Éx 38

₁Besalel yenlhi altar tä hal'ä tä acacia, häpkhilek õ'tiche'pe itshätäy wet õ'wunhomche yämthilek õyen n'okhayajayej Lhawuk. Itihi dos metros wet veinticinco centímetros tä pitaj, wet tä tsajo hätet iwoye, wet itihi un metro wet veinticinco centímetros tä atojphä. ₂Wet iwo lech'ula, itihiche letselhäs, wet lhip t'at, tek w'enhache lhamej, wet imälhewek altar hip'oyejpe bronce. ₃Nilhokej m'ayhay tä iyej altar, bronce t'at: häp mok'otaj lehis, lhäy'e pala lhayis, lhäy'e n'olhäthis, lhäy'e tenedores, lhäy'e fwiyhol lehis. _4-7Häte yenlhi chinhas tä bronce häpkhilek hip'oyejlhi altar lhip tä tumchä, mat tek yäm taje altar. Wet yenlhi täkwfwas hal'äy tä acacia wet hip'oyejche'pe bronce, wet y'uyitchehen argollas tä bronce tä itihi altar häpkhilek õyen n'otsokeka chik õyikpejchufwi. Wet yäm pitofwo altar wet hal'ä t'at.

₈Wet iche häp atsinhay tä tachumhilhi lepe häp carpa tä Lhawuk lakasthawet, wet lhamel yen Lhawuk t'awayhata häp leyanthis tä bronce. Wet Besalel tachuma wet yenejlhi häp inät lehi lhäy'e lew'et tä bronce.

₉Wet Besalel yenlhi Dios lew'et laka alho. Lhip tä tumej tapinhiye itiche cortinas tä häpe lino tä õ'pätsinchehen. Itihi cuarenta y cinco metros tä pitaj, ₁₀lhäy'e veinte letsutes tä bronce, lhäy'e veinte t'äsawetes tä bronce, wet hip'ajtej letsutes häp ganchos tä plata lhäy'e argollas tä plata. ₁₁Wet häp lhip tä tafwojhiye hätet iwoye. ₁₂Wet häp lhip tä tumej tä ifwala y'uy, itumtej cortina tä nipitaja tä veintidós metros y medio, lhäy'e diez letsutes, lhäy'e diez t'äsawetes. Wet hip'ajtej letsutes häp ganchos lhäy'e argollas tä plata. ₁₃Wet lhip tä tumej hichä tä lepe ihi, häte itihi cortina tä veintidós metros y medio tä pitaj. ₁₄Wet itumtej cortina tä siete metros häp lepe lhip elh, lhäy'e tres letsutes, lhäy'e tres t'äsawetes. ₁₅Wet lepe lhip elh hätet iwoye, cortina tä siete metros, lhäy'e tres letsutes, lhäy'e tres t'äsawetes. ₁₆Nilhokej cortinas tä ilafwejlhi häp Dios lew'et ka'alho, häpe t'at lino tä õyen niyhäya tä õ'pätsin. ₁₇Wet Besalel tachuma bronce wet yenlhi t'äsawetes. Wet tachuma plata wet yen ganchosa, lhäy'e argollas tä hip'ajtej letsutes. Wet hip'oyejche'pe plata häp letsutes lepesey tä tumchephä. Nilhokej letsutes argollas tä plata ihiche.

₁₈Wet itihi lepe häp cortina tä häpe n'oyik tä y'it lhäy'e tä ifwak'an wet äp ichät, wet äp häpe lino tä õyen niyhäya tä õ'pätsin, wet lhäy wuj tä isis. Itihi nueve metros tä pitaj, wet dos metros wet veinticinco centímetros tä atojphä, hätet iwoye cortina tä ihi alho. ₁₉Letsutes ihi cuatro, lhäy'e cuatro t'äsawetes tä bronce. Wet Besalel tachuma plata wet yen ganchosa, lhäy'e argollas tä hip'ajtej letsutes. Wet hip'oyejche'pe plata häp letsutes lepesey tä tumchephä. ₂₀Nilhokej chinhas tä carpa t'akw'etes häpe t'at bronce, lhäy'e iyhäj n'olafwek t'akay lew'etes.

_21-23Wet Besalel, Urí lhäs tä äp lechäti Hur, tä iyej wichi tä tälhe letes Judá, lham yenlhi nilhokej m'ak tä Lhawuk ifwenho Moisés tä ne'tek õyenlhi. Wet hin'o tä lhey Oholiab, häp Ahisamac lhäs tä iyej wichi tä tälhe letes Dan, häp tä tach'ote. Lham häpe chinhaswo, wet ihanej tä tayhin, wet iwo lhäya wesaj tä y'it lhäy'e tä ifwak'an wet äp ichät, lhäy'e lino tä wuj tä is.

Wet Moisés ne'tek Leví kawichi ilesayen chinhas tä õ'tihi carpa tä Dios lew'et. Häp carpatso, tunte lhipey tä õ'ti'pe Dios lhämtes tä õ'lesayen, häp tä ichufwi. Wet Leví kawichi ilesayen t'at, wet hin'o tä lhey Itamar, sacerdote Aarón lhäs, häp tä õyen lewoyayej lhamel tä yenlhi.

₂₄Nilhok oro tä õtchuma tä õyen Dios lewukweya, häpe t'at oro tä wichi yen t'awayhata. Wet iche novecientos sesenta y cinco (965) kilos wet treinta gramos. Wet tä õ'wo kaw'awlhanhatayej, õ'chumyenlhi mälhyej tä sacerdotes ichumyenlhi.

₂₅Wet häp plata tä õ'hutwek tä tälhe wichi tä õ'lesayen lheyis, iche tres mil trescientos diecinueve (3.319) kilos wet quinientos veinticinco (525) gramos. Tä õ'wo kaw'awlhanhatayej, õ'chumyenlhi mälhyej tä sacerdotes ichumyenlhi. ₂₆Nilhokej hin'ol tä õ'lesayen lheyis häpehen hin'ol tä hiw'en veinte nekchämis wok inu'pe. Wet iche seiscientos tres mil quinientos cincuenta (603.550) tä nilhokej. Wet elh weihalhapej yen t'awayhata cinco gramos y medio plata. Õ'chumyenlhi chinaj t'äj mälhyej tä sacerdotes ichumyenlhi. ₂₇Wet häp platatso tä tres mil trescientos diecinueve (3.319) kilos, õ'wachuhathi tres mil trescientos kilos yämthilek õyen Dios lew'et letsutes lew'etesa, lhäy'e lep'ot letsutes lew'etes. Nilhok platatso õyen lew'etesa cien ch'utey, elh weihalhapej tiyäjo treinta y tres kilos plata. ₂₈Wet häp lhip tä imälhehi, Besalel yen ganchosa tä ihiche ch'utey, lhäy'e tä hip'oyejche'pe lepesey tä tumchephä, wet äp yenlhi argollas.

₂₉Wet häp bronce tä wichi yen t'awayhata, iche dos mil trescientos treinta y seis (2.336) kilos wet cuatrocientos gramos. ₃₀Wet broncetso häp tä õyen lew'etesa Dios lew'et lepe ch'utey. Häte altar bronce t'at, lhäy'e chinhas tä õ'lafwejlhi tä tumchä bronce t'at, lhäy'e nilhokej m'ayhay tä iyej altar. ₃₁Wet ch'utey tä ilunejlhi Dios lew'et ka'alho, häte õyen lew'etesa bronce, lhäy'e n'olafwek lepe ch'utey lew'etes, bronce t'at, lhäy'e Dios lew'et t'akay lew'etes, lhäy'e n'olafwek t'akay lew'etes. Nilhokej bronce t'at.