1Achowej nuhlä Elh tä alhenek tä kamaj amamse,
tä kamaj ninäma ifwalas lhäy'e nekchämis
tä ihichela m'ak tä ni'isa
che tamenej tä lhok, “Ohumnhichet'a.”
2Achowej nuhlä aka Dios tä kamaj nichalajahchä
wet n'omahen ifwala, iwel'a wet katetsel,
lhäy'e pules tä yachajo tä näm
tä tafwaytshi pelhay.
3Che nichäte ifwalastso,
hin'ol tä t'uye n'ow'et
nemla takhajayhen takweyey,
wet äp khajnhas tachofwenhichelahchä,
wet äp atsinhay tä tachofwanhen ilehiyeja lechumet
tsi nemhit wujpe lhamel,
wet äp iyhäj tä iyahinche alhoye
nemla tatelhoy isiche.
4Che nichäte ifwalastso,
lepe tä n'äl alhoye nemla tafwoche,
wet äp nemla äytaji fwelhey lepakas,
wet äp afwenchey yohlak tam,
wet äp wichi nemla t'ichoywethä.
5Che nichäte ifwalastso,
che letaw'ulh wet lenowayhlahchä,
wet che lenukwe n'äyij, tehlat iwoye.
Etek ipelajila,
tehlat iwoye hal'äy lhawol tä ipelas,
wet atehlat iwoye chol tä lhaitonche honhat,
nemhit alefwtsin.
Äp nemla lechuyajch'oye m'ak che häpe,
tsi häp hin'o ihoye t'at lhip tä yenlat lew'eta,
wet wichi tafwchehchä tä ilunche
hup kawayhil tä y'äyenche.
6Achowej nuhlä Elh tä alhenek
tä kamaj chinhas tä niyhäy nichäya,
wet äp niwasaho lehi tä oro,
wet äp nipofwoya iyäte tä iwhäye n'opek,
wet äp niy'esa niyäkw tä letonejphä äkwe.
7Che nichäte ifwalastso,
asan yäpnhihola honhat mok p'ante tälho,
wet achowej yäpnhiyela Dios
tä hiw'en p'ante amho.
8¡M'ak tä m'ak nitälhaye!,
iwoyetso N'olhämetwo.
Yok, ¡Nilhokej t'at tä häpe
m'ak tä m'ak nitälhaye!
N'olhämetwo ikalelhät m'ak tä is che hin'o iwoye
9Tä N'olhämetwo lhäy'e lhip tä ihan honhatej, wet häp tä ichufwenejen wichi m'ak tä ihanej. Itetshan ahantses lhämtes, wuj tä yen lehuseka, wet t'amajchä tä ilesayen. 10N'olhämetwo nilhak'alch'oye lhämtes tä akäschehen, wet äp hi'isyen alhoho tä ilesayen tsi matche.
11Ahantsaj lhämtes tet iwoye hal'ä tä õ'tshänejlhi tson'ataj yämthilek yikch'oye lhip tä ihi. Wet tä õ'hutwek lhämtestso, tet iwoye chinhas tä õ'ikäjejo hal'ä, matche tä t'unhiche, wet tälhe t'at Dios tä häpe Tson'ataswo tä Lhamya.
12Yäs, iche m'ak elh tä ofwel amho yämthilek katekm'ahatalhi. Lajit whäya tä õknileyayej tä õyenlhi n'olesaynekhis, wet tä äp hin'o lhaichufwenej, pajtha y'elej t'at.
13Tajlhame olhämet. M'ak tä ofwel amho, oyok, Wujyen Dios wet woye lhämtes. Häp täjtso hin'o lechumyaj tä is. 14Tsi Dios yenla lakalelhthayajayej nilhokej m'ak tä hin'o iwoye, che is wok ni'isa, tej che häpe m'ak tä weskatej.
