Itshäwet w'oyis tä õyen tetnekayej Dios lhämet tä yäm kalelhäj
1Lhawuk tahuyej Moisés wet yok:
–Ho'pe chenaj, am lhäy'e Aarón, Nadab, lhäy'e Abihú, lhäy'e setenta Israel lhayis tä thänhäy, wet hoye lhip tä oihi. Mat chik kamaj a'atofweho, khoschela katsi wet n'okwi n'oyej. 2Wet ts'ilak am tä is chik leho n'oye, mat häp iyhäj tä yik amche is chik atofwe. Häte wichi isit'ak yik amche.
3Moisés yik wet ifwenho wichi nilhokej häp Lhawuk lhämtes tä ne'tek lhamel iwoye. Wet nilhokej wichi nichulho wet yok:
–Olhamel owohiyela nilhokej m'ak tä Lhawuk yämetso.
4Wet Moisés ilesayen nilhokej Lhawuk lhämtes. Wet tä ifwala elh tä nech'e fwamlafwaj, nephä wet yenlhi altar tä itiwhäye chenaj. Wet tachuma doce tuntey tä yen tetnekayej doce Israel lhayis tä wusche'pe, wet häp tä itihi. 5Wet ichen mamses, ne'tek ilänhen w'asetas wet iwunhomche yämthilek wichi yen n'okhayajayej Lhawuk. Häte ilänhen iyhäj w'asetas häpkhilek wichi lha'isyene Lhawuk. 6Wet Moisés tachuma lhip w'oyis wet itsäyhomche lehis, wet lhip tä imälhehi itsäype altar. 7Tä ileyej, wet nech'e tachuma lelesaynek wet yahyen. Tä wichi iläte, wet yok:
–Olhamel owohiyela nilhokej Lhawuk lhämtes tä ne'tek y'awoye.
8Tä mälhyejtso, Moisés tachuma itshäwet w'oyis wet itsäype wichi, wet yok:
–Häp täja w'oyis tä yäm kalelhäj Lhawuk lhämet tä iwoyej amehen, mälhyej tä lhämtesna yäme.
9Wet Moisés iho'pe chenaj, lhäy'e Aarón, Nadab, lhäy'e Abihú, lhäy'e setenta Israel lhayis tä thänhäy. 10Tä lhamel nichätpe chenaj, lhamel hiw'en Israel laka Dios tä takasitpe m'ak tä isi tä mälhyej iwoye y'ithitaj, hätet iwoye pule. 11Mat Dios iwohit'a m'akayej Israel lhayis kahin'oltso tä lhamenya tä hiw'en häp lham. Wet hin'oltso t'ekhen wet iyä.
Moisés i'pe chenaj
12Lhawuk tahuyej Moisés wet yok:
–Ho'pe chenaj tä oi'pe, wet chik lechätpe, nihila n'ohlä. Tsi ow'enla amho tunte lhipey tä olesayen oka Ley tä oti'pe, lhäy'e olhämtes tä one'tek wichi iwoye yämthilek lechufwenej lhamel.
13Tä mälhyejtso, Moisés yik tä iho'pe Dios laka chenaj, lhäy'e lech'otfwa Josué. 14Wet tahuyej hin'ol tä thänhäy tä iyej, wet yok:
–Nihi n'ohlähen pajla'tha onämhen. Imälhe amejen kana Aarón lhäy'e Hur. Chik iche elh chik t'uhläk nich'oleyej m'ak chik häpe, is chik ihoye lhamelna.
15-16Tä Moisés ileyej tä tahuyej iyhäj, wet yik tä iho'pe chenaj Sinaí, wet isi tä tälhe Lhawuk lewujyaj nichätpe chenaj. Wet pajtha seis ifwalas tä pule hip'o'pe chenaj. Tä ifwala elh Lhawuk tumho pule tä hip'o'pe wet t'äne Moisés. 17Wet Israel lhayis hiw'ene Lhawuk lewujyaj tä lhain'ältej lhamel, hätet iwoye itäj tä wuj tä i'pe chenaj lepes tä tumphä. 18Wet Moisés tiyäjo pule tä hip'o'pe chenaj, wet ihi pajtha cuarenta ifwalas wet cuarenta honatsis.
