Éx 4

₁Moisés nichulho Dios wet yok:

–Lhamel t'ekhahit'ala n'oye wet iwohiyet'ala olhämet. Wet yohlak, “Mathichet'a tä Dios lhain'älit amej.”

₂Wet Lhawuk yok:

–¿Atsi m'ak tä ihi akwey?

Moisés yok:

–Otsut t'at.

₃Lhawuk yok:

–That honhate.

Moisés ithat katsi letsut wet welan amlhätaja. Tä Moisés hiw'en, inu alhoho tä yikch'oye. ₄Mat Lhawuk tahuyej wet yok:

–Chuma lechäs.

Moisés tachuma, häpet tä ikatej yachajo tä häpe t'at letsut. ₅Lhawuk yok:

–Täjtso häpkhilek lhamel nikachuya tä matche t'at tä Lewuk Dios lhain'älit amej, häp achätilis Abraham laka Dios, Isaac laka Dios wet Jacob laka Dios.

₆Wet äp yok:

–Athana ti'pe akwey hat'okwe.

Moisés iti'pe takwey let'okwe. Tä itiyej kanhi, hiw'en tä amostas i'pe takwey. T'äj lhäy'e lhip tä ipelaj. ₇Dios yok:

–Achajo tä leti'pe akwey hat'okwe.

Moisés iwoye. Tä itiyej kanhi, hiw'en tä iches takwey, hätet iwoye t'isan imälhewek. ₈Wet Lhawuk yok:

–Chik lhamel ikachu n'otetnek tä ichun, ikachuhit'ala elh. ₉Mat chik ikachu täkwfwas n'otetnhay, chumela inät tä ihi tewokitaj wet tsäyla'pe honhat. Wet chik letsäype honhat, welanla w'oyisa.

₁₀Mat Moisés yok:

–Iwuk, isit'a olhämtes tä ofwetaj oyämlhi. Pajchey tä mälhyejtso, wet tä letahuy n'oyej athana, lew'en tä isit'a olhämtes tä owoye.

₁₁Lhawuk nichulho wet yok:

–¿Atsi tä iwo lak'aja hin'o? ¿Wet atsi tä yen opaya wet yen ch'otech'oya? ¿Wet atsi tä hiw'enyenche honhat wok yen asnama? ¿Hä kahäpeya olham Dios? ₁₂Mäh, olham oihla amej chik letahuy wet ofwenla amho ämet chik lewohiyela.

₁₃Mat Moisés tujlhache tä yok:

–¡Iwuk, olhaip'altsen ame, chen hin'o elh chik häpe!

₁₄Wet Lhawuk nech'e tawäkwäye Moisés tä iwoyetso, wet yok:

–Achila iche, Aarón tä häpe Leví lhayis elh. Ow'en tä wuj tä is tä yämlhi. Athana lham nek t'at tä iho ame. Chik nämla, wujlak lakäjyaj ihi chik aiw'en. ₁₅Ahuyeja lham, fwenhola nilhokej ämtes tä lewohiyela wet lhamlak yäme. Wet olham oihiyeja wet oihla amej chik lhämwethä, wet ofwenla amhohen m'ayhay tä is chik lewohiyela. ₁₆Chik letahuyhiyeja Aarón, hätehlat iwoyek olham t'at tä otahuyej, wet ifwenhihola wichi m'ak tä lefwenho lhamel. ₁₇Chäj atsut, tsi häpkhilek lechumyenlhi chik lhenlhi m'ayhay chik wichi iseltejen.

₁₈Moisés yäple lakachäti Jetro lew'et, wet tahuyej tä yok:

–¿Hä letach'anlha n'oye tä oyäple opuhfwas Hebreo lhayis tä ihi Egipto? Ot'uhläk ow'en chik kamaj iläyhen p'iya.

Jetro nichulho Moisés wet yok:

–Mäh t'at, atamsek ihi.

₁₉Wet tä kamaj Moisés neka tä ihi honhat tä Madián, Lhawuk äp yachajo tä tahuyej wet yok:

–Äple t'at Egipto. Pajche y'inhen nilhokej hin'ol tä t'uhtehläk ailän.

₂₀Tä mälhyejtso, Moisés tachuma lech'efwa lhäy'e leles wet iti'pe asno, wet yikhen tä ihoye Egipto. Wet ichäji takwey häp letsut tä Dios ne'tek ichäj. ₂₁Wet Lhawuk yachajo tä tahuyej wet yok:

–Chik lechäte Egipto, päynela niyat nilhokej n'otetnhay, tsi pajche ow'en amho akhajyhayaj yämthilek lhenlhi tähestso. Mat tetshan, olham ot'unthila lehusek wet tek iwahnhitshila Israel lhayis. ₂₂Tä mälhyejtso fwenhola, olak, “Israel lhayis laka Dios lhämet yok, Israel häpe olhäs tä ochunkatsek. ₂₃Pajche ofwel amho tä oyonaj, Ch'anlhaye olhäs chik yik yämthilek n'okwi n'oyej. Mat tä kawahnatshi, olänla äs tä achunkatsek.”

₂₄Wet Moisés inukwe len'äyij tä yäple Egipto, lham lhäy'e lech'efwa, lhäy'e leles. Tä honaj p'ante lhamel iwo lakasthaweta, wet honatsitso Lhawuk lhain'ältej Moisés wet t'uhläk ilän. ₂₅Wet lech'efwa Séfora tachuma tunte lhip tä y'uy, wet yistej lhäs lho t'äj lhip wet itiyej Moisés lepach'ol. Tä yenlhi täjtso, häp tä ifwenho Moisés tä yok:

–Ahäpe och'efwa tä lhäs w'oyis ifwayhat.

Wet häp tä Lhawuk ileyej tä fwetaj ilän.

₂₆Tä mälhyejtso, Lhawuk yikch'oye. Tä Séfora yok, “Ahäpe och'efwa tä lhäs w'oyis ifwayhat”, tsi lham tä yiset lhäs lho t'äj lhip.

₂₇Wet Lhawuk pajche tahuyej Aarón wet yok:

–Mäh hoye ts'anis, lew'enla Moisés.

Wet Aarón yik. Tä yäm kanhi, hiw'en Moisés tä iwhäye Dios laka chenaj, wet n'okwiyej wet hits'u lech'alo. ₂₈Wet Moisés ifwenho nilhokej m'ak tä Lhawuk ne'tek yäme, häte n'otetnhay tä wichi iselthiyejena tä Lhawuk ne'tek yenlhi. ₂₉Tä ileyej tä ifwenho nilhokej Aarón, nech'e yikhen tä ihoye Egipto. Tä nichäte, lhaihutwek lhäy'e hin'ol tä thänhäy tä iyej Israel lhayis. ₃₀Wet Aarón ifwenho lhamel häp m'ak tä Lhawuk ifwenho Moisés, häte ipäyne wichi häp n'otetnhay tä Lhawuk ne'tek yenlhi. ₃₁Wet Israel lhayis ikachuhit'a. Wet tä lhamel nitäfwelej tä Lhawuk hip'altsen wet hiw'en leteläythayaj tä iyej, lhamel takhosche katsi wet n'okwiyej Lhawuk.