Ecles 2

₁Otahuyhte lhamej wet oyok, Lhek owo okäjyaja, elat iche m'ak tä oisej. Mat ow'en tä täjtso häpe t'at m'ak tä m'ak nitälhaye. ₂Ow'en tä n'ot'ischeyhyaj häpe t'at n'olhektshanyaj. Wet n'okäjyaj, ¿atsi m'ak tä tälhejlä?

₃Wet otichunhayaj ihi, oyok, “Lhek okäntejlhi hat'es häp ot'isan häpkhilek ohusek ihan m'akej.” Wet olhayachaje omukwehyajtso tsi otichunhayaj yok, “Elat häp tä iwatläk wichi iwoye häp ifwalas tä nintäkwa tä ihonhatena.”

₄Wet oyäm wuj ochumtes, oyenlhi owukwey lhäy'e okäsw'etes. ₅Oyenlhi olafwey, hal'äy tä õ'tihchä lew'etes, lhäy'e hal'äy tä lhay n'olhäk. ₆Oyenlhi inätw'etes häpkhilek inät nitsäychufwi hal'äy tä otihchä. ₇Ochäjen okawos tä hin'ol lhäy'e tä atsinhay, wet ow'en okawos tä nichäthihchä ow'et. Wet äpte ow'en itshätäy tä wujpey, w'asetas wet äp tson'atas, tafwaype hin'ol tä ichunej Jerusalén. ₈Äpte oskon lhamej oro lhäy'e plata, häp m'ak tä wuj tä laha ihi tä iyejte niyatey iyhäj tä ihiche laka honhatil. Okanchä n'ochoyhyajwos tä hin'ol lhäy'e tä atsinhay, wet äp wujpe atsinhay tä oiyejwethä wet wuj tä okäjyaj ihi.

₉Owujyaj tafwaype tähes p'ante ichunej Jerusalén. Äp ot'amajej otäfwnhayaj. ₁₀M'ak che oyahin wet okäne olhaifwonhit'ahlä, wet otihi t'at ohusek n'okäjyaj che häpe. Okäjejlhi nilhokej ochumtes, wet häp täjtso m'ak tä okatej tä tälho ochumtes.

₁₁Tä paj otetshan t'at ochumtes tä otkwey lhenhay lhäy'e nilhokej m'ak tä owoye, wet oyen tichunhayaja tä chuttshan ochumet. Wet ow'en tä häpe m'ak tä m'ak nitälhaye, tet iwoyek ofwetaj otsoklhi yafwthi. Wet niwohit m'ak che õ'teskanej tä ihonhatena.

₁₂Tä paj oyen tichunhayaja m'ak tä häpe n'otäfwnhayaj, lhäy'e n'omukwehyaj, lhäy'e n'olhektshanyaj. ¿Tsi atsihila m'ak tä yenlhi hin'o tä icheyäjo oniyatyaj? Ihichet'a, ts'ilak t'at m'ak tä wak'alhen. ₁₃Eh wet ow'en tä n'otäfwnhayaj tafwaype n'omukwehyaj, tet iwoye isi tä tafwaype honataj. ₁₄Häp ahantsaj isej tatelhoy tä ichumyenlhi, mat amukwe inukwe honataj. Tha ohanej tä m'ak at che iyej tehlat iwoye, w'awulhilahchä. ₁₅Wet oyok, m'ak tä iyej amukwe äpte ihlat n'oyej. Tä mälhyejtso, ¿atsi m'ak tä oisej tä ohantsaj? Wet äp oyok, äpte häpe m'ak tä m'ak nitälhaye. ₁₆Tsi tej tä ahantsaj wok amukwe, nehichela che õntichunejpejlä. Häp tä ifwalas tä tatay alhoho õhp'ethethilahlä, wet y'inhila ahantsaj, hap'akhiyeja amukwe.

₁₇Oy'ulhan n'ow'atshancheyaj, tsi chuttshan n'ochumyaj tä ihonhatena. Häpe t'at m'ak tä m'ak nitälhaye, tet iwoyek õ'fwetaj õ'tsoklhi yafwthi. ₁₈Wet häp tä oy'ulhan nilhokej ochumtes tä owoye tä oihonhatena, tha häpkhila t'at m'ak tä on'äyej elh tä icheyäjo ow'et. ₁₉¿Wet atsi tä ihanej che ahantsaj wok amukwehila che lhayen lewuka m'ak tä tälhe ochumtes lhäy'e ohanyhayaj tä oihonhatena? Täjtso äpte häpe m'ak tä m'ak nitälhaye.

₂₀Wet häp tä oyen tichunhayaja opäytshayaj tä häpe t'at ochumtes tä oihonhatena, wet ochowej ilehat at lhamej wet äytaj otichunhayaj. ₂₁Che hin'o wuj lehusek tä itiyej häp lechumet tä iwoye, lhäy'e lehanyhayaj, lhäy'e letäfwnhayaj, mat tä lepese elh tä isej häpe t'at elh tä nhanayej che tachumlhi'pe. Äpte täjtso häpe m'ak tä m'ak nitälhaye wet äp m'ak tä lhamya tä ni'isa.

₂₂Hin'o w'et lhaipäytej lechumtes tä ihonhatena wet wuj tä yen tichunhayaja. Mat tä lepese ¿atsi m'ak tä isej? ₂₃Nilhokej ifwalas wuj tä leteläythayaj ihi wet lechumtes iwohit'a letamseka. Äpte tä honatsipej tha letichunhayaj lajit t'elakw'eta. Täjtso äpte häpe m'ak tä m'ak nitälhaye.

₂₄¿Atsi m'ak tä is che hin'o iwoye? Is che t'ek wet iyä wet akäjejlhi m'ak tä tälhe lechumet. Äpte ow'en tä täjtso häpe t'at m'ak tä tälhe Dios. ₂₅Tsi che kahäpeya lham, laj lakäjyaja hin'o wet ihichet'a m'ak che tufw. ₂₆Mat häp hin'o tä Dios akäjejlhi, Dios hiw'enho letäfwnhayaj, lehanyhayaj wet lakäjyaj. Wet hin'o tä iwoye lech'isukyaj, Dios hiw'enho yämthilek iskon lhamej m'ayhay wet ihutwek lakäywet, häpkhilek hiw'enho elh tä Dios akäjejlhi. Äpte täjtso häpe m'ak tä m'ak nitälhaye, tet iwoyek õ'fwetaj õ'tsoklhi yafwthi.