Ezeq 13

₁Lhawuk tahuy n'oyej wet yok:

₂–Hin'o, en ämeta olhämet tä letatayhlä häp Israel lhayis laka profetas tä iwoye lhämtes tä tälho lhamel letichunhayajay. Is chik lhok, “Ch'ahuyaye häp Lhawuk Dios lhämet tä yok, ₃Lewit'äyhyaj ihihila häp profetas tä nhana honhatejen. Lhamel ihänlhit lhamel lenech'ethayajay wet mathichet'ak lew'enhay ihi. ₄Israel lhayis, amel aka profetas hätet iwoye häp m'awo lhayis tä yen lew'eta hup lhipey tä ikatsi. ₅Wet niwohit m'ak chik lhamel yenlhi amhohen häpkhilek amel aisej wet atkhajayhen chik näm n'oka'tshayaj chik nichäte ifwala tä olham oka ifwala tä oti amejen okalelhthayaj. ₆Lhamel lew'enhay häpkhit'a m'ak tä matche, wet äp lhämtes tä iwoye tä yäme m'ak tä ihichela w'et lhämtes t'at. Lhamel yäme tä olham tä tälh n'oye häp lhamel lhämtes tä iwoye, mat olhamhit'ak ochen lhamel. ¡W'et lhamel iniwhitlä chik lhaimatitche lhämtes tä iwoye! ₇Lhamel lew'enhay tä ifwel amhohen häpe m'ak tä kamatachehen, wet äp lhämtes tä iwoye tä yäme m'ak tä ihichela, w'et lhämtes t'at. Lhamel yäme tä olham tä tälh n'oye häp lhamel lhämtes tä iwoye, mat olham niwohit m'ak chik ofwenho lhamel.

₈“Wet häp tä tetso, olham tä Olewuk Dios ofwenho lhamel olhämetna, oyok, Tä amel lhen ämeta m'ak tä kamatache wet lhämejwethä haw'enhay tä kamatachehen, häp tä tamenej tä olham tä ohäpe Awuk Dios ofwel amhohen olhämet tä matche, oyok, Ottay ahilähen. ₉Oneyhthiphäla otkwey wet otasnhila häp profetas tä lew'enhay häpe m'ak tä kamatache wet äp lhämtes tä iwoye tä yäme m'ak tä ihichela w'et lhämtes t'at. Wet häp tä tamenej tä oyok, Nemla ihoye oka wichi Israel lhayis chik lhaihutejwek m'ak tä iwo chowhala'pe, wet nemla lhey ihi lehi tä Israel lhayis lheyis ihi, wet nemla yäpnho honhat tä Israel. Wet häp tä nech'e amel lehanhiyeja tä olham tä ohäpe Awuk Dios.

₁₀“Matche, lhamel ikanej oka wichi wet yok, Aisen t'at, atamsekis ihi t'at. Wet ni'isahen t'at, lajit letamseka oka wichi. Hätet iwoye chik hin'o yenlhi häp hup chik nit'amajayej wet ilänej cal. ₁₁Ezequiel, lhek fwenho profetas tä ipelnhatej cal häp hup tä nichätla kanhi häp lhamel lhenekna. Nämla pelhay wet wujla inät, iläfwenhichehena, wet ochenla kalatu, hätehlat iwoye tuntey chik wesilahchä, wet lhäy'e häp leyalh tä lhäy'e lhip tä äytaji. ₁₂Wet hup nichätla katsi wet wichi yohlak, ¿Cho cal tä õ'länej naji?

₁₃“Wet häp tä tamenej tä olham tä ohäpe amel Awuk Dios oyok, Owasthiyejila häp owäkw, ochenla leyalh tä äytaji. Wet tä matche tä owäkw ihi, wet äp ochenla pelhay tä wuj, inät lhäy'e kalatu, hätehlat iwoye tuntey chik wesilahchä, häpkhilek owäkw ihämit nilhokej. ₁₄Othatla katsi häp hup tä amel lepelnhat naji. Nichätlat katsi wet lefwetes n'änhilatpe, wet amel hap'itseyhay lhahiyeja t'at hup lhipey chik wasi tä nichät katsi. Wet nech'e häp tä amel lehanhiyeja tä olham tä ohäpe Awuk Dios. ₁₅Owasthiyejila owäkw häp hup wet oyämla nofw häp profetas tä ipelnhat naji. Wet oyohlak, Matche tä wasi häp pared, niwohit lhip chik imälhehi, wet profetas tä ipelnhat naji äpte tan'isej, nofwej. ₁₆Tsi Israel lhayis laka profetastso w'et yäm'atwethä tä fwetaj lew'enhay ihiche, wet lhamel yäme häp Jerusalén tä is t'at, letamsek ihipa. Mat isit'a Jerusalén, lajit letamseka. Olham tä ohäpe Lewuk Dios olhämet täja.”

_17-18–Wet am, hin'o, tetshan häp profeta'tsinhay tä Israel lhayis tä iwoye lhämtes tä tälho lhamel letichunhayajay. En ämeta olham olhämet tä ohäpe Lewuk Dios tä otiyej lhamel tä oyok, “¡Awit'äyhyaj ihihila häp amel tä lechowalh iyhäj lehusey! Tsi lhenchelhi häp wile lhipey tä lhen hiyawul takwet'akaya, wet häp tä nilhokej wichi tä yen takwet'akaya. Wet äpte lhenchelhi häp wile tä isilataj tä isänhän lhipey tä lhenay n'olhetekp'otesa. Amel lefwetaj hiyawu lechumyaj tä lewoyaye ichesthihena oka wichi wok ilänhihena, tsi let'uhläk lhamel atische. ₁₉Matche tä leläkwlhin'o tä oiyej oka wichi, häp tä let'uhläk lekalhi cebada lhiphaj tä w'awulhej akwech'o lhelefwaj, lhäy'e häp pan lhiphaj. Lelänhen wichi tä nit'uhawetayej chik y'inhen, wet lemälhthi wichi tä t'uhawetej chik y'inhen. Lekanej oka wichi, häp tä t'ekhache ämtes tä lewoyeje.

₂₀“Wet häp tä tamenej tä olham tä ohäpe Awuk Dios ottayhlä häp hiyawul takwet'akay tä amel lhenchelhi tä lhen lechayayej wichi häpkhilek lesakanej lhamel wet letech'aynayej t'at häp afwenchey tä õyen. Olham ofwayhthiyeja lhamel häp m'ak tä amel lewoyeje, wet nemla t'akay ihiche. ₂₁Osohiyeja wile lhipey tä lhenay n'olhetekp'otesa wet ofwayhthiyeja oka wichi häp m'ak tä amel lewoyeje, wet nemhit yachajohla chik lesakanej lhamel. Wet nech'e amel lehanhiyeja tä olham tä ohäpe Awuk Dios.

₂₂“Amel lestunejwethä ämtes tä kamatachehen häp wichi tä lechowhal ihiche tä olham n'am humin chik ostunwethä. Wet amel letach'anlhaye wichi tä ni'isahen häpkhilek tujlhache lakeyis tä iwoye wet lajit lefwayhyaja. ₂₃Wet häp tä tamenej tä nits'ilakhiyat chik lew'enayhla häp haw'enhay tä kamatachehen, wet äpte nemhit lefwetajla lhen ämeta m'ayhay tä ihichela. Olham ofwayhthiyeja oka wichi häp m'ak tä amel lewoyeje, wet nech'e häp tä lehanhiyeja tä ohäpe Awuk Dios.”