Éx 1

₁Häp tähesna lheyis häp Israel leles tä yikche häp lajcha Jacob tä ihoye p'ante Egipto, elhpej lhamel lhäy'e lew'et lheley: ₂Rubén, Simeón, Leví, Judá, ₃Isacar, Zabulón, Benjamín, ₄Dan, Neftalí, Gad, lhäy'e Aser. ₅Tä nilhokej Jacob leles lhäy'e lechetsos, iche setenta lhamel. José pajche ihi Egipto.

₆Tajyäme p'ante wujpe nekchämis, wet nemhit ichehen José lhäy'e lechilalis, lhäy'e nilhokej wichi tä lew'awlhafwas, lhamel y'inhen. ₇Mat lhamel wujpey leles lhäy'e lechetsos wet häpe wichi tä lhäy'e lhip tä wuj. Wet äp häpe wichi tä takhajayhen wet tapoyejej honhat tä lhamel ihi.

₈Tä paj p'ante, iche niyat tä nech'ayek tä nitäfwelayej José. Wet tahuyej laka wichi wet yok:

₉–Tetshan, häp wichi tä Israel lhayis lhäy'e lhip tä wujpey wet äp takhajayhen, wet äp inu'pe n'amel. ₁₀Is chik iche m'ak chik y'awoyeje lhamel, häpkhilek nemhit t'aylhatshi. Tsi elat chik iche n'oka'tshayaj, wet tach'ote lhatayhfwas wet iwo ka'tshayaja n'amejen, wet yikch'oye lhaka honhat.

₁₁Tä mälhyejtso, Egipto lheley tachuma hin'ol tä häpe lhamel wet yen lewosayej lechumtes. Wet lhamel yäm äytajche lechumet häp Israel lhayis, õne'tek lhamel yenwethä hupuy tä ihiche honhates tä lheyis Pitón lhäy'e Ramsés. Häp honhatestso tä Egipto kaniyat itihiche lakapuchehis tä wus tä yenwethä yämthilek t'amajej n'olhäk. ₁₂Mat tej tä õyäm äytajche m'ak tä õ'woyeje Israel lhayis, mat lhäy'epej lhip tä t'aytshi lhamel wet wujpey. Wet Egipto lheley nowaye lhamel ₁₃wet häp tä yen lakwenkaya, ichumyene lechumet tä wuj tä äytajche. ₁₄Wet lajit lakäjyaja lhamel, wuj tä äytaj lechumet, lhamel yenlhi iyhät wet yenlhi adobes, wet õne'tek lhamel yenlhi lechumtes tä ihiche n'olafwey. Wet matche tä ni'isa m'ak tä õ'woyeje lhamel.

₁₅Häte Egipto kaniyat ifwenho Sifra lhäy'e elh tä lhey Fúa, häp atsinhay tä t'uye Hebreo lhayis ka'tsinhay tä takapuhtshanhen, wet yok:

₁₆–Chik lehoye atsinha tä Hebrea tä takapuhtshan, yahin häp han'äfwaj tä nech'e nichätchä. Chik atsinha, is t'at, mat chik hin'o, ¡län!

₁₇Mat häp atsinhaytso lhamel nowaye Dios, wet häp tä iwohiyet'a m'ak tä niyat ne'tek lhamel iwoye, wet tek ilänhen nä'tshas. ₁₈Tä mälhyejtso, niyat t'äne atsinhaytso wet tahuyej wet yok:

–¿Chipte tä kalänahen nä'tshas?

₁₉Lhamel nichulho niyat wet yok:

–Hebreo ka'tsinhay wuj tä takhajayhen, tek häte iwoye atsinhay tä Egipto lheley. Elhpej tä iwo lhäsa nichätchä tä kamaj olhamel n'am chäte.

_20-21Tä mälhyejtso, Israel lhayis lhäy'epej lhip tä wujpey, wet wuj tä takhajayhen. Wet häp atsinhay tä t'uye lhamel tä iwo lelesa, tä lhamel itiyej lenowayhyaj häp Dios, häte Dios tach'ote t'at lhameltso wet iwo lelesa.

₂₂Wet niyat ifwenho imälhewek wichi wet yok:

–Ukwe Hebreo leles tä nech'e ichehen tä häpe hin'ol wet thate tewok. Mat elhpej tä atsinha is t'at, yej län.