Éx 28

₁Wet Lhawuk tahuyej Moisés wet yok:

–Tshupiye häp achila Aarón tä iyej häp Israel lhayis, lhäy'e häp leles Nadab, Abihú, Eleazar, lhäy'e Itamar, yämthilek häpehen oka sacerdotes. ₂Enlhila achila Aarón lew'uyis tä n'ot'amajchetes, häpkhilek lewujyaj ihi lhäy'e lesilatyaj. ₃Fwenhola häp hin'ol tä ow'enho lehanyaj wet ihanej iwoyneje m'ak at chik häpe, is chik lhamel yenlhi Aarón lew'uyis tä t'uhawetej tä häpe oka sacerdote tä ot'amajchet.

₄“Häp tähesna lew'uyis chik õyenhilhila: Let'okwep'ot, lhäy'e m'ak tä lhey efod, wet lew'uy, lhäy'e lakay'uche tä lhäy ihi, lhäy'e lhetekp'ot, lhäy'e lakawak. Õyenhihoplhila lew'uyis tä n'ot'amajchetesna häp achila Aarón lhäy'e leles, häpkhilek häpehen oka sacerdotes. ₅Wet häp hin'ol tä yenlhi is chik tachuma oro, lhäy'e wesaj tä y'it lhäy'e tä ifwak'an wet äp ichät, lhäy'e lino tä õ'pätsin.

₆“Is chik hin'oltso yenlhi m'ak tä õyen lheya efod. Is chik häpe oro, lhäy'e wesaj tä y'it lhäy'e tä ifwak'an wet äp ichät, wet häpe lino tä õ'pätsin wet õ'wo lhäya, ₇lhäy'e täkwfwas t'akay tä ihiche lepesey. ₈Wet häp lakawak tä õ'nayhtejpe efod, is chik lhip t'at wet äp oro. Wet is chik häpe wesaj tä y'it lhäy'e tä ifwak'an wet äp ichät, wet häpe lino tä õ'pätsin.

₉“Wet chumela tuntey täkwfwas tä cornalina, hätet iwoye anek lhawo, wet tihila tä lelesayen lheyis häp Israel leles, ₁₀tälhe elh tä ichun p'ante pajtha nichäte elh tä lepes. Lesayena seis lheyis tä i'pe tunte elh wet seis lheyis iyhäj tä i'pe tunte elh. ₁₁Wet elh tä yenlhi häp n'olheyis tä i'pe tuntey, is chik häpe t'at hin'o tä lechumet tä yenwethä n'olhamsilis, wet is chik itech'aynej sellos. Wet chik wak'alhen, is chik itiche'pe lew'etes tä oro, ₁₂wet iti'pe häp efod t'akay häpkhilek tek õhp'ethatlä häp Israel leles. Tä mälhyejtso, chik Aarón ihopej n'oye, häp lhamel lheyis ihla'pe lefwapol häpkhilek oyenpej tichunhayaja lhamel. ₁₃Wet lew'etes häp tunteytso is chik oro t'at. ₁₄Häte enlhila täkwfwas cadenas tä oro wet pätsinchehena, tech'ayneja niyhäy, wet untejichela tunteyw'etes.

₁₅“Häte is chik õyenlhi Sacerdote tä Lhamya let'okwep'ot, lhäy'e m'ayhay tä õyen n'okalelhthayajchala tä ihi. Tech'ayneja häp efod, wok oyok, häp n'oyik tä õ'wo lhäya. Wet is chik oro t'at, wet äp häpe wesaj tä y'it lhäy'e tä ifwak'an wet äp ichät, wet häpe lino tä õ'pätsin. ₁₆Wet is chik tach'opway, wet veintidós centímetros tä pitaj, wet tä tsajo w'awulhi tä pitaj. ₁₇Wet häp tä leti'pe häp tuntey tä isis, tihila cuatro tä lefwilhkatchehchä. Wet fila tä ichun tihi rubí, lhäy'e tunte tä ika'tu tä lhey crisólito, lhäy'e tunte tä w'atshan tä lhey esmeralda. ₁₈Wet fila elh tihila tunte elh tä anek lhawo, lhäy'e tunte tä ifwak'an tä lhey zafiro, lhäy'e elh tä lhey jade. ₁₉Wet fila elh tihila tunte tä ichät tä lhey jacinto, lhäy'e elh tä lhey ágata, lhäy'e elh tä ifwak'an tä lhey amatista. ₂₀Wet fila tä lepes tihila tunte tä ika'tu tä lhey topacio, lhäy'e elh tä cornalina, hätet iwoye anek lhawo, lhäy'e elh tä w'atshan tä lhey jaspe. Tunteyna is chik iche'pe lew'etes tä oro, ₂₁wet is chik iche doce, tsi doce lheyis häp Israel leles. Tunte weihalhapej õ'lesayen, tet iwoyek sello t'at, tä häpe lheyis häp Israel lhayis tä tälhehen letetsel tä ihi doce.

₂₂“Häte enlhila cadenas tä oro wet tila'pe n'ot'okwep'ot. Mat is chik õ'pätsinchehen, tech'ayneja niyhäy. ₂₃Wet enlhila täkwfwas argollas tä oro, wet tihila elh häp n'ot'okwep'ot lepes wet elh tihila lepes elh. ₂₄Wet argollastso is chik letihiche häp cadenas, ₂₅wet cadenas lepesey häp tä letiche'pe häp tuntey lew'etes, wet äytejena häp efod t'akay tä ihi tä tatache. ₂₆Enlhila täkwfwas iyhäj argollas tä oro, wet tihichela n'ot'okwep'ot letselhäs tä tumchä tä tumejlä efod. ₂₇Wet äp enlhila täkwfwas iyhäj tä oro, wet tichela'pe efod t'akay lhipey tä tumchä tä ihi tä tatache. Tilawhäye n'otsekkay, tumtejahlä kawak tä efod t'ak. ₂₈Wet äyteja t'ak tä y'it häp argollas tä ihi n'ot'okwep'ot lhäy'e iyhäj tä ihi efod, häpkhilek n'ot'okwep'ot tumphä wet kawak tä efod t'ak tumchä, mat hap'akwek. ₂₉Häpkhilek Aarón chik ihochufwi ow'et lhip tä Ot'amajchet, yäythila lhamej n'ot'okwep'ot tä n'okalelhthayajchal ihi, wet Israel leles lheyis ihla'pe let'okwe yämthilek oyenpej tichunhayaja lhamel. ₃₀Tihila n'ot'okwep'ot häp n'okalelhthayajchal, häp m'ak tä õyen lheya Urim lhäy'e Tumim. Wet is chik Aarón iti'pe let'okwe chik lham iho n'oye, yämthilek ihanej m'ak tä olham ot'uhläk Israel lhayis iwoye.

₃₁“Häte enlhila n'ow'uy tä y'it häpkhilek efod i'pe. ₃₂Is chik n'ow'o len'äyij ihi lechowej, wet õ'tsekejchehen lhipey häp n'oyik häpkhilek nikw'esache. ₃₃Enlhila wesaj lhipey tä letolnhathen tä lhen lhäya, y'it, ifwak'an, ichät, wet lelhahatche khäläj tä oro wet letichehen lhipey. ₃₄Wok oyok, wesaj lhipey tä õ'tolnhatwethä is chik õ'tipejwhäye khäläj tä oro, nilhokche lhip. ₃₅Wet is chik Aarón taw'uyhipej chik iwoye sacerdote lechumet. Chik iho n'oye tä oichufwi ow'et lhip tä Ot'amajchet, wet pitsajlä khäläj tä tumlä. Wok chik inuphä, pitsajlä khäläj tä tumlä tä nek. Häpkhilek newache lewit'äyhyaj wet y'il.

₃₆“Häte enlhila oro lhip tä isänhän, wet tila'pe n'olesaynek tä letech'aynej sello, häp n'olhämtes tä yok, Lhawuk T'amajchet. ₃₇Wet ena t'aka niyäkw tä y'it wet äyteja Aarón lhetekp'ot lhip tä i'pe letacho. ₃₈Wet chik itpe letacho, lhamlak Israel lhayis isej chik iche m'ak at chik häpek wetayej tä lhamel yachaj n'oye m'ayhay tä yen t'amajcheta n'oyej. Wet häpkhilek tamenej chik otchumlä m'ayhaytso.

₃₉“Enlhila Aarón lakay'uche tä lino tä talesayhi, wet lhetekp'ot häte lino, wet häp lakawak is chik talesache. ₄₀Wet enhoplhila Aarón leles häp lakay'uchelis, lhäy'e lakawakay, lhäy'e lhetekp'otes, häpkhilek lewujyaj ihi lhäy'e lesilatyajay häp lhamel. ₄₁Häp tähestso tä lew'uyyenhi häp achila Aarón lhäy'e leles. Wet tsäyla'pe aceite häp lhethey tä letetnek tä lew'enho len'ohyaj häp lhamel wet lhen häpeya oka sacerdotes tä ot'amajchetes. ₄₂Enlhila lhamel lakoset tumyejis tä lino, häpkhilek hip'o'pe lesulak wet hip'o'pe lhechey. ₄₃Wet iwohiyet'ak Aarón lhäy'e leles nit'äsachehen chik ihoye owukwe tä carpa wok ihowhäye altar tä iwoye sacerdote lechumet tä ihi ow'et lhip tä Ot'amajchet. Chik mälhyejtso tä t'amaj lhamejen, häpkhilek lajit letesa wet n'ilahen. Häp täjtso olhämet, wet is chik Aarón lhäy'e leles iti lhamejen pajla'tha nichäte lepes lheley.”