Éx 7

₁Tä mälhyejtso, Lhawuk ifwenho Moisés wet yok:

–Tetshan olhämet. Olham oayene hin'o tä tet iwoyek Dios t'at tä ihi tä niyat tatache, wet achila Aarón häpkhila aka profeta. ₂Fwenhola Aarón nilhokej m'ak tä one'tek lewoye, wet lhamlak ifwenho niyat tä is chik tach'anlhaye Israel lhayis chik yikch'oye laka honhat. ₃Mat olham ot'unthila niyat lehusek, häpkhilek oyäm wujpe n'otetnhay tä äyteschehen chik wichi iseltejen tä ihi Egipto. ₄Lham tach'ahuhit'ala amehen, mat okhajyhayaj nichätla'pe Egipto wet otasnhiyeja laka wichi häp otasnhayajay tä äyteschehen. Wet otonhiphäla oka nifwotaj tä häpe oka wichi Israel lhayis. ₅Wet chik Egipto lheley hiw'enla okhajyhayaj chik nichätpe lhamel, wet hiw'enla chik otonphä Israel lhayis, lhamel ihanhiyeja tä ohäpe Dios tä matche.

₆Wet Moisés lhäy'e Aarón iwoye nilhokej m'ak tä Lhawuk ne'tek lhamel iwoye. ₇Moisés hiw'en p'ante ochenta nekchämis tä lhamel iwo tesa tä yämhoplhi Egipto kaniyat, wet lechila Aarón hiw'en p'ante ochenta y tres nekchämis.

₈Lhawuk ifwenho Moisés wet yok:

₉–Chik Egipto kaniyat yok, “Päyen n'oye n'otetnek”, fwenhola Aarón wet lhok, “Fwomej atsut, thatho tä niyat tatache”. Wet lhaiwelanthila amlhätaja.

₁₀Moisés lhäy'e Aarón yikhen tä ihoye niyat, wet iwoye m'ak tä Lhawuk ne'tek lhamel iwoye. Aarón ithat katsi letsut, ithatho tä niyat tatache, lhäy'e leniyatfwas, wet lhaiwelanhat amlhätaja. ₁₁Wet tä niyat hiw'en, lham t'äne hin'ol tä iyej tä häpehen han'ältshantses wet äp ahantses, wet lhamel häte yenlhi t'at m'ak tä Moisés yenlhi. ₁₂Lhamel ithatche katsi letsutes wet äpte lhaiwelanthen amlhätasa. Matkat Aarón letsut tufwen lhamel letsutes. ₁₃Mat tej tä mälhyejtso, niyat hit'unhat t'at lehusek wet iwohiyet'a Moisés lhämet, mälhyej tä Lhawuk pajche yäme.

₁₄Tä tajyäme täjtso, Lhawuk ifwenho Moisés wet yok:

–Niyat hit'unhat lehusek wet tek iwahnhitshila wichi. ₁₅Mat chik nech'e fwala, chik lham ihoye tewok, nihilahlä chik lhehi tewok lhip. Wet chik lhek, chäja atsutnaj lhaiwelanhat amlhätaja. ₁₆Wet chik lham nichät ame, fwenhola, olak, “Hebreo lhayis Lewuk Dios ichenn'o ame, ne'tek ofwel amho lhämet tä yok, Ch'anlhaye oka wichi yämthilek yikhen wet n'okwihla n'oyej chik lhamel ihi ts'anis. Mat kamaj lewohiyet'a lhämettso. ₁₇Tä mälhyejtso, lham Dios yok, Athana lew'enla tä ohäpe Dios tä matche. Chik olham oy'ajiyejila tewok häp otsut tä ihi otkweyna, wet inät lhaiwelanthila w'oyisa. ₁₈W'ahat y'inhihena wet tewok najuthihila, wet Egipto lheley ikokyenhiyela inät tä ihi tewok.”

₁₉Häte Lhawuk ifwenho Moisés wet yok:

–Fwenhola Aarón, Is chik ipiyenpe takwey tä letsut ihi häp tewok lhayis, lhäy'e inät n'äyhäy tä inätes ihiche, lhäy'e lewomhay, lhäy'e inätes tä ihiche lehis tä ihi Egipto, yämthilek welan w'oyisa. Wet lehi chik häpe tä hal'ä wok tunte, inät tä ihi welanla w'oyisa.

₂₀Moisés lhäy'e Aarón iwoye t'at m'ak tä Lhawuk ne'tek lhamel iwoye. Aarón itiphä letsut wet y'ajeji tewok tä ihi tä Egipto kaniyat lhäy'e leniyatfwas tatache, wet tewok nech'e welan w'oyisa. ₂₁Y'inhen w'ahat tä ihi, wet nech'e inät najuthi wet Egipto lheley ihanhiyejt'a chik iyäyej. Imälhewek inätes tä ihi Egipto w'oyis t'at.

₂₂Matkat han'ältshantses tä iyej niyat, lhamel häte yenlhi m'ak tä Moisés lhäy'e Aarón yenlhi. Tä mälhyejtso, tä niyat hiw'en, iwohiyet'a Moisés lhäy'e Aarón lhämet, mat hit'unhat lehusek, mälhyej tä Lhawuk pajche ifwenho Moisés. ₂₃Wet yäple lew'et, itetshanhit'a m'ak wit'äyna. ₂₄Wet nech'e nilhokej Egipto lheley lhamel tijch'oye inät tä ihi tewok lhip yämthilek lhamel hiw'en inät chik iyäyej. Tsi tewok nemhit is chik wichi iyäyej.

₂₅Siete ifwalas tä tajyäme tä Lhawuk y'aji tewok.