Ezeq 19

₂“Ako häpe p'ante t'owalhaj tsinha

tä iyej iyhäj häp t'owalhas.

Imähi t'at leles lechowej,

häp tä ichihelit leles.

₃Tefwaji elh tä matche tä ichihelit,

pajtha matche tä thaläkw.

Nech'e lhaichufwenej tä ichowalhch'oye häp lhäk,

wet tufwen wichi.

₄Wet tä wichi tä i'pe honhat ilätch'oye,

wet lhamel yenlhi chowej wet nichätche.

Wet tä lhamel yäyit,

ihäne lechinhas tä tachofwnhomche

wet lhamel iton pajtha nichäte honhat tä Egipto.

₅Wet tä t'owalhaj tsinha tä lako

hiw'en tä tatäy tä fwetaj iwohiyela

m'ak chik lham tä ihuminche,

nemhit ihichela m'ak chik iwohiyela,

wet tachuma elh häp leles wet ichihelit,

wet yokwet tajo lew'et tä thaläkw.

₆Wet nech'e häpe t'at häp t'owalhaj,

wet yik tä ihänlhi t'at iyhäj t'owalhas.

Lhaichufwenej tä ichowalhch'oye häp lhäk,

wet tufwen wichi.

₇Iwasthiche hupuy tä takhajayhen

wet ikänchi honhat lhipey

tä nitäkwpej hupuy tä ihiche.

Tä wichi iläte lepak tä tanhätin,

lhamel tachetteyejchehen lenowayhyaj.

₈Wet nech'e lhamel lhaikhajyen tä tatayhlä

tä tälhe honhates tä iwhäye.

Lhamel hich'enhiche laka hotanhas

tä ithatpe wet isakanej.

₉Lhamel tachuma lechinhas tä tatsufwhomche,

wet ihichäjeje wet ithatho lehi.

Wet ihäne häp Babilonia laka rey

wet häp tä lhamel ithatho n'op'onthi,

häpkhilek nemhit yachajo chik õ'läte

chik tanhätin tä i'pe tachenhas tä ihi Israel.

₁₀“Ako hätet iwoye uva lhile

tä otihchä tä iwhäye inätw'et.

Wujpey häp lhachal wet wuj lhay tä iwoye,

häp tä wuj inät tä iyej letes.

₁₁Matche tä takhajayhen lhachal,

häp tä õyenejchelhi reyes letsutes

tä letetnekej lhamel len'ohyaj.

Matche t'at tä lhaichihelit,

wet pajtha nichäte pule lhayis.

Wet matche tä n'äle tsi häp tä atojphä,

lhäy'e häp lhachal tä matche tä wujpey.

₁₂Mat tä õ'tiyej n'owäkw,

wet õ'tonhi tä tälho honhat wet õ'that at katsi.

Wet näm leyalh tä tälhche tä ifwala tälhche

wet tamchäy lew'oley wet lhay wes'atchä.

Wet tä nilhokej lhachal tä wusche tamchäy,

häp tä õ'thathot itäj.

₁₃Wet nech'e ihi honhat tä ts'anis tä õ'tihchä,

häp honhat tä tatshäjäy, matche tä tamchäy.

₁₄Itäj tä tälho lhachal ihämit tä hip'ohen

letälhes tä nech'e iwoye lhäy'e lhay.

Niwohiyat lhacha tä wujche chik imälhehi

häpkhilek õyenejlhi rey letsut tä letetnekej len'ohyaj.”