä Lhawuk Dios häpe Dios tä matche wet lehumnhayaj nittäya. Wet imatitche lhämet tä iwoyeje lhatetsel pajtha nichäte leles tä lepes lheley, häp lhamel tä ihumin wet iwoye lhämtes. ₁₀Wet itäyhat wichi tä n'äyiho, iwo lahayayej lech'isukyajay tä lhamel iwoye wet tek ipantej letasnhayaj tä itiyej lhamel. ₁₁Tä mälhyejtso, woyaye wet enay achumyaja nilhokej lhämtes tä ofwel amhohen ifwalana.

_12-13Wet chik amel leläte häp lhämtestso, wet lewoyaye wet lhen achumyaja, häpkhilek Lhawuk Dios imatthichela lhämet tä hit'untejche p'ante atetsel. Itihla amejen lehumnhayaj tä nittäya, wet takäpfwayhiyeja amehen m'ak tä ischehen, wet yämla wujpey amel. Wet takäpfwayhiyejela m'ak tä ischehen häp ales, lhäy'e akäs, lhäy'e aka hat'es, lhäy'e aka aceite, lhäy'e aläy w'asetas, tson'atas, chik lheyayhi honhat p'ante hit'untejche lhämet häp atetsel tä yop'antekwe, “Ow'enhihola ales häp honhattso.”

₁₄Matche, Dios takäpfwayhiyeja amehen m'ayhay tä ischehen, inuhla'pe wichi tä i'pe honhat. Ihichet'ala atsinha wok hin'o chik leles newache chik i'amejen. Häte ihichet'ala itshätäy chik newache leles. ₁₅Lhawuk itonthiyela ahilähen t'inhayajay chik häpe. Wet tek ichätyenla atapehen n'owit'äyhyajay tä wuj tä ni'isachehen tä ichätyenpe Egipto, mälhyej tä lehanayej, mat ichätyenla'pe nilhokej atayhfwas. ₁₆Wet is chik lehämet nilhokej wichi chik Lhawuk Dios ne'tek lelänhen, yej p'altsena. Wet yej lhenayla awuhuya laka dios lhayis, tsi chik lewoye täjtso, häpkhila amel atäyhyaj.

₁₇Elat iche atichunhayaj wet lhok, Matche tä wujpey wichini, inu'pe olhamel. Oyenek tek y'akalhihila.

₁₈Oyok, ¡yej nowaye! Tichunche m'ak tä Lhawuk Dios iwoyeje Egipto kaniyat lhäy'e laka wichi. ₁₉Enay atichunhayaja m'ayhay tä äyteschehen tä ajchalis hiw'en, lhäy'e n'otetnhay tä iseltejen, lhäy'e lakhajyhayaj tä wuj tä Lhawuk Dios hin'ältej lhamel tä itonphä tä ihi Egipto. Mälhhiyejatso tä lham iwohiyejela wichi tä amel lenowaye. ₂₀Ichenhiyela lhamel lenowayhyaj tä wuj häp wichi tä imälhehi lhäy'e häp iyhäj tä fwetaj lhaiskathen, wet ilänhihena lhamel.

₂₁Tä mälhyejtso, yej nowaye wichi, tsi Lhawuk Dios ihla amejen. Lham häpe Dios tä lakhajyhayaj ihi wet wichi nowaye. ₂₂Mat yiwalh tä itihiyeja kanhi häp wichi. Amel lekalhihit'ak let'uhläk lehämtej thahya. Tsi chik wichi nemla i'pe honhat, ihichela wuj itshätäy tä fwitses wet ailänhihena. ₂₃Mat Lhawuk Dios itihihila akweyey häp wichitso, wet ichätyenla'pe lhamel lewit'äyhyajay pajla'tha nofwej. ₂₄Tach'otla amehen yämthilek letäyhthen laka niyatey, häpkhilek wichi nemhit yen tichunhayaja lhamel. Ihichet'ala wichi chik häpe chik ikalh amhi, mat lelänhihena nilhokej. ₂₅Wunhomchela lecheyälis tä yen laka dios lhayisa, mat yej tachumala oro wok plata tä õy'ilenche'pe. Chik lewoye täjtso, häpkhila amel atäyhyaj wet häpe m'ak tä Lhawuk y'ulhan. ₂₆Yej hänela haw'et m'ayhay tä mälhyejentso tä Lhawuk y'ulhan, häpkhilek katan'isayej lhamel. Lhawuk takäpfwayeje lewit'äyhyaj häp m'ayhaytso wet ne'tek õ'täyhat. Wet häte amel is chik lhenay häpeya m'ak tä lajit lahaya.