2Wet tä oläte n'opaktso, Dios laka Espíritu tiyäj n'oho wet ineyhatphän'o. 3Wet tä tahuy n'oyej, yok:
–Hin'o, olham ochen ame häp Israel lhayis, häp wichi tä nemhit iwoye olhämet. Lhamel lhäy'e lajchalis mhaji tatay n'ohlä, wet pajtha nämena tä yen tayhfwayan'o. 4Wet olham ochen ame lhamel tä lechowhal t'unhen lhäy'e tä lhethey t'unhen, wet fwenho olhämet. Lhohlak, “Lhawuk Dios lhämet tä t'uhläk ofwel amhohen.”
5“Etp'i lhamel tach'ahuhila ame, wok nitch'ahuya ame p'iya tä häpe t'at wichi tä tatay n'ohlä. Mat lhamel nitäfwenhiyeja t'at tä profeta tä iyej lhamel.
6“Hin'o, yej nowaye lhamel lhäy'e lhämtes chik ni'isa tä iwoyej ame. Yej nuhat amho, tej chik hätet iwoye ch'uthanil chik lhehi lhamel lechowej, wok hätet iwoye chitsom lhayis. Tej chik lhain'älit tä fwitses, yej nuhat amho wet yej nowaye lhämtes. Yej tetshan tsi häpe wichi tä ni'isahen. 7Is chik lefwenho t'at häp olhämtes tä ot'uhläk lefwenho lhamel, chik tach'ahuye wok tej chik nitch'ahuyaye thayej, tsi lhamel häpe wichi tä tatay n'ohlä. 8Wet am, äm matche tä letach'ahuye häp m'ak tä ofwel amho. Yej ten lhamel tä tatay n'ohlä. Huwa, ch'enhi hak'aj, tufw häp m'ak tä ow'en amho.”
9Wet ow'en häp n'otkwey tä õ'piyen n'oye tä ichäjlhi häp papel tä n'olesaynekhi tä õ'käfwelche.10Wet n'otkwey iwachuhatche papel wet ow'en tä n'olesaynhay ihi, wet lhip elh äpte n'olesaynhay ihi, tä yäme n'olhafwyhayajay lhäy'e n'owit'äyhyajay tä nämla.
