Õyen häpeya reina häp Ester
1Tä tajyäme ifwalas iyhäj, yachajo tä is t'at rey, noj tä lewäk ihi. Wet yen tichunhayaja m'ak tä reina Vasti iwoye, häte yen tichunhayaja lhämet tä ifwelpe wichi tä yen tesayej häp reina tä nihoyaye. 2Wet lech'otfwas tahuyej wet yok:
–Is chik lene'tek õt'ukwe atsinha lhutshay tä isis tä kamaj kan'och'efwasa, yämthilek i'amej. 3Wet is chik letshupyeneje hin'ol tä ihiche nilhokej honhates tä ihi aniyatyaj, yämthilek lhamel ichäj alhoho häp atsinhay wet itihi atsinhay lew'et tä ihi hupuyna Susa, häpkhilek Hegay t'uyehen. Tsi lham häpe hin'o tä let'ekhaye wet äp häpe hin'o tä lechumet t'at tä t'uye atsinhay. Wet is chik lham tä ichuttej yämthilek isilatyenhen. 4Wet lhutshahilak lehumin, is chik häpkhila reina tä icheyäjo Vasti leniyatyaj.
Tä rey iläte lech'otfwas letichunhayaj, ihuminche wet ne'tek õ'woye.
5Wet häp ifwalastso iche p'ante hin'o tä Judío tä lhey Mardoqueo, lham ihi t'at hupuytso Susa. Lham häpe hin'o tä tälhe letes Benjamín. Wet lajcha lhey p'ante Jaír, wet lechäti häpe p'ante Simey, wet Simey lajcha p'ante Cis. 6Cis häpe elh lhamel p'ante Nabucodonosor, Babilonia kaniyat, ichäj tä isoyej lew'et Jerusalén. Hap'akej p'ante Judá laka rey tä lhey Jeconías 7Wet iche Mardoqueo withok lhäse tä lhey Hadasa, wet äp lhey elh Ester, lham häpe lhutsha tä wuj tä isilataj. Wet chipenaj t'at, lajcha y'il, lhäy'e lako, wet Mardoqueo yen p'ante lhäseya tä lew'et nofwej.
8Wet tä niyat lhämet nichäte nilhokej wichi, wujpe lhutshay tä õ'häne Susa, wet niyat ne'tek Hegay t'uyehen. Wet Ester iyej t'at lhamel. 9Wet Hegay wuj tä ihumin häp Ester wet matche tä akäjejlhi. Wet yofwajkwet iwo tesa tä yenlhi yämthilek häpe lhutsha tä lhäy'e lhip lesilatyaj, wet hiw'enho lhäk tä wuj tä is. Wet yen lakawosa siete n'okawos tsinhay tä wuj tä lehusey ihi tä tälhe rey lewukwe, wet y'ayhte lhamel lhäy'e Ester häp lew'etes tä isis tä ihi atsinhay lew'et.
10Mat Ester ifwenhit'a tä lham häpe Judía, tsi Mardoqueo pajche ifwenho tä yok:
–Yej kalelhthola elh chik häpe häp wichi tä alhäse.
11Wet nilhokej ifwalas tä Mardoqueo ilunhilhi t'at lhip tä iwhäye atsinhay lewukwe ka'alho, tä t'uhläk hiw'en chik is t'at Ester wok m'ak chik õ'woyeje.
12Wet nilhokej atsinha lhutshay tä õhw'enho m'ayhay yämthilek y'ilen lhamchehen yäk isis, pajtha doce iwel'as. Chunkat seis iwel'as tä õy'ilenchehen aceite tä mirra, wet seis iwel'as tä õ'länejen m'ak tä lenij akäjche lhäy'e crema tä atsinhay ilän lhamejen. Tä noj lewhäytso, elh weihalhapej tä nichäte laka turno, ihoye rey Asuero. 13Wet m'ak at chik häpek t'uhläk ichäj tä tälhe atsinhay lew'et yämthilek lhaisilatyenej, õ'wahnej t'at tä ihoye rey lewukwe. 14Wet ihoye tä honatsi, wet tä nech'e fwalapej ihoye atsinhay lew'et elh tä hin'o tä lhey Saasgaz t'uye, häp elh tä rey t'ekhaye wet y'uhyene rey lemäfwas. Wet lepes t'at, nemhit yachajok ihoye rey, chik rey ni'akäjayejlhi wet nit'änaye.
15Wet Mardoqueo lewithok Abihail lhäse Ester, nichäte laka turno yämthilek ihoye rey. Tä yik, niwohit m'ak chik t'alhch'oye. Tajlhama tä ichäj m'ak tä Hegay lhämetej, tä häpe hin'o tä rey t'ekhaye wet äp y'uhyene atsinhay. Wet nilhokej wichi tä ihumin Ester. 16Wet õ'häne rey lew'et yämthilek ihoye rey Asuero, häp iwel'a diez tä lhey Tebet tä nichäte p'ante siete nekchämis tä rey ihi leniyatyaj. 17Wet rey wuj tä ihumin Ester, inu'pe atsinha elh chik häpe. Wet matche tä akäjejlhi, inu'pe lhutshay iyhäj tä pajche iyej. Wet iti'pe Ester lhetek häp corona, wet yok:
–Häp täja reina tä icheyäjo Vasti leniyatyaj.
18Wet yen lakäjyaja tä wuj tä iwujyen Ester, wet t'äneje nilhokej leniyatfwas lhäy'e lech'otfwas. Wet y'ayhetchä laha impuestos tä ihiche honhates tä ihi leniyatyaj, wet iwo t'awayhtesa wichi, mälhyej lakey häp rey tä iwoyeje laka wichi.
Mardoqueo iläte hin'ol tä t'uhläk ilän rey
19Häp ifwalas tä yachajo tä lhaihutwek häp atsinha lhutshay tä ihi hup tä lhamel lew'et, Mardoqueo tatayphä t'at tä ihi rey lewukwe lepe lhip. 20Wet Ester kamaj ifwenhit'a tä lham häpe Judía. Tsi tä Mardoqueo pajche ifwenho tä yok, “Yej kalelhthola elh chik häpe häp wichi tä alhäse”, wet lham iwoye t'at lhämet, mälhyet iwoye ifwalas tä pajche iyej Mardoqueo. 21Wet tä Mardoqueo tatayphäwhäye rey lewukwe lepe, lham iläte Bigtán lhäy'e Teres, hin'ol tä t'uye lepetso, lhamel wuj tä lewäk ihi wet iwo huseya'pe tä t'uhläk ilän rey Asuero. 22Wet tä Mardoqueo iläte täjtso, lham ifwenho reina Ester, wet lham ifwenho rey häp m'ak tä Mardoqueo yäme. 23Tä mälhyejtso, õ'tetshanch'oye täjtso wet õhw'en tä matche t'at, wet hin'olna õ'fwuhatwethä. Wet rey ne'tek õ'lesayen tä õ'tihi lehi tä õt'amajej.
