Ezeq 16

₁Lhawuk tahuy n'oyej wet yok:

₂–Hin'o, is chik lefwenho Jerusalén häp lech'isukyajay tä matche tä ni'isa tä iwoye. ₃Olham tä ohäpe Lewuk Dios fwenho olhämet tä oyok, “Jerusalén, häp honhat tä lechäthihchä häpe Canaán, häp tä haw'ette. Wet ajcha häpe Amorreo wet ako häpe Het lhayis ka'tsinha. ₄Häp ifwala tä nech'e lheche, niwohiyat täjche yiset hats'ak wet niwohiyat täjche ailejejche inät häpkhilek nofw hach'ohle tä i'amche. Wet õy'ilenhit'a amche nisoy lhäy'e tä õ'käfwnhit'a amej wile. ₅Ihichet'a elh chik iwoyej ame tähestso, aip'altsenhit'a. Häp ifwala tä nech'e lheche, õ'aithat alhoye, häp tä õ'näfwtse ame.

₆“Wet olham onekchehte lhip tä lhehi, wet oaiw'en tä let'äslhafwajphä t'at tä haw'oyis i'amche. Wet oyok, Is chik n'ila. ₇Wet oaichihelit, atet iwoye elh hal'äy tä tälhpe honhat, pajtha athaläkw wet aisilataj. Wet nech'e aatey ihi wet nech'e äp tälh apusey, mat imälhewek tä ats'ilak chik lajit haw'uya.

₈“Wet nech'e äp yachajohte tä onekche lhip tä lhehi, wet oaiw'en tä nech'e letajo t'at haw'et tä athaläkw. Wet häp tä otchuma ow'uy wet och'en atape tä ats'ilakche, wet nech'e ofwel amho olhämet tä oayenla lhäseya wet Awuk'atn'o. Olham tä ohäpe Awuk Dios olhämet täja.

₉“Oainayyente, olej haw'oyis tä i'amche wet oy'ilen amche m'ak tä lenij akäjche. ₁₀Wet ow'uyyen amhi wesaj tä lechal isis, wet oay'äsaynhi anisähes tä tsänt'äj tä isilataj. Wet ow'en amho akawak tä õyenejlhi lino lhäy'e häp akay'uche tä isilataj. ₁₁Osilatyente amej häp m'ayhay tä isis, wet oy'uyitchehente akweyey häp n'otkwet'akay, wet lhäy'e häp amsilis tä othatejte haw'o. ₁₂Wet otihihte anhus häp n'onhus lhele, wet otihihte hach'otey häp n'otch'ote lheley, wet oti'pe etek häp lep'ot tä isilataj tä oayene niyat tsinha. ₁₃Wet mälhyejtetso tä ow'uyyen amhi oro lhäy'e plata, wet haw'uyis häpe wesas tä lino tä isis, wet lhäy'e häp wesaj tä lechal isis. Wet letufw pan tä õyenejlhi harina tä matche tä is, wet lhäy'e akäyek, wet lhäy'e häp aceite tä tälhe olivo. Wet nech'e ahäpe t'at niyat tsinha tä isilataj. ₁₄Wet õyen atoyaja asilatyaj pajtha nichäte iyhäj wichi tä i'pe honhat, tsi olham t'at tä oaisilatyen. Olham tä ohäpe Awuk Dios olhämet täja.

₁₅“Wet tä lew'en tä atoyaj iyeji asilatyaj tä i'amej, wet nech'e lewo akeya, lehänlhi acheyälis, atet iwoye atsinha tä kain'oye tä yachaje t'isan elh chik häpe chik nekche lhip tä ihi. ₁₆Wet haw'uyis tä lechal isis tä ow'en amho, leti'pe tachenhas, lhen awukweya häpkhilek lhechufwi tä len'okwiyej acheyälis tä häp tä lewo akeyayej. ₁₇Wet letachuma m'ayhay tä isis tä oro lhäy'e plata tä olham tä oyente awayhata, wet lhenchelhi, lhene hin'ol tä lewo akeyayej lepeykas. ₁₈Wet lew'uyyenhiche haw'uyis tä lechal isis, wet lhen t'awayhata häp aceite lhäy'e incienso tä olham ow'ente amho. ₁₉Wet pan tä olham tä ow'ente amho tä õyenejlhi harina tä matche tä is, lhäy'e häp aceite, lhäy'e akäyek, tä olham tä ochunhante amej, wet häp tä lhachaje acheyälistso wet häpe t'awayhat tä lenij akäjche. Olham tä ohäpe Awuk Dios oyok, Häp tä tetso m'ak tä lewoye.

₂₀“Wet äpte letachuma ales tä ihi n'ohlä, wet lelänhen wet lhachaje acheyälis, wet häp tä lhen lhamel lhäka. ¿Hä lefwetaj ni'äytajache tä aletech'aynej atsinha tä kain'oye, ₂₁lhäy'e tä äp lelänhen oles wet lep'ohen wet lhen han'okhayajayej acheyälistso? ₂₂Wet tä lewoye akey tä matche tä ni'isa tä atet iwoye atsinha tä lakain'oyaj ihi, wet katichunache täjte nech'e lheche tä ats'ilakche, let'äslhafwajphä t'at tä haw'oyis i'amche.

₂₃“Häp täja olhämet tä ohäpe Awuk Dios, oyok, Awit'äy ihi tsi wuj m'ak tä ni'isa tä lewoye. ₂₄Wet let'isej tä lhenlhi amho han'okhayajw'etes tä letihiche nilhokej lhipey tä ischephä häpkhilek len'okwiyej acheyälis. ₂₅Wet äpte letihiche nilhokej n'äyhätetsel han'okhayajw'etestso, wet asilatyaj tä i'amej häp tä tamenej tä atet iwoye kain'oyaj länek. Wet tä lewoye akey tä matche tä ni'isa, wet alhachaje elh at chik häpe tä nekche tä lhehi, wet tek let'elej tä lewo akeya. ₂₆Wet lewo akeyayej Egipto lheley, häp wichi tä laka honhat i'awhäye tä hich'atej tä lakeyis ihi. Wet häp tä tamenej tä owäkw ihi tä kawoya pesa häp akey tä lewoye.

₂₇“Wet oneyhatphähte otkwey tä oaitasin, wet oy'ayhthohte aka honhat tä tsajo. Wet oyachajte ame Filisteo lhayis, häp wichi tä n'äyi amho, wet lhamel n'äfwelhpe häp akeyis tä ni'isa tä lewoye.

₂₈“Mat kamaj chik lemälhteji akeyistso, häp tä tamenej tä alhachaje Asirio lhayis. Mat tej tä tetso, tha kamaj chik leyi nofwi akey tä lewoye. ₂₉Wet tä letujlhache akeyistso, wet alhachaje häp Babilonia lheley, wichi tä ifwelwethä lakhäy. Mat tej tä tetso, tha kamaj chik leyi nofwi akey tä lewoye.

₃₀“Olham tä ohäpe Awuk Dios olhämet täja tä oyok, Ahusek t'inhayaj t'at, häp tä wuj tä lewo akeya. ₃₁Lhenlhi han'okhayajw'etes tä letihiche nilhokej n'äyhätetsel, lhäy'e tä äp letihiche nilhokej lhipey tä ischephä, häpkhilek len'okwiyej acheyälis. Mat tej tä atet iwoye atsinha tä kain'oye, tha let'alhit'a'pe akey tä lewoye.

₃₂“Atet iwoye atsinha tä nemhit ihumin lech'efwa wet äp iwo keyayej hin'ol iyhäj. ₃₃Häp atsinha tä kain'oye iche m'ak tä ikalhihlä lakey tä iwoye. Mat am, wet am t'at tä letische häp wichi tä letiyejen akey, tsi häp tä let'uhläk lhamel iho ame tä tälhe lhip chik häpe häpkhilek lewo akeyayej. ₃₄Matche tä atehit'a iwoye atsinhay iyhäj tä iwo lakain'oyaja, tsi nech'e äp am t'at tä let'ukwe häp wichi wet lhamenhit'ak t'u amche. Wet lhamel aknitisiyatpe häp akey tä lewoyeje, mat tajlhamat am tä letische'pe m'ak tä lewoyeje. Häp täja m'ak tä tamenej tä oyok, matche tä akey tehit'a iwoye häp atsinhay iyhäj tä iwo lakain'oyaja.

₃₅“Wet oyok, Key länek, ch'ahuye olhämet tä oyok, ₃₆Olham ohäpe Awuk Dios. Am atet iwoye atsinha tä kain'oye tä lajit len'äfwlhiyayej tä lhailikyenche'pe lakain'oyaj tä itiyej häp hin'ol tä ihumnhen tä itiyej lakey. Wet äp alhachaje nilhokej acheyälis tä hich'atej tä ni'isahen, wet tä len'okwiyej lhamel, häp tä lelänhen ales wet lhen t'awayhata lew'oyis. ₃₇Wet häp tä tamenej tä oyok, Ohutlawek nilhokej wichi tä pitaj lewhäy tä lekäjyenlhi amej, wok oyok, lhamel tä lehumnhen lhäy'e iyhäj tä len'äyihomche. Ohutlawek wet otihla amhi lhamel lechowej, wet chik lhehihila tä lhamel tatey tatache, wet häp tä nech'e oailikyenhichela. Wet häp tä nech'e lhamel mathichela tä hiw'enla'pe häp asan tä laj haw'uya'pe. ₃₈Wet oaikalelhthiyeja akey lhäy'e tä ahäpe anikoy. Oti amej owäkw tsi otiyej ot'ischenyaj häp wichi tä lewo akeyayej, wet nech'e häp tä let'inla t'at. ₃₉Wet oyachajila ame lhamel tä ahumnhay, häpkhilek iwasthiche han'okhayajw'etes tä len'okwiyej acheyälis. Ilanhichela haw'uyis tä letaw'uyhiche, wet isohla amej amsilis lhäy'e nilhokej iyhäj häp m'ayhay tä isis tä laha ihi, wet ailikyenhichela häpkhilek ats'ilakche t'at.

₄₀“Wet lhamel isukunhila amej wichi tä wuj häpkhilek tatay ahilä, wet lhamel ithathilhila amej tuntey, wet lhäy'e häp lefwajnhates tä iwohla ipeya. ₄₁Iwunhihomchela awukwey wet hiw'enla amho awit'äyhyaj chik lhehi tä atsinhay tä wujpey tatache. Owohla pesa akey tä lewoye, wet nemhit yachajohla chik letispe häp wichi tä ahumnhay akey tä lewoyeje. ₄₂Wet häp tä nech'e oyenlat nayaya owäkw tä oti amej, lhäy'e ot'ischenyaj tä onchuwet ame'pe, wet nech'e otamsek ihihilat ahilä, wet nemhit onchuwethilhila. ₄₃Wet tä katichunache häp ifwalas tä ahan'äfwaj, mat tajlhama tä lewäkwyhayen n'oyej akeyis tä hich'atej tä ni'isa lhäy'e tä kok'aye, wet te olham oaitasnhila'pe akeyis tä lewoye. Olham tä ohäpe Awuk Dios olhämet täja.

₄₄“Jerusalén, nilhokej wichi tä ihumin tä näma pites lhämtes tä iwoye, lhamel yämhilhila amej wet yohlak, Hek chik w'et hiw'enhat lako, iten lako key. ₄₅Tsi ako häpe atsinha tä n'äyiho lech'efwa lhäy'e leles, wet atsinhay tä achita lhäy'e hach'inhä häpe atsinhay tä n'äyihomche lech'efwas lhäy'e leles. Wet amel ako häpe atsinha tä Het lhayis ka'tsinha, wet amel ajcha häp tä Amorreo.

₄₆“Häp achita hupuy tä Samaria tä tumej tä tafwojyhiye, wet leles tsinhay häpe hupuy tä niwusa tä iwhäye. Wet hach'inhä hupuy tä Sodoma tä tumej tä tapinhiye, wet leles tsinhay häpe hupuy tä niwusa tä iwhäye. ₄₇Wet letenche lakeyis tä ni'isa tä iwoyehte, mat ch'athiyejt'a lhamel lakeyis. Mat am häp tä hich'atej, nipajiyahit chik leyi nofwi akeyis tä lewoye.

₄₈“Olham tä ohäpe Awuk Dios tä n'ilataj, olhämet tä matche oyok, Häp hach'inhä Sodoma lhäy'e leles tsinhay matche tä iwo lech'isukyajahte, lhäy'e häp leles tsinhay, mat tehit'a iwoye hach'isukyajay tä lewoye. Mat häp am lhäy'e ales tsinhay häp tä matche tä hich'atej. ₄₉Häp täja lech'isukyaj tä iwoyehte häp hach'inhä Sodoma. Lham lhäy'e leles tsinhay matche tä lhamel lhaichäjejwethä häp lhäk tä wuj tä hiw'en, wet matche tä lakäjyaj iyeji tä niwoya m'ak chik iwatlä. Wet letamsekis ihiche t'at, mat hip'altsenhit'a häp wichi tä p'elitses wet tek tach'ote iyhäj tä iwatlä m'ak. ₅₀Tä lhamel lhaichäjwethä wet iwoye lakeyis tä olham oy'ulhan, häp tä tamenej tä otäyhat, tet iwoye häp m'ak tä am lew'en tä owasthihte.

₅₁“Wet Samaria lech'isukyaj nits'ilakhiyat chik lechowej häp hach'isukyaj tä am lewoye. Am häp tä matche tä hich'atej tä ni'isa akey tä lewoye, wet achita lhäy'e hach'inhä tä mälhyej chik nich'atayej lakey wet tet häp chik is lhamel. ₅₂Tä tetso m'ak tä lewoye, leteläythiyeja han'äfwlhi. Tsi hich'atej tä ni'isa akey tä lewoye, inu'pe lhamel lakey, tä mälhyej chik nich'atayej lhamel wet tet häp chik is. Wet häp tä tetso, is chik len'äfwelh tä hich'atej tä wuj tä lewoye akey tä ni'isa, wichi nemhit iwo ahaya. Lew'en achita lhäy'e hach'inhä tä tej tä ni'isa m'ak tä iwoye, tet häp chik is m'ak tä iwoye.

₅₃“Wet olham op'altsenhihena Sodoma lhäy'e Samaria, lhäy'e häp hupuy tä niwusa tä ihi lhamel, häpkhilek yachajo tä t'aytshi tä hiw'en m'ak lhäy'e wichi. Wet am, Jerusalén, äpte oaip'altsenla häpkhilek yachajo tä t'aytshi m'ak tä lew'en lhäy'e wichi. ₅₄Wet is chik len'äfwelh, tichunche m'ak tä ni'isa tä lewoye, wet häp tä lekäjyenhilhila häp lhamel. ₅₅Wet Sodoma lhäy'e Samaria, wet lhäy'e häp hupuy tä niwusa tä iwhäye lhamel, yachajohla chik tet iwoye häp täjte nech'e wak'alhen tä õyenchelhi. Wet am lhäy'e häp hupuy tä niwusa tä i'awhäye äpte atehlat iwoye häp täjte nech'e õ'ayenlhi.

₅₆“Alechäjlhihte wet leläkwlhihte hach'inhä Sodoma tä otasin, ₅₇tsi häp tä kamaj tek n'älte'pe häp akeyis tä ni'isahen. Mat athana wet Edom lheley lhäy'e häp Filisteo lhayis, wet lhäy'e nilhokej häp wichi tä laka honhates i'awhäye, nech'e lhamel n'äyi amho. ₅₈Athana wet iwohiyet'ak kateläytayej otasnhayaj tä oaitasinpe häp akeyis tä ni'isa lhäy'e tä kok'aye. Olham tä ohäpe Awuk Dios olhämet täja.

₅₉“Olhämet täja tä ohäpe Awuk Dios, oyok, Owohiyeja ame häp m'ak tä tet iwoye tä am lewoye, häp tä lenäk'äs ämette lewoyej n'oye wet nemhit lhen n'oye aka Dios. ₆₀Mat häp olham wet tek op'ethatlä olhämette owoyej ame tä kamaj ahan'äfwaj. Wet olhämet elh tä oyachajohlak owoyej ame häp tä lajit lepesa. ₆₁Ow'enla amho achita lhäy'e häp hach'inhä, wet otech'aynhiyeja t'at chik ales tsinhay. Mat khit'a olhämette owoyej ame chik tamenej tä ow'enla amho lhamel. Wet nech'e letichunhichela häp m'ak tä ni'isapmhaji tä lewoye wet wujla häp han'äfwlhi tä i'amej. ₆₂Wet olham onech'aynhihila olhämet tä owoyej ame, häpkhilek lehanej tä ohäpe Awuk Dios. ₆₃Otäyhthila amej ates. Wet chik letichunche nilhokej m'ak tä ni'isapmhaji tä lewoye, wujla han'äfwlhi tä i'amej wet nemla lhen ämeta häp akeyistso. Olham tä ohäpe Awuk Dios olhämet täja.”