Ef 6

₁Nä'tshas, tä ahäpehen iyhäj tä hip'akej Lhawuk, oyok, Woyayepej m'ak tä ajchalis lhäy'e akolis ne'tepej che lewoyaye, häp tä is alhoho täja. ₂Tsi Dios lhämet tä ichun tä lakäpfwayaj tä is ihi, häp täja tä yok, “Humin ajcha lhäy'e ako, ₃häpkhilek ais alhoho wet pitaj ifwalas tä lhehi honhat.”

₄Häp amel tä hin'ol tä ales ihi, isit'ak letamenej lhamel che lewäk ihi. Mat chufwenejen Lhawuk len'äyij, ch'otepej wet isyen alhoho m'ak tä iwoye.

₅Häp amel tä ahäpehen n'okawos, woyayepej m'ak tä awuhuy tä ihonhatena ne'tepej che lewoyaye. En hin'oya wet tiyej anowayhyaj lhäy'e ahusey tä isen, mälhyej che letach'otaye Cristo. ₆Mat oyok, tajlhamhiyet'a tä lhamel aitetshan, wet häp tä tamenej tä letach'ahuye yämlek lekänitlhi. Mat tä ahäpehen Cristo lakawos, mälhtejwek ahusey tä lewoye Dios lenech'ethayaj. ₇A'amkatej achumet tä lhenlhi, mälhyej che Lhawuk t'at tä letachumhoplhi, häpkhit'a hin'ol. ₈Tsi lehanayej tä elh weihalhapej, tej che n'okawo wok kahäpeya, mat häp lechumet tä is tä iwoye, ikathiyeja laha tä tälhe Lhawuk.

₉Häp amel tä ahäpehen lewuhuy, häte woyeje t'at mälhyej tä oyämetso häp akawos, wet yej tseläjwethä. Yej p'ethatlä tä amel lhäy'e lhamel Awukay ipuleye, wet tek itetshanej m'ak tä häpe elh che häpe.

₁₀Wet athana a'enay khajnhasayej Lhawuk, häp tä isej lakhajyhayaj tä wuj. ₁₁W'uyhi imälhewek aka'tshayajchal tä Dios hiw'en amhohen, häpkhilek letumlä ahättaj t'akanyajay. ₁₂Tsi tek y'awo lhaka'tshayajayej wichi tä t'isan n'äl, mat y'attayhlä n'okhajyhayajay tä nin'äla tä iche tä kaphä, häp lhamel tä ni'isahen tä len'ohyaj ihi wet leniyatyaj häpe t'at tä honatsi i'pe wichi lehusey. ₁₃Häp tä tamenej tä oyok, Chumaye nilhokej aka'tshayajchal tä Dios hiw'en amhohen wet w'uyhi, häpkhilek che näm ifwala tä ni'isa, mat letumlä. Wet che lehämet aka'tshayajna, kamaj at'unhiche t'at.

₁₄Oyachajo tä oyok, At'unthiche, en akawaka m'ak tä matche wet en hat'okwep'ota m'ak tä is alhoho. ₁₅Äsi anisähes tä alewaklhathen yämlek lhen asilätyaja Dios lhämet tä häpe n'otamsek. ₁₆M'ak tä inu'pe, tumtejlä achayaj häp ahättaj ch'ähal tä lak'ehen, häpkhilek che taj, y'om t'at. ₁₇En akawon'aya afwayhyaj häpkhilek t'amajej etek, wet en afwajnhata Dios lhämet, tä Espíritu tä T'amajchet hiw'en amhohen.

₁₈Yej leyayej tä lewoyaypej alhyaja, ap'altsene Dios wet alhe fwalapej honatsipej, häp tä aisej Espíritu tä T'amajchet tä tach'ot amehen. Akhajyenay, yej alek'efwyenchä tä lewopej alhyaja'pe nilhokej Dios leles. ₁₉Häte alhyenaypej n'oye Dios, häpkhilek hiw'en n'oho olhämtes tä t'uhläk oyäme, wet otkhajay che oyen lhämeta wet ohanej owoyneje che otäfwnhatej wichi m'ak tä pajche nin'äla tä häpe Dios Silätyaj tä Is. ₂₀Dios ichenn'o yämlek oyenpej lhämeta Lesilätyajna, wet häp tä tamen n'oyej tä õhp'o n'ohi athana. Alhyenay n'oye Dios häpkhilek newache onowayhyaj che häpe tä oyen lhämeta Lesilätyajna, mälhyej tä t'uhawet n'oyej.

₂₁Häp lhapuhfwa Tíquico tä wuj tä y'ahumin wet nileyayej tä tach'ote Lhawuk lechumet, lham ifwenla amhohen nilhokej m'ak tä in'oyej lhäy'e m'ak tä owoye. ₂₂Häp tä tamenej tä ochen amehen, häpkhilek ifwel amhohen wet lehanej olhamel wet häte aikhajyenhen.

₂₃Is che Dios Lhajcha lhäy'e Lhawuk Jesucristo hiw'enhomche lhapuhfwas letamsek, lhäy'e lehumnhayaj, lhäy'e lechayaj, ₂₄wet hip'altsenhen nilhokej lhamel tä itiyej lehumnhayaj tä nittäya häp Lhawuk Jesucristo.