Pablo ichene len'okhayaj häp Dios leles
1Amtena ipuhfwas, olham Pablo ohäpe Cristo Jesús laka apóstol, wok oyok, lakachenhay tä lhamenya elh, tsi häpe t'at täjtso Dios lenech'ethayaj. Wet ochen amehen olhämetna amel tä ahäpehen Dios leles tä lheyayhi Éfeso, häp amel tä a'afwtintses tä lehänlhi Cristo Jesús. 2Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.
Dios lakäpfwayajay tä isen tä tälh puleye
3N'awunit Lhawuk Jesucristo laka Dios wet äp Lajcha,
tsi tä y'ap'akej Cristo,
Dios takäpfwayeje lhahusey
nilhokej lakäpfwayajay tä isen tä tälh puleye.
4Tälhe täjp'ante kamaj honhat newache,
n'aitshupyen lhame, häp tä n'aisej Cristo tä y'ap'akej,
yämthilek n'ahäpehen t'amajchetes
wet tek n'akok'ayehen tä y'ehi tä lham itayche.
Tsi Dios n'aihumnhen,
5wet pajche p'ante itshupyenej n'amehen
yämthilek nech'e n'ahäpehen leles,
häp tä n'aisej Jesucristo.
Häp täjtso Dios lenech'ethayaj
tä t'up'antehläk iwoye.
6Häp tä tamenej tä y'awunit t'at Dios
tä takäpfwayej n'amehen
lep'altsenyaj tä isilataj,
häp tä n'aisej Lhäs tä lehumnek.
7Tsi tä Cristo yen lhahaya
lew'oyis tä nitsäyhchä,
itäyhat n'amejen lhasukyajay.
¡Matche tä wuj Dios lep'altsenyaj
8tä lhäy'e lhip tä itsäy lhatapehen,
tä hiw'en n'amhohen nilhokej
n'ohanyaj lhäy'e n'otäfwnhayaj!
9-10Wet itäfwnhat n'amejen
lenech'ethayaj tä nin'älita,
wok oyok, häp m'ak tä pajche lham
eyte iwohiye, tä häpe täja:
Chik nichäte lewhäy,
häpkhilek yen lhetekayej Cristo
nilhokej m'ayhay tä ipuleye
lhäy'e tä ihonhatena.
11Dios pajche tatshupiye olhamel
wet yen laka wichiya,
häp tä oisej tä op'akej Cristo.
Pajche p'ante tä yen tichunhayaja
yämthilek iwoye täja,
wet häp tä yenlhi t'at,
tsi lham häpe elh tä yenlhi nilhokej m'ayhay
tä yiwetej lham lenech'ethayaj.
12M'ak tä tamenej tä tatshupi p'ante n'oyehen,
häpe tä t'uhläk olhamel tä otchunej
tä oniwhayaj iyeji Cristo,
ohäpehen wichi tä iwunit
lham Dios tä lewujyaj ihi.
13Häte amel, tä lelätayehte
Dios lhämet tä matche,
häp Lesilätyaj tä iwo siläta amejen afwayhyaj,
lechayaye Cristo wet lep'akayej t'at häp lham.
Wet Dios iti amhiche Espíritu
tä T'amajchet tä pajche ifwel,
tä yen tetneka amejen
tä kalelhäj tä Awukay t'at häp lham.
14Espíritu tä T'amajchettso
häp tä Dios ichunkat n'amehen.
Tä mälhyejtso, matche t'at
tä imälhehilawek chik ihla n'amejen
m'ak tä n'alewuhuyla.
Tsi häp tä Dios yämla wak'alhej lechumet
tä ifwayhthen häp wichi tä Lewuk,
wet y'awunthila lham tä lewujyaj ihi.
Pablo y'alhyene Dios yämthilek hiw'enho lehanyaj wichi tä t'ekhaye
15Tä mälhyejtso, tälhe täjte ohanej tä amel let'ekhayaye Lhawuk Jesús wet letiyej ahumnhayaj nilhokej Dios laka wichi, 16olehiyejt'a tä owo graciasayej Dios. Tä owopej ot'alhyaja, otichunpej hach'oyehen, 17yämthilek Lhawuk Jesucristo laka Dios, häp Lhajcha tä lewujyaj ihi, hiw'enhomche ahusey lehanyaj lhäy'e atäfwnhayaj, häpkhilek matche tä letäfwelayej häp lham. 18Is chik itihiche isi ahusey, häpkhilek letäfwelayej m'ak tä häpe aniwhayaj tä lham t'änej amehen, lhäy'e lakäpfwayajay tä wuj tä isis tä ifwenhomche leles, 19lhäy'e lakhajyhayaj tä wuj tä iti n'amejen, häp n'amel tä y'at'ekhaye. Lakhajyhayajtso inu'pe nilhokej m'ayhay, wet häp tä Dios hin'älit tä matche tä takhajay 20tä inuhatphä Cristo tä tälho n'op'itseyhay, wet itayyenhiphä lhip tä lefwomkat tä ipuleye, 21wet hiw'enho yämthilek Lewuk nilhokej n'okhajyhayajay tä iche tä kaphä, lhäy'e n'owuhuy, lhäy'e n'oniyatyajay, lhäy'e n'owujyajay, lhäy'e m'ak at chik häpe tä len'ohyaj ihi, ts'ilakhit'a athana mat häte häp honhat chik nech'ayekhila. 22Wet nilhokej m'ayhay Dios itichufwi Cristo lepach'ol, wet yen lhetekayej nilhokej Dios leles, 23tä hätet iwoyek häpe Cristo t'isan. Wet tä nilhokej m'ayhay isej Cristo, wet wak'alh t'at. Tä mälhyejtso, tä Dios leles lhaip'ajtej Cristo, nech'e lham t'at tä wak'alh, tsi hätet iwoye n'ot'isan tä lhaip'ajtej n'olhetek.
