1K'atas p'itseyhay iwit'äyen
kacha tä lenij akäjche
wet äp inajutshayen.
Tet iwoye n'owelkatyaj,
tej che lhimphaj thayej,
itäyhat t'at n'ohanyhayaj lhäy'e n'owujyaj.
2Hin'o tä lehusek ihi
t'ukwe m'ak tä is alhoho yämthilek iwoye.
Mat elh tä laj lehuseka
t'ukwe m'ak tä ni'isa.
3Hin'o tä ch'isuk,
n'äl t'at tä laj lehuseka.
Tej che iwo lew'ekyaja,
mat wichi nitäfwelej t'at
tä häpe elh tä nhana m'akej.
4Che aka niyat tawäkwäy ame,
yej lhekch'oye achumet.
Tsi n'oteläythayaj ilehtej
elh lewäk tä iti amej.
5Iche m'ak tä ni'isa tä ow'ene tä ihonhatena, tä tälhe niyatey. 6Häp hin'o tä ch'isuk õyäm wuj len'ohyaj, mat iyhäj tä hiw'en m'ak õ'tihiche lhipey tä ni'isayehen. 7Ow'en n'okawos tä iche'pe yel'atas, mat iyhäj tä wus lajit lew'uteya, t'äschet honhat tet iwoyek n'okawos.
8Elh tä yenlhi chowej,
wet äp nichäthiyela lejäkw.
Wet elh tä ifwoynho n'olafwek,
wet äp amlhätaj yokwajila.
9Elh at che iwasthiche tuntey, telätshayhila.
Wet elh tä iwo lhipeya lelhetes,
ihichela lhip tä hiy'es.
10Häp hosan tä n'uya,
che kafwusa iwatläk matche tä alekhajyen.
Mat che pajche wak'alh achumetcha,
häp tä aisej.
11Che amlhätaj yokwaj lewo tä kamaj nifwihata,
niwohit m'ak che isej lechumet.
12Hin'o tä lehusek ihi,
lhämtes tä iwoye iwethit'ala.
Mat elh tä laj lehuseka,
lhämtes häpe t'at letäyhyaj.
13Lhämtes tä ichunkat häpe t'at lemukwehyaj,
wet che paj nemhit koyhyaj lhämtes, hich'atchehen.
14Lhämtes lhiphiyet'a,
tej tä õknhanayej m'aklat che iche.
Wet ihichet'a elh che ihanthiyeja
m'ak tä ihichela.
15Häp amukwe chumyaj matche tä ipäyit,
Y'aje tä nikalelhäjiyat honhat che tiyäje.
16Awit'äy i'amej, wet äp honhat tä lhehi,
tä aka niyat kamaj mamse
wet äp lech'otfwas yäp'elhejen lakäjyaj
tä iyäyen iyhäj.
17N'okäpfwayaj tä is i'amej,
wet äp honhat tä lhehi,
che aka niyat häpe hin'ol tä lhamelya lhäs,
wet äp lech'otfwas iwot lewhäya tä t'ekhen
häpkhilek isej wet lhaknena w'oknhasa.
18Hin'o tä n'etäjlhi,
äp inät tälho lewukwe.
Tä niwohit m'ak che iwoye,
äp waschä lewukwe lhetekch'o.
19N'olhäk lhäy'e hat'es,
häp tä ikänitlhi hin'o.
Wet chinaj t'äj ikalhyeneji m'ak at che häpe.
20Yej tiyej ämet tä ni'isache häp niyat,
wet yej tatayejlä atichunhayaj.
Yej lhäme tä ni'isa häp hin'o tä hiw'en m'ak,
tej che asamsayaj tä lhechufwi awukwe.
Tsi afwenchey tä yämhiyela ämtes.
