Éx 8

–Mäh hoye Egipto kaniyat wet fwenhola, olak, “Hebreo lhayis Lewuk Dios yok, Ch'anlhaye oka wichi chik yikhen, yämthilek n'okwi n'oyej. ₂Chik kawahnatshi lhamel, otihiyeja otasnhayaj häp Egipto. Ochenhiyela päy'i lhayis tä wuj, ₃wet ikasohihila tewok wet inuhiphäla tä tälho. Wet tiyäjlachufwi awukwe, tiyäjihola amäwet, lhäy'e aniyatfwas lewukwey, lhäy'e nilhokej aka wichi lewukwey, wet tapohikwela anhonthis lhäy'e lew'etes tä õyenlhi pan. ₄Wet taw'ulhla amche, lhäy'e aniyatfwas, lhäy'e nilhokej aka wichi.”

₅Wet Lhawuk ifwenho Moisés wet yok:

–Fwenho Aarón, Is chik ipiyenpe letsut häp tewok lhayis, lhäy'e inät n'äyhäy tä inätes ihiche, lhäy'e lewomhay, häpkhilek päy'i lhayis tälhomche wet tapoyej Egipto.

₆Wet Aarón iwoye, ipiyenpe letsut häp inät lhayis tä ihi Egipto, wet päy'i lhayis tälhomche wet tapoyej honhat. ₇Matkat häp han'ältshantses tä iyej niyat häte lhamel yenlhi täjtso, hätet iwoye tä Moisés lhäy'e lechila iwoye, häte päy'i lhayis tälhe mago lhayis wet tapoyej Egipto.

₈Wet niyat t'äne Moisés lhäy'e Aarón wet ifwenho tä yok:

–Alhaye amel Awuk Dios, is chik itiyej kanhi päy'i lhayis. Wet owahnhitshila Israel lhayis yämthilek yikhen tä ilänhen itshätäy tä yen n'okhayajayej häp lham.

₉Moisés nichulho wet yok:

–Fwela n'oho chik lewatläk oy'alhyen ame Owuk, am lhäy'e aniyatfwas, lhäy'e aka wichi, wet päy'i lhayis yikhila hach'oyehen wet yikch'oye awukwey. Tajlhamhiyela iyhäj tä ihi tewok chik imälhehi.

₁₀Niyat yok:

–Alhyena n'oyek fwala.

Moisés nichulho wet yok:

–Is t'at, tatäyhla päy'i lhayis. Wet lew'enla olhamel Owuk Dios tä ihichet'a elh chik häte iwoye. ₁₁Tatäyhla päy'i lhayis tä ihiche awukwey lhäy'e aniyatfwas wukwey. Nemla ailhaklithen, lhäy'e aka wichi. Tajlhamhiyela iyhäj tä ihi tewok chik imälhehi.

₁₂Moisés lhäy'e Aarón yikch'oye niyat. Wet Moisés t'alhe Lhawuk chik itiyej kanhi päy'i lhayis tä lham ichene niyat. ₁₃Wet Lhawuk iwoye Moisés t'alhyaj, wet y'inhen päy'i lhayis tä ichechufwi wichi lewukwey, lhäy'e imälhewek Egipto. ₁₄Wet wichi ihutchewek päy'i lep'itseyhay, wet nilhokpe honhat tä lenij najut. ₁₅Matkat tä niyat hiw'en tä tafwaytshi lewit'äytso, nech'e hit'unhat lehusek wet iwohiyet'a Moisés lhäy'e Aarón lhämet, mälhyej tä Lhawuk pajche ifwenho Moisés.

₁₆Lhawuk tahuyej Moisés wet yok:

–Fwenho Aarón, Is chik itiphä letsut wet y'ajeji holo, häpkhilek welan yaphin'aya wet ihi imälhewek honhat tä Egipto.

₁₇Wet Aarón iwoye, itiphä letsut wet y'ajeji holo. Wet imälhewek holo tä ihi Egipto lhaiwelanhat yaphin'aya, wet wuj tä ilänhen wichi lhäy'e itshätäy. ₁₈Wet han'ältshantses fwetaj iten m'ak tä Aarón iwoye, mat lhamel ikalhihit'a. Wet yaphin'a wuj tä ilänhen wichi lhäy'e itshätäy. ₁₉Wet han'ältshantses yok:

–¡Dios t'at tä iwoye täja!

Matkat niyat hit'unhat lehusek wet tek t'uhläk iwoye Moisés lhäy'e Aarón lhämet, mälhyej tä Lhawuk pajche ifwenho Moisés.

₂₀Lhawuk ifwenho Moisés wet yok:

–Chik fwalak nech'e fwala niyat ihohiyela tewok. Tä mälhyejtso, nephälak kamaj honatsi i'pe honhat wet istejlä. Wet fwenhola, olak, “Hebreo lhayis Lewuk Dios yok, Ch'anlhaye oka wichi chik yikhen, yämthilek n'okwi n'oyej. ₂₁Tsi chik kawahnatshi, ochenla ame lakas tä wuj wet wesila atape, lhäy'e aniyatfwas, lhäy'e aka wichi. Tapohikwela awukwey lhäy'e nilhokej wichi lewukwey, wet ihla'pe imälhewek honhat. ₂₂Mat tek nichäthiyela oka wichi tä ihi honhat tä Gosén. Ihichet'ala tefwajni lakas chik ihi honhattso. Wet lew'enla tä olham ohäpe Dios tä matche wet oihi häp honhatna. ₂₃Ow'enhatla lhamej oka wichi, wet aka wichi w'enhahila lhamej. Täjtso owohiyelak fwala.”

₂₄Wet Lhawuk iwoye t'at täjtso. Näm lakas tä wuj, hätet iwoye pule tä näm, wet tiyäjo niyat lewukwe lhäy'e leniyatfwas lewukwey, wet ikänchi mälhewek honhat tä Egipto. ₂₅Tä mälhyejtso, niyat ne'tek õt'äne Moisés lhäy'e Aarón. Tä lhamel nichäte, wet niyat ifwenho tä yok:

–Mähen tä let'uhläk lelänhen itshätäy yämthilek lhen han'okhayajayej aka dios. Mat yej lhekch'oye Egipto.

₂₆Tä Moisés iläte, wet yok:

–Kha, isit'ak olhamel owoynejetso. Tsi itshätäy tä olhamel olänhen tä oyen n'okhayajayej olhamel Owuk Dios, häpe t'at itshätäy tä Egipto lheley yen t'amajcheta. Elat chik Egipto lheley hiw'en chik olhamel olänhen itshätäytso, ilänla n'oyejen tuntey. ₂₇Is chik olhamel ohoye t'at ts'anis, häp ow'ekyaj tä tres ifwalas. Wet lhip chik olhamel onchätho häpkhilek oihi chik olänhen itshätäy wet oyen n'okhayajayej olhamel Owuk Dios, mälhyej tä lham ne'tek olhamel owoye.

₂₈Niyat yok:

–Otch'anlhahla amehen chik lehoye ts'anis yämthilek lelänhen itshätäy wet lhen han'okhayajayej amel awuk dios. Mat woye olhämet, yej aletonitche tä lhekhen. Wet alhyenn'o.

₂₉Moisés nichulho wet yok:

–Chik olhamel oyik hach'oye, häpkhilek ot'alhe Owuk Dios, chik fwala is chik itiyej kanhi lakas tä wuj tä ailän, lhäy'e aniyatfwas, lhäy'e aka wichi. Mat is chik lhäm matche ämet wet nem lefwech'enwethä olhamel, wet äp nem len'äyej Israel lhayis chik yikhen yämthilek ilänhen itshätäy tä yen n'okhayajayej Lewuk Dios.

₃₀Wet tä Moisés yikch'oye niyat, t'alhe Lhawuk, ₃₁wet Lhawuk iwoye t'alhyaj. Tä mälhyejtso, lakas tä wuj yikch'oye niyat, lhäy'e leniyatfwas, lhäy'e laka wichi. ₃₂Matkat niyat yachajo tä hit'unhat lehusek, wet tek iwahintshi häp Israel lhayis.