Éx 9

₁Lhawuk tahuyej Moisés wet yok:

–Mäh hoye Egipto kaniyat wet fwenhola, olak, “Hebreo lhayis Lewuk Dios yok, Wahintshi oka wichi yämthilek n'okwi n'oyej. ₂Chik kawahnatshi wet kamaj letsoklhi, ₃ochätyenla'pe okhajyhayaj häp nilhokej aläy wet ihichela t'inhayaj tä wuj tä ni'isa. Y'inhihena yel'atas, asnolis, camellos, w'asetas, tson'atas lhäy'e kayla lhayis. ₄Mat tek oy'ajthiyela Israel lhayis läy, häpkhilek niwohit elh tefwajnik y'il. ₅Owohiyela täjtsok ifwala.”

₆Wet tä ifwala elh Lhawuk iwoye t'at. Wet nilhokej Egipto lheley läy y'inhen, mat häp Israel lhayis läy tek wo elh chik y'il. ₇Wet niyat ichen lakawos yämthilek iyahne Israel lhayis läy. Tä lhamel nichäte, hiw'en tä niwohit elh hätefwajni chik y'il. Matkat niyat hit'unhat lehusek wet tek iwahintshi Israel lhayis.

₈Wet Lhawuk ifwenho Moisés lhäy'e Aarón wet yok:

–Ch'awho mok'otaj tä ihi n'onhonthi, wet am, Moisés, tsäyphäla chik lhehi tä Egipto kaniyat tatache. ₉Mok'otajtso lhaiwelanthila lemoka wet yafwthi ichäjla'pe imälhewek honhat. Wet chik nitsäype wichi lhäy'e itshätäy tä ihi Egipto, amostas ilänhihena.

₁₀Wet Moisés lhäy'e Aarón tachuma mok'otaj tä ihi n'onhonthi wet ichäj tä ihoye niyat. Tä nichäte, Moisés itsäyphä wet wichi lhäy'e itshätäy amostas ilänhen. ₁₁Wet han'ältshantses ihanhiyejt'a iwoyneje chik fwetaj tatayhlä Moisés, tsi häte lhamel amostas ilänhen, tan'isej Egipto lheley iyhäj. ₁₂Matkat Lhawuk yäm t'un lehusek niyat wet iwohiyet'a Moisés lhäy'e Aarón lhämet, mälhyej tä pajche Lhawuk ifwenho Moisés.

₁₃Wet Lhawuk ifwenho Moisés wet yok:

–Nephälak nech'e fwala wet hoyela niyat. Wet fwenhola, olak, “Hebreo lhayis Lewuk Dios yok, Wahintshi oka wichi yämthilek n'okwi n'oyej. ₁₄Tsi athana ochenla ame nilhokej n'owit'äyhyajay wet ailänla, lhäy'e aniyatfwas, lhäy'e aka wichi, häpkhilek lehanej tä ihichet'a elh chik häte iwoye olham. ₁₅Chik opäynhin'aj ame okhajyhayaj wet otasnhin'aj amej n'owit'äyhyaj, lhäy'e aka wichi, chik mälhyejtso athana nemhit lheche. ₁₆Mat tek oailän häpkhilek lew'en t'at okhajyhayaj, yämthilek nilhokej wichi tä i'pe honhat nitäfwel n'oyej. ₁₇Mat tej tä lew'en tähestso, kamaj tek letach'anlhaye oka wichi wet tek lewahintshi tä yikhen. ₁₈Tä mälhyejtso, chik fwala, häp horana, otsäyhlahchä kalatu tä wuj, häp kalatu tä tek ihanej chik ihi Egipto, tälhe tä nech'e iche p'ante yäk nämena. ₁₉Tä mälhyejtso, tihi lew'et tä is häp aläy lhäy'e nilhokej m'ak tä lew'en tä i'alhoye. Tsi kalatu tä nämla ilänla nilhokej wichi lhäy'e itshätäy chik newachufwi hup.”

₂₀Iche Egipto kaniyat leniyatfwas iyhäj, tä iläte m'ak tä Moisés yäme, wet wuj tä nowayhen, wet ne'tek lakawos lhäy'e leläy ichufwi hup. ₂₁Mat iche iyhäj tä tek yenek matche, wet lhamel t'amajiyejt'a leläy.

₂₂Wet nech'e Lhawuk ifwenho Moisés wet yok:

–Piyen puleye atsut, wet kalatu nitsäyhla'pe wichi lhäy'e itshätäy tä ihi Egipto, lhäy'e yachuyaj tä ihiche n'olafwey.

₂₃Wet Moisés ipiyen puleye letsut, wet Lhawuk ichen pelhay tä t'ajanlhi, tet iwoye itäj tä taji honhat, wet wuj kalatu tä itsäype mälhewek honhat tä Egipto. ₂₄Wet ilehiyejt'a tä nitsäyhchä, häpe t'at kalatu tä ihanhiyejt'a chik mälhyejtso tälhe täjp'ante nech'e iche Egipto, lhäy'e lhip tä äytaji. ₂₅Wet nilhokej m'ayhay tä ihi honhat wasiche t'at, ilänhen wichi, itshätäy, lhäy'e yachuyaj tä ihiche n'olafwey, wet ichähen lhachal häp hal'äy. ₂₆Mat häp honhat tä Gosén tä Israel lhayis ihi, tek kalatu nichätho.

₂₇Wet niyat ne'tek õt'äne Moisés lhäy'e Aarón. Tä lhamel nichäte, wet ifwenho tä yok:

–Owoye t'at och'isukyaj, lhäy'e oka wichi, wet otes ihi. Mat amel Awuk Dios häp tä is alhoho. ₂₈Tä mälhyejtso, alhyen n'oye Awuk häpkhilek tatäy pelhay tä t'ajanlhi wet ileyej kalatu. Wet otch'anlhahla amehen chik lhekhen, nemla on'äy amejen.

₂₉Moisés nichulho wet yok:

–Chik oyikch'oye hupuyna, oneyhthiphäla otkweyey tä ot'alhe Owuk. Wet ilehiyeja tä nitsäyhchä kalatu lhäy'e tä t'ajanlhi, häpkhilek lehanej tä honhat Lewuk t'at häp lham. ₃₀Mat ohanej tä am lhäy'e aniyatfwas kamaj tek lenowayaye.

₃₁Tä häpe p'ante lewhäy tä cebada lhoy t'unhen wet lino iwo lhawoya, wet nilhokej lino tä ihiche n'olafwey lhäy'e cebada tatäy t'at. ₃₂Mat häp trigo lhäy'e centeno lewit'äy ihihit'a, tsi tälh tä tafwaytshi kalatu.

₃₃Tä Moisés ileyej tä yämhoplhi niyat, wet yikch'oye hupuy wet itiphä takweyey wet t'alhe Lhawuk. Wet yofwajkwet takasit kalatu wet ileyej tä iwomchä wet nemhit t'ajanlhi. ₃₄Matkat tä niyat hiw'en tä takasit kalatu lhäy'e tä nem t'ajanlhi, yachajo tä iwoye lech'isukyaj, hit'unhat lehusek, lham lhäy'e leniyatfwas. ₃₅Matche tä yäm t'un lehusek wet tek iwahintshi Israel lhayis, mälhyej tä Lhawuk pajche ifwenho Moisés wet ne'tek yäme.