Éx 36

₂Moisés t'äne Besalel lhäy'e Oholiab, lhäy'e nilhokej iyhäj tä ihanej tä yenwethä m'ayhay, häp lhamel tä Lhawuk hiw'enho lehanyajay wet nin'etäjayej tä tach'ote lham Lhawuk lew'et tä õyenlhi. ₃Wet Moisés hiw'enho häp m'ayhay tä Israel lhayis yen t'awayhtesa yämthilek lhamel iwo tesa häp lechumet. Wet ifwalapej ifwalapej Israel lhayis ihäne m'ayhay tä yen t'awayhtesa.

₄Wet häp hin'ol tä yenlhi Dios lew'et, lhamel ileyej ayej lechumet ₅wet iwo silätaye Moisés wet yok:

–Kamaj wichi ihänlhat alhoho t'awayhtes tä olhamel oyenejlhi m'ayhay tä Lhawuk ne'tek oyenlhi.

₆Tä mälhyejtso, Moisés ifwenho wichi wet yok:

–Amel, hin'ol lhäy'e atsinhay, leyej tä lehänaye m'ayhay häp hin'ol tä yenlhi Dios lew'et.

Tä mälhyejtso, wichi ileyej tä ihäne t'awayhtes ₇tsi naya t'at m'ayhay tä iche, w'awulhej yämthilek wak'alh m'ak tä õyenlhi, wet häte wuj tä imälhehi.

₈Häp hin'ol tä wuj tä ihanej tä yenwethä m'ayhay, häpe t'at lhamel tä yenlhi Dios lew'et, tsi lehanyaj inu'pe iyhäj n'ochumyenhay lehanyaj. Lhamel yenlhi diez cortinas tä n'oyik tä y'it lhäy'e tä ifwak'an wet äp ichät. Häpe lino tä õyen niyhäya tä õ'pätsin, wet yenlhi lhäy tä isis tä itech'aynej m'ayhay tä lhafwis ihi, wet ifwuhatchelahchä yämthilek yen häpeya Dios lewukwe carpa. ₉Elh weihalhapej cortina lhamel itihi doce metros y medio tä pitaj wet dos metros tä tsajche. ₁₀Wet lhamel itsekwek cinco cortinas, wet iyhäj cinco häte itsekwek. ₁₁Wet nech'e ipätsinchehen argollas tä niyhäy tä y'it, wet itichehen lhipey, iyhäj häte iwoye. ₁₂Wet ipätsinchehen cincuenta argollas tä wesaj lhipey, wet itichehen lhipey tä hip'ajtitchewek. ₁₃Wet yenlhi cincuenta ganchos tä oro häpkhilek inuhat lhamhomche tä hip'ajtitchewek häp cortinas tä yen Dios lewukweya.

_14-15Häte lhamel yenlhi once cortinas tä kayla w'ole. Itihi trece metros y medio tä pitaj wet dos metros tä tsajche elh weihalhapej, yämthilek yen lep'ota häp Dios lewukwe. ₁₆Cinco tä itsekwek wet itumtej lhip elh, wet seis iyhäj tä itsekwek itumtej lhip elh. ₁₇Wet yenlhi cincuenta argollas tä niyhäy, wet itichehen lhipey häp cortinas tä itsekchewek. ₁₈Wet yenlhi cincuenta ganchos tä bronce yämthilek hip'ajtitchewek cortinas tä lhamel yen Dios Lewukweya. ₁₉Wet lhamel yenlhi tson'ataj t'ähes tä itsekchewek, wet ipakej m'ak tä ichät wet hip'oyejpe häp Dios lewukwe. Wet äp itsekwek inätetas t'ähes wet itumhatphä tä hip'oyejpe lewukwe.

₂₀Wet lhamel tachuma häp tablas tä acacia wet itshupyenchehchä tä ikasthaynhen. ₂₁Hiw'en cuatro metros y medio tä pites elhpej, wet sesenta y cinco centímetros tä tsajche. ₂₂Wet ilanche lhipey wet elh tä itayyenlä tijche lechowej, häpkhilek is tä y'uyit lhamhomche. Nilhokej tablas tä iwoynejetso, häpkhilek yenejlhi häp Dios lewukwe. ₂₃Wet tä wak'alhen, itumtej veinte häp lhip tä tapinhiye, ₂₄wet äp yenlhi cuarenta plata lhipey yämthilek yen t'äsawtesa. Tabla weihalhapej y'äsayenpe täkwfwas t'äsawetes, itichufwi lhipey tä tiyäj lhamhomche.

₂₅Wet häp veinte iyhäj tablas itumtej lhip elh tä tafwojhiye, ₂₆lhäy'e cuarenta t'äsawetes tä plata lhipey yämthilek y'äsayenche'pe. ₂₇Wet häp lhip tä tumej tä ifwala y'uy, itumtej seis tablas, ₂₈wet y'isej täkwfwas tablas iyhäj wet itihiche letselhäs lhip tä lew'echehi. ₂₉Wet tablastso tä hip'ajtitchewek tä tumchä, lhäy'e tä tumphä tä inuhat lhamhomche häp argollas. Mälhyej'attso tä lhamel yenlhi. ₃₀Tä mälhyejtso, iche ocho tablas lhäy'e dieciséis t'äsawetes tä plata lhipey tä lhamel y'äsayenche'pe.

₃₁Wet tablas tä tumej lhip elh häp Dios lewukwe, lhamel hip'alkatejo cinco lemäynhay. ₃₂Wet häp iyhäj tä tumej lhip elh häte itech'aynej t'at iyhäj. Wet häp tablas tä tumej tä ifwala y'uy häte hip'alkatejo cinco lemäynhay. ₃₃Wet häp lemäynek tä inukwe lechowej, lepes i'pe tablas iyhäj tä ifwache. ₃₄Wet hip'oyejche'pe oro häp tablas lhäy'e lemäynhay. Wet äp yenlhi argollas tä oro häpkhilek y'uyitchehen häp lemäynhay.

₃₅Wet lhamel yenlhi lep'ot tä sak'al tä y'it lhäy'e tä ifwak'an wet äp ichät, wet yenlhi lhäy tä itech'aynej m'ayhay tä lhafwis ihi. ₃₆Wet tachuma cuatro ch'utey tä acacia tä hip'oyejche'pe oro. Wet itihi ganchos tä oro wet y'äsayenche'pe plata lhipey.

₃₇Häte lhamel yenlhi n'oyik tä y'it lhäy'e tä ifwak'an wet äp ichät, wet äp häpe lino tä õyen niyhäya tä õ'pätsin, wet lhäy wuj tä isis, häpkhilek lhamel yen lepe p'ota häp carpa tä Dios lewukwe. ₃₈Wet lhamel yenlhi cinco ch'utey, wet hip'ajtej ganchos, wet y'äsayenche'pe t'äsawetes tä bronce. Wet hip'oyejche'pe oro häp ch'utey lhipey tä tumchephä lhäy'e argollas.