Éx 11

₁Lhawuk ifwenho Moisés wet yok:

–Kamaj olehiyejt'a mat ochätyenla'pe lewit'äyhyaj elh häp Egipto kaniyat lhäy'e wichi tä ihi laka honhat. Wet chik tajyäme täjtso, lham tach'anlhahla amehen chik lhekhen, wet lhamlak ayokwesch'oye täja. ₂Mat athana fwenho Israel lhayis, hin'ol, atsinhay, is chik elhpej t'alhe Egipto lhele tä iwhäye yämthilek hiw'enho m'ayhay tä oro lhäy'e tä plata.

₃Wet Lhawuk takäpfwayeje yämthilek Egipto lheley nem yen w'et m'ayeka Israel lhayis. Häte niyat lech'otfwas lhäy'e nilhokej wichi tä ihi Egipto lhamel iwujyen Moisés.

₄Wet Moisés ihoye niyat wet ifwenho tä yok:

–Hebreo lhayis Lewuk Dios yok, “Chik honaj chowej olunhichela Egipto, ₅wet elhpej y'inhila lhäs tä lechunkatsek. Ichunla niyat lhäs tä ihi len'ohyaj, pajtha nichäte lechunkatsek häp n'okawo'tsinha tä ichofwan. Häte y'inhihena itshätäy leles tä lechunkatshay. ₆Nilhokla'pe honhat tä Egipto tä n'olhafwyhayaj ihihila, häp n'owit'äyhyaj tä ihanhiyejt'ak ichek mälhyejtso, wet äp tek ihichela. ₇Wet m'ak tä tamenhiyejak lehanayej tä olham Dios oiyej Israel lhayis, ihichet'ala asinäj chik t'änhihola lhamel wok leläy, wet lew'enayhla tä tehit'a iwoye Egipto lheley.” Häp täjtso Hebreo lhayis Lewuk Dios lhämet.

₈Wet Moisés äp ifwenho niyat tä yok:

–Chik mälhhiyejatso, aniyatfwas ihohla n'oye yämthilek itihiche honhat lakamchetey wet yohlak, “¡Mäh, lhäy'e nilhokej wichi tä aihänlhi!” Wet chik mälhhiyejatso, nech'e oyikhila.

Moisés wuj tä lewäk ihi wet yikch'oye niyat. ₉Wet Lhawuk ifwenho Moisés wet yok:

–Niyat tek iwohiyela ämet. Tä mälhyejtso, lhäy'ehila lhip m'ayhay tä wichi iseltejen chik owoyehi Egipto.

₁₀Moisés lhäy'e Aarón lhamel iwoye nilhokej m'ayhay tä wichi iseltejen tä ihi tä niyat tatache. Matkat Lhawuk hit'unhat niyat lehusek wet tek iwahintshi Israel lhayis chik yikch'oye Egipto.