Éx 16

₁Israel lhayis yikch'oye p'ante Elim wet nichätho ts'anis tä lhey Sin, häp lhip tä ihi lechowej tä Elim tumej lhip wet chenaj tä lhey Sinaí tumej lhip elh. Ifwalatso nech'e iwel'a tefwaji tä lhamel iwo lew'ekyaja, tälhe ifwala tä yikch'oye Egipto. Wet häp ifwala tä lhamel nichätho p'ante Sin häpe fecha quince. ₂Wet tä lhamel ihi ts'anis, nilhokej lhamel iwoyeje lhämtes tä ni'isachehen häp Moisés lhäy'e Aarón. ₃Wet yok:

–¡Isin'aj chik Lhawuk ilänhen olhamel täjnaj oihi Egipto! ¡Tsi tek onchuyuhennaj tä oihi, olhäk iche t'at wet iche itshäwet t'isan! ¡Matkat am lhäy'e Aarón lehän n'oyehen ts'anisna wet lelän n'oyejen nehläs!

₄Tä mälhyejtso, Lhawuk tahuyej Moisés wet yok:

–Lhek tetshan olhämet, otsäyhlahchä n'olhäk tä tälh puleye yämthilek amel aisej. Is chik nilhokej ifwalas wichi yike wet ihutwek m'ak tä w'awulho ifwala weihalha. Oyelhteje lhamel yämthilek ow'en elh tä iwoye m'ak tä one'tek iwoye lhäy'e elh tä niwoyaye olhämet. ₅Wet häp ifwala tä tumejlä n'ot'elakw'et, is chik elhpej ihutwek m'ak tä w'awulhej ifwalas täkwfwas.

₆Wet Moisés lhäy'e Aarón lhamel ifwenho Israel lhayis wet yok:

–Chik honaj lew'enayhla tä häpe t'at Lhawuk tä itonphä amel tä letälho Egipto. ₇Wet chik nech'e fwala lew'enayhla Lhawuk lewujyaj tä isi, tsi iläte t'at amel tä letiyej ämtes tä ni'isa. Tsi lewoyej n'oyehen ämtes tä ni'isachehen tä niwohit m'ak chik ohäpehen.

₈Wet Moisés äp yok:

–Chik honaj Lhawuk hiw'enla amhohen m'ak t'isan häpkhilek letufway. Wet chik nech'e fwala hiw'enla amhohen pan tä naya, tsi iläte t'at amel ämtes tä ni'isa tä lewoyeje. Tsi w'et om'ayhay t'at tä lewoyej n'oyehen. Häpkhit'a olhamel tä letatayhlä, mat letatay'atlä lham Lhawuk.

₉Wet nech'e Moisés tahuyej Aarón wet yok:

–Fwenho Israel lhayis, Is chik nilhokej lhamel iho kana yämthilek ihi tä Lhawuk tatache. Tsi lham iläte t'at lhämtes tä ni'isachehen.

₁₀Wet tä Aarón yämhoplhi Israel lhayis, lhamel iyahinche lhip tä ts'anis wet hiw'ene isi tä tälhe Lhawuk lewujyaj tä i'pe pule. ₁₁Wet Lhawuk tahuyej Moisés wet yok:

₁₂–Oläte t'at Israel lhayis lhämtes tä ni'isachehen. Fwenho lhamel, olak, “Chik honaj letufwayhla t'isan, wet chik nech'e fwala letufwayhla pan yämthilek lhipsen. Wet lehanhiyeja tä Lhawuk häpe t'at Dios tä matche.”

₁₃Wet fwalatso tä honaj näm afwenchey tä lhey codornices wet tapoyejej Israel lhayis kasthawet. Wet tä nech'e fwala iche ayas tä i'pe honhat. ₁₄Wet tä nojphä tä yäpilphä, iche m'ak tä imälhe'pe honhat hätet iwoye fwiy'et. ₁₅Tä Israel lhayis hiw'en, wet yok:

–¿Atsi m'ak tä häpe täja?

Moisés tahuyej lhamel wet yok:

–Häp täjtsi pan tä Lhawuk hiw'en amhohen häpkhilek häpe amel äk. ₁₆Wet ne'tek lewoyaye lhämetna: Elh weihalhapej amel is chik ihutwek m'ak tä w'awulhej lhamel tä ihi lew'et yämthilek tufw. Häp m'ak tä w'awulho un kilo hin'o tefwajni.

₁₇Wet Israel lhayis iwoye täjtso. Iyhäj tä nitäkw tä ihi lew'et, lhäy'e iyhäj tä nintäkwa tä ihi lew'et, hiw'awlhatej t'at lhamel häp m'ak tä ihutwek, ₁₈mälhyej Lhawuk lhämet tä ne'tek lhamel iwoye. Tek imälheyej lhip häp elh tä wuj m'ak tä ihutwek, wet niwohit m'ak chik tatäyej häp elh tä niwuja m'ak tä ihutwek. Tsi elh weihalhapej tachumat m'ak tä iwatlä yämthilek tufw.

₁₉Wet nech'e Moisés tahuyej wichi wet yok:

–Isit'ak iche elh chik häpek t'amajej lhip tä imälhehi yämthilek fwala elh.

₂₀Matkat iche iyhäj tä iwohiyet'a Moisés lhämet, mat t'amajej lhip yämthilek tufw chik fwala elh. Mat tä fwala elh iwos ihi wet najut. Tä mälhyejtso, Moisés tawäkwäye lhamel tä niwoyaye m'ak tä ifwenho.

₂₁Tä nech'e fwalapej elh weihalhapej tachuma m'ak tä iwatläk tufw, tsi tä chayokwe wachuhi tä i'pe honhat.

₂₂Tä nichäte fwala tä tumejlä n'ot'elakw'et, elh weihalhapej yäm wuj tä tachuma yämthilek w'awulhej fwalas täkwfwas. Wok oyok, m'ak tä w'awulho dos kilos hin'o tefwajni. Wet lhamel laka niyatey iwo siläta Moisés, ₂₃wet Moisés nichulho lhamel wet yok:

–Is t'at, häp täjtso tä Lhawuk t'uhläk amel lewoye. Chik fwala häpe t'at fwala tä n'ot'elakw'et, häp fwala tä wichi is chik yen t'amajchetayej Lhawuk. Fwalana häp tä is chik wichi hip'o m'ak chik t'uhläk hip'o wet ipen m'ak chik t'uhläk ipen. Wet lhip chik imälhehi nech'e is t'at chik t'amajej häpkhilek tufw chik fwala.

₂₄Wet nilhokej wichi iwoye m'ak tä Moisés ne'tek lhamel iwoye. Lhäk lhip tä imälhehi t'amajej yämthilek iche t'at m'ak chik tufw häp fwala tä n'ot'elakw'et. Mat nemhit iwos ihi wet nemhit najut. ₂₅Wet Moisés tahuyej wichi wet yok:

–Fwalana tufway äk lhip tä let'amajej honahaji. Häpe n'ot'elakw'et tä lhenay amajchetayej Lhawuk, wet fwalana nemhit iche n'olhäk tä i'pe honhat. ₂₆Tsi tajlhamat seis fwalas tä lehutaywek. Mat fwala siete tä n'ot'elakw'et nemla wo m'ak chik lew'en.

₂₇Iche iyhäj tä fwetaj nitch'ahuyaye Moisés lhämet, wet fwala tä n'ot'elakw'et fwetaj lhamel t'ukwe lhäk. Mat niwohit m'ak chik hiw'en. ₂₈Wet Lhawuk tahuyej Moisés wet yok:

–¿Atsihila fwalak amel lewoyaye olhämtes lhäy'e m'ak tä ochufwen amejen? ₂₉Yej p'ethatlä tä olham ow'en amhohen fwala tä n'ot'elakw'et. Häp tä tamenej tä fwala tä tumejlä n'ot'elakw'et ow'en amhohen äk tä w'awulhej fwalas täkwfwas. Wet fwala tä n'ot'elakw'et nilhokej amel is chik ihiche lew'etes. Isit'ak wo elh chik inuphä häp fwalatso.

₃₀Tä mälhyejtso, nilhokej wichi iwo t'elakw'eta häp fwala siete.

₃₁Wet Israel lhayis yen lheya maná häp m'ak tä lhamel ihutpejwek. Hätet iwoye lhoy tä lelemsas tä ipelas, wet äp akäj, hätet iwoye harina tä õ'kasoyej akäyek tä õyen tortillaya.

₃₂Wet Moisés yok:

–Ofwel amhohen Lhawuk lhämetna tä ne'tek amel lewoyaye. Yok, “Amajej un kilo häp maná, häpkhilek ales tä lepes lheley hiw'en wet nitäfwelej amel äk tä ow'en amhohen tä lheyayhi ts'anis tä otonphä amel tä lhehi honhat tä Egipto.”

₃₃Wet Moisés tahuyej Aarón wet yok:

–Chuma lehi wet thatho maná, wet tihi tä Lhawuk tatache yämthilek õt'amajej, häpkhilek wichi tä lepes lheley hiw'en.

₃₄Wet Aarón iwoye Lhawuk lhämet tä ifwenho Moisés. Wet itihi tä Arca tä N'ot'amajchet tatache yämthilek õt'amajej.

_35-36Cuarenta nekchämis tä Israel lhayis tufw p'ante maná, pajtha lhamel nichäte p'ante honhat tä wichi ihi. Wok oyok, lhamel tufw maná pajtha nichäte honhat tä Canaán.