Dios lhämtes letetsel tä ihi diez
1Dios iwoye p'ante lhämtesna wet yok:
2–Ohäpe Awuk Dios tä aitonphä tä lhehi honhat tä Egipto tä ayen lakwenkaya.
3“Yej len'okwiyej dios lhayis iyhäj. Ts'ilak olham tä ohäpe aka Dios.
4“Yej lhenlhi amho acheyä tä akwey lhenek tä lhen häpeya aka dios. Yej lhenlhi amho lepeyak tä letech'aynej m'ak tä ipuleye, wok m'ak tä i'pe honhat, wok m'ak tä ihi inätes tä ichufwi honhat. 5Yej let'upiyejchä tähestso wet yej len'okwiyej. Tsi olham ohäpe Awuk Dios wet n'am humin chik õhp'ajtitlhi n'oyej m'ak chik häpe. Wet otasin lhamel tä n'äyi n'oho wet iwoye m'ak tä ni'isa, lhäy'e leles, lhäy'e lechetsos. 6Mat op'altsenhen wet otiyej ohumnhayaj lhamel tä ihuminn'o wet iwoye olhämtes, pajla'tha nichäte leles tä lepes lheley.
7“Yej w'et lewo olheya tä ohäpe Awuk Dios. Tsi elh chik häpe chik w'et iwo olheya, oyenla tesayej.
8“Yej lep'ethatlä ifwala tä n'ot'elakw'et wet en amajcheta n'oyej. 9Chumlhi seis ifwalas, enlhi nilhokej achumet. 10Mat ifwala siete häp ifwala tä lhen elakw'eta n'oyej tä ohäpe Awuk Dios. Chik lechätepej ifwalatso, leyej achumet. Yej chumyenlhi äs, wok äse, wok akawo tä hin'o wok atsinha, wok alä, wok hin'o tä w'enha lhamej tä ihi haw'et. 11Tsi seis ifwalas tä olham oyenlhihte pule lhäy'e honhat, lhäy'e lewomekitas, lhäy'e nilhokej m'ayhay tä ihiche. Täjte onchäte ifwala siete, owo ot'elakw'eta. Häp tä tamenej tä otkäpfwaye ifwala tä n'ot'elakw'et wet oyen t'amajcheta.
12“Humin ajcha lhäy'e ako, häpkhilek pitaj ifwalas tä lhehi honhat tä olham tä ohäpe Awuk Dios ow'en amho.
13“Yej lelän aelh.
14“Yej lewo akain'oyaja.
15“Yej let'etan.
16“Yej lesufwkane aelh.
17“Yej lekäne aelh lew'et, yej lekäne atsinha tä lech'efwa, wok lakawo tä hin'o wok atsinha, wok lelä w'asetaj wok asno. Yej lekäne m'ak at chik häpe tä lewuk aelh.”
Israel lhayis nowaye Dios
18Nilhokej wichi hiw'en lep, wet iläte lepak tä hätet iwoye pelhay tä y'ip lhäy'e trompeta lepak, wet hiw'en tutsaj tä hip'o'pe chenaj. Wet lhamel wuj tä nowaye wet tek lhaitott'ayne. 19Wet lhamel ifwenho Moisés wet yok:
–Ahuy n'oyejen am, olhamel otch'ahuhila ame. Mat isit'ak lham Dios chik tahuy n'oyejen, tsi elat oy'inhen.
20Moisés nichulho lhamel wet yok:
–Yej nowayhen. Dios näm amehen yämthilek hiw'en chik leleyayej m'ak tä ni'isa wet lajit lepesa tä lewoyaye lhämtes.
21Wet wichi tek lhaitott'ayne Dios, wet Moisés yik tä ihoye pule tä wuj tä ichalaj tä Dios ihi.
Lhawuk lhämet tä yäme altares
22Lhawuk ifwenho Moisés wet yok:
–Fwenho olhämetna häp Israel lhayis, oyok, “Amel lew'enay tä otahuy amejen tä oihi pule. 23Yej lhenlhi lepeyak m'ak at chik häpe tä oro wok plata yämthilek len'okwiyejen wet letech'aynej tä len'okwi n'oyej. 24Enlhila n'oho altar tä honhat t'at, wet tila'pe itshätäy tä lelänhen wet lewunhomche tä lhen han'okhayaja n'oyej, lhäy'e itshätäy tä lhen otw'ayhata yämthilek ale'isyen n'oye, w'asetas, tson'atas, lhäy'e kayla lhayis. Wet honhat at chik häpek one'tek lhenay atichunhayajan'o tä amel lheyayhi, onämla amehen wet otkäpfwayhla amehen. 25Wet chik lhenaylhi n'oho altar tä tuntey, yej tachuma tuntey tä n'olhenhay. Tsi chik lechumyenlhi achumetcha tä i'pe tuntey, lewoyeje m'ak tä nemhit t'uhawetej. 26Wet isit'ak letonitphä oka altar chik lhenlhi. Tsi chik atojphä wet amel letaw'ulhpe, wet n'älpe asan lhip tä laj lep'ota.
