Ezeq 10

₁Tä tajyäme täja, wet ow'enpa häp m'ak tä te iwoye pule, mat t'un wet w'awulhchä, i'pe lhethey m'ayhay tä lhafwis ihi. Wet ow'en tä iche m'ak tä i'pe puletso tä te iwoye n'oniyatyajw'et tä nichätche tunte tä ifwak'an tä isilataj. ₂Wet Lhawuk tahuyej häp hin'o tä taw'uyhi wesaj tä lino, wet yok:

–Is chik lehoho häp kaletaj käläy tä ichufwi m'ayhay tä lhafwis ihi, wet chuma fwiyhol tä lak'e, äm tapokwe akwech'ol wet tsäype Jerusalén.

Wet olham ow'enej hin'otso tä iwoye, y'uye häp fwiyhol. ₃Häp lewhäytso wet m'ayhay tä lhafwis ihi tumej Lhawuk Lewukwe lhip tä tumej tä tapinhiye. Wet pule tapoyej Lhawuk Lewukwe ka'alho tä lech'oye. ₄Wet Lhawuk lewujyaj tä isi yikch'oye tä i'pe m'ayhay tä lhafwis ihi wet tataye Lhawuk Lewukwe pe. Wet pule nech'e tapoyej häp Lhawuk Lewukwe, wet Lhawuk lesilatyaj tapoyej Lewukwe ka'alho. ₅Wet m'ayhay tä lhafwis ihi, lhafwis lepakas tä pitsaje y'aj alhoye, tet iwoye Dios tä lajit letumfwaya chik yämlhi, lepak äytaji.

₆Häp tä mälhyejtso tä Lhawuk isukunej hin'o tä taw'uyhi wesaj tä lino chik tachuma häp fwiyhol tä ihi kaletaj käläy lechowej tä ichufwi m'ayhay tä lhafwis ihi. Wet hin'otso tiyäjo wet takasitwhäye häp kaletaj käläy elh. _7-8Wet ow'en häp m'ak tä ichufwi m'ayhay tä lhafwis ihi, tet iwoye n'otkwey. Wet elh m'ayhay tä lhafwis ihi ipiyne takwey häp fwiyhol tä ihi lhamel lechowej, wet tachuma iyhäjfwas wet itihi hin'o tä lew'uy wesaj tä lino takwech'o. Wet häpet tä ikatej tä õhw'enho, wet yik.

₉Wet ow'enpa cuatro kaletaj käläy tä iyej häp m'ayhay tä lhafwis ihi. Elh tefwajpejni kaletaj kälä iyejpej tefwaji m'ak tä lhafwis ihi. Wet kaletaj käläytso isiche, tet iwoye tunte tä ika'tu tä isilataj. ₁₀Wet matche tä nichät lhamchehen, wet elh tefwaji m'ak tä n'äle lech'oye tet häp chik äp elh kaletaj kälä. ₁₁Wet tä yikhen häp m'ayhay tä lhafwis ihi, elhpej tatache t'at tä inukwe wet tek itilhakche len'äyij. ₁₂T'isan, lewhol, takwech'ol, lhafwis lhäy'e kaletaj käläy, wujpey tatelhoy tä ihi. ₁₃Wet oläte kaletaj käläytso tä õ'tiyej lhey tä kaletaj. ₁₄Wet häp m'ayhay tä lhafwis ihitso, elh tefwaji lhetek hiw'en cuatro tate'pelis. Tate'pe tä ichun häpe w'asetaj tate'pe, wet elh häpe hin'o tate'pe, wet äp elh häpe t'owalhaj tate'pe, wet äp elh häpe afwenche tä iyhäjkottaj tate'pe.

₁₅Häp m'ayhay tä lhafwis ihina häpe t'at täjte ow'en tä oihi tewok tä lhey Kebar.

Wet lhamel nechephä ₁₆wet yikhen, wet kaletaj käläy yikche t'at lhamel. Wet tä lhamel ineyhatchephä lhafwis tä nechephä tä tälh honhate, wet kaletaj käläy kamaj yikche t'at lhamel, istakhiyejt'a. ₁₇Wet tä takasthen, wet kaletaj käläy äpte takasthen. Wet tä wey'äkwephä, wet kaletaj käläy äpte yikche t'at. Tsi lew'atshancheyaj kamaj häpe t'at m'ayhayna lew'atshancheyaj.

₁₈Wet Lhawuk lewujyaj tä isi yikch'oyepa tä i'pe Lhawuk Lewukwe pe, wet nech'e äp iho'pe m'ayhay tä lhafwis ihi. ₁₉Wet tä lhamel ineyhatchephä lhafwis tä nechephä tä tälh honhate, wet ow'en tä kaletaj käläy äpte nechephä t'at, istakhiyejt'a lhamel. Wet nech'e lhamel takasthen tä ihi tä Lhawuk Lewukwe pe tä tumejlä tä ifwala tälhche, wet Israel lhayis laka Dios lewujyaj tä isi i'pe lhamel.

₂₀Häp m'ayhay tä lhafwis ihitso kamaj häpe t'at täjte ow'en tä ichufwi häp Israel lhayis laka Dios tä oihtewhäye tewok tä lhey Kebar. Nech'e tä ontäfwelej tä häpe p'ante lhameltso. ₂₁Elh tefwaji lhetek hiw'en cuatro tate'pelis, wet cuatro lhafwis tä hiw'en, wet tä ichufwi lhafwis tet iwoye häp n'otkwey tä ow'en. ₂₂Tate'pelis tä ow'en häpe t'at tate'peliste ow'en tä oihi tewok tä lhey Kebar. Tä elh tefwajpejni yik, tha tatache t'at lhip tä tatache.