Ezeq 20

₁Häp nekchäm tä siete tä olhamel oihi Babilonia tä häpe honhat tä ka'ow'eta, wet iwel'a cinco, wet ifwala tä diez, nämhen hin'ol tä thänhäy tä tälhe Israel lhayis, tä lhamel tay'ätshaneje Lhawuk häp m'ak tä nhanayej. Lhamel tatachephä tä ihi t'at tä ottache. ₂Wet Lhawuk tahuy n'oyej wet yok:

₃–Hin'o, is chik lhämhoplhi häp hin'ol tä thänhäyna tä tälhe Israel lhayis. Fwenho lhamel olhämet tä oyok, “Olham ohäpe Awuk Dios. ¿Hä lenämhen häpkhilek letay'ätshan n'oye? Tä olham ohäpe Dios tä n'ilataj, matche olhämet tä isit'a tä letay'ätshan n'oye.”

₄“Hin'o, is chik letiyej akalelhthayaj lhamel. Fwenho lhamel tä lechätilis iwoyehte m'ayhay tä hich'atej tä ni'isa. ₅Fwenho olhämet tä oyok, Olham ohäpe Awuk Dios. Häp ifwalahte ottshupiye Israel lhayis tä oyen oka wichiya, wet otiphä otkwey tä owoyeje lhamel olhämet tä akalelhäj tä matche, wet olhaipäynehte lhamel tä ihi Egipto. Otiphähte otkwey wet ofwenho lhamel, oyok, Olham ohäpe Awuk Dios.

₆“Häp ifwalatso ofwenhohte lhamel tä otonhiphäla tä lhamel ihi Egipto, wet ohänhiyela häp honhat tä otshupyeneje häpkhilek lhamel yen lew'eta. Häpe honhat tä wuj tä is, t'os lhäy'e akäyek hätet iwoye inät, iläfwelchehen tä ihi, wet häpe honhat tä inu'pe honhates iyhäj tä isis. ₇Wet häp tä otahuyejte lhamel wet oyok, Elh tefwajpeji amel wom acheyälis tä kok'aye tä amel lehumin. Yej alekänchiyej Egipto lheley lecheyälis, tsi olham tä ohäpe amel Awuk Dios.

₈“Mat lhamel iwohiyet'a olhämet, tach'ahuhit'a n'oye. Lhamel iwomhit'a lecheyälis tä kok'aye tä lhamel ihumin, wet ilehiyejt'a Egipto lheley lecheyälis. Wet oyok, Onchuwethiyela lhamel wet otasnhila tä kamaj ihi Egipto, häpkhilek nofw owäkw. ₉Mat otasnhit'a, häp tä oyen tichunhayaja olhey tä iyej lhamel, häpkhilek wichi iyhäj tä iyej lhamel nhanayej iwoyneja chik iläkwlhin'o. Tsi pajche wichi hiw'ente tä olhain'ältej Israel lhayis, wet häp tä lhamel ihanejte tä otonhiphäla lhamel tä ihi Egipto.

₁₀“Wet otonphähte lhamel tä otälhtho Egipto wet ohäne honhat tä ts'anis. ₁₁Wet häp tä ow'enhohte olhämtes wet otäfwnhatej lhamel ochufwenyajay tä iwo lew'atshancheyaja elh chik iwoye. ₁₂Wet äpte ofwenhohte lhamel tä ow'enho ifwala tä n'ot'elakw'et tä oyen tetnekayej lhamel lhäy'e häp olham tä oka wichi wet lhamel Lewukn'o. Wet oyen t'amajcheta lhamel, häp tä Lewukn'o.

₁₃“Mat lhamel tatayhte n'ohlä tä ihi honhat tä ts'anis, wet lhamel iwohiyet'a olhämtes wet y'ulhan ochufwenyajay tä ot'uhläk lhamel ihänlhi häpkhilek ikatej lew'atshancheyaj. Wet lhamel yenhit'a t'amajcheta oka ifwalas tä oyen n'ot'elakw'eta. Wet oyok, Onchuwethiyela lhamel wet oyämlat nofwej tä ihi honhat tä ts'anis. ₁₄Mat otasnhit'a, häp tä oyen tichunhayaja olhey tä iyej lhamel, häpkhilek wichi iyhäj tä hiw'enchehte tä otonphä lhamel tä tälho Egipto, nhanayej iwoyneja chik iläkwlhin'o.

₁₅“Wet tä kamaj lhamel ihihte honhat tä ts'anis, otiphä otkwey wet oyäm kalelhäj olhämet tä ofwenho lhamel tä oyok, Ohänhit'ala amehen honhat tä ofwetaj ow'en amhohen, häp honhat tä wuj tä is, t'os lhäy'e akäyek hätet iwoye inät, iläfwelchehen tä ihi, wet häpe honhat tä inu'pe honhates iyhäj tä isis. ₁₆Tsi tä amel ahusey ihänlhi n'ocheyälis, wet häp tä let'ulhan ochufwenyajay, lewohiyet'a olhämtes wet lhenhit'a amajcheta oka ifwalas tä oyen n'ot'elakw'eta.

₁₇“Mat wuj tä op'altsen lhamel wet n'am täyhthihen t'at tä lhamel ihi honhat tä ts'anis. ₁₈Wet häp tä otahuyej leles tä oyok, Yej ten ajchalis lakeyis wet yej alekänchiyej lecheyälis. ₁₉Olham tä ohäpe Awuk Dios. Woye nilhokej olhämtes lhäy'e ochufwenyajay. ₂₀En amajcheta oka ifwalas tä n'ot'elakw'et, wet is chik n'äl tä häpe otetnek amejen tä ahäpehen oka wichi wet ohäpe amel Awuk Dios.

₂₁“Mat lhamel leles äpte tatay n'ohlä, iwohiyet'a olhämtes wet tek ihänlhi ochufwenyajay tä iwo lew'atshancheyaja elh chik iwoye. Wet yenhit'a t'amajcheta oka ifwalas tä oyen n'ot'elakw'eta. Wet oyok, Onchuwethiyela lhamel wet oyämlat nofwej tä ihi honhat tä ts'anis, häpkhilek nofw owäkw tä otiyej lhamel. ₂₂Mat otasnhit'a, häp tä oyen tichunhayaja olhey tä iyej lhamel, häpkhilek wichi iyhäj tä hiw'enchehte tä otonphä lhamel tä tälho Egipto, nhanayej iwoyneja chik iläkwlhin'o. ₂₃Wet häp tä otiphähte otkwey tä lhamel ihi honhat tä ts'anis, wet oyämte kalelhäj olhämet tä ofwenho lhamel tä oyok, Oaifwtsatkatlatpe honhatil wet lelhahiyeja wichi tä w'enha lhamejen, ₂₄häp tä amel kahänalhi olhämtes wet let'ulhan ochufwenyajay, wet ka'ena amajcheta oka ifwalas tä oyen n'ot'elakw'eta, wet lelehiyejt'a tä lehänlhi ajchalis lecheyälis.

₂₅“Wet häp tä ow'enho häp leyes tä ni'isayej tsi häp tä tek tach'ote. ₂₆Wet otch'anlhaye tä lhaikänchiyej tä iwo t'awayhata n'ocheyälis wet iwunhomche leles tä lechunkatshay tä yen n'okhayajayej n'ocheyälistso. Otch'anlhayeje tähestso pajla'tha lhamel t'at tä ihan lhamejen tä letes ihi wet ihanej tä ohäpe Lewuk Dios.

₂₇“Am, hin'o, fwenho Israel lhayis olhämet tä oyok, Olham ohäpe Awuk Dios. Achätilis matche tä n'äyi n'oho wet ilehte n'oyej. ₂₈Tsi tä ohäne honhat tä pajche ofwenho tä ow'enhihola lhamel, häpet tä n'äle tachenhas lhäy'e häp hal'äy tä lhachal wusche'pe, wet lhamel ihoyepej tä iwo t'awayhata lecheyälis, hiw'enho m'ak tä lenij akäjche wet itsäywhäye häp t'awayhat tä hat'es. Wet häp tä iwäkwyhayen n'oyej lakeyistso tä iwoye. ₂₉Wet oty'ätshane lhamel tä oyok, ¿Atsi häp n'on'okhayajw'et tä i'pe tachenhas tä amel lehoye? Wet nech'e lhey t'at täjtso pajtha ifwalasna.

₃₀“Fwenho Israel lhayis olhämet tä oyok, Olham ohäpe Awuk Dios. ¿Chipte tä amel alekokyenteje häp n'ocheyälis, amälhyet iwoye achätilis tä lhaikänchiyej mhaji? ¿Chipte tä lele n'oyej wet len'okwiyej häp n'ocheyälis tä hich'atej tä ni'isahen? ₃₁Wet tä amel lewo t'awayhata lhamel, wet lep'ohen häp ales, wet kamaj letujlhayache t'at tä alekänchiyej acheyälis pajtha nämena. Wet tej tä lewoyaye akeyistso, ¡kamaj lehoyay n'oye tä let'uhläk letay'ätshanay n'oye! Tä olham ohäpe Awuk Dios tä n'ilataj, matche olhämet tä isit'a tä letay'ätshanay n'oye. ₃₂Amel lhoyaykwe, Olhamel ot'uhläk ohätet iwoye iyhäj wichi tä ihiche honhates tä lhamel n'okwiyej hal'äy lhäy'e tuntey.

“Mat tek mälhhiyejatso. ₃₃Olham tä ohäpe Awuk Dios tä n'ilataj, matche olhämet tä oyok, Oniyatla amejen häp tä isej okhajyhayaj tä wuj wet otasnhila amejen owäkw tä äytajche. ₃₄Osohla amejen tä lhewej iyhäj wichi tä ihiche honhates tä w'et lefwtsat'atpehen, häp tä on'älthila amejen okhajyhayaj tä wuj wet otasnhila amejen owäkw tä äytajche. ₃₅Ohänla amehen honhat tä ts'anis wet otihla amejen ates tä lheyayhi tä ottache, ₃₆hätet iwoye täjte otiyej letes häp achätilis tä lhamel ihihte honhat tä ts'anis tä lhamel tälho Egipto. Olham tä ohäpe Awuk Dios olhämet täja.

₃₇“Olham otetshanhila amel, hätehlat iwoye tson'ataswo tä iwo t'ufwahtesa leläy, wet otihla amejen olhämet tä matche tä owoyej amehen. ₃₈Olham ow'enhatla ahilähen häp Israel lhayis tä ni'isa m'ak tä iwoye lhäy'e tä tatay n'ohlä, wet otonhiphäla lhamel tä ihi honhates tä kalew'etesa pajtha nämena. Mat lhamel tek isakanhihola häp honhat tä Israel, wet häp tä amel lehanhiyeja tä olham tä ohäpe t'at Awuk Dios.

₃₉“Häp amel tä ahäpe wichi tä Israel lhayis, olham tä ohäpe Awuk Dios oyok, ¡Mähen, elh weihalhapej, n'okwiyej t'at acheyä! Mat chik tajyäme täja, wet nech'e amel letach'ahuhla n'oye, wet nemhit yachajohla chik ka'ena amajcheta olhey tä n'ot'amajchet, tä mälhyej tä lewo t'awayhata acheyälis tä len'okwiyej athana. ₄₀Nilhokej häp Israel lhayis tä n'okwihla n'oyej tä i'pe okatchenaj tä ot'amajchet, häp tachenaj tä atojphä tä ihi oka honhat Israel. Olham tä ohäpe Awuk Dios olhämet täja. Wet otchumlahlä häp lhamel wet ot'alhiyela chik iwo t'awayhata n'oyej, wet is chik ihän n'oye häp lakäs lhay tä lechunkatshay lhäy'e nilhokej m'ak tä is chik yen t'amajcheta n'oyej. ₄₁Chik olham osoyej lhamel tä iyej iyhäj wichi tä ihiche honhates tä w'et ifwtsatpehen, wet häp tä wichi iyhäj hiw'enla tä ohäpe Elh tä N'ot'amajchet. Wet häp tä nech'e otchumlahlä häp otw'ayhat tä lenij akäjche chik lew'enla n'oho.

₄₂“Wet olham ohänla amehen häp honhat tä Israel tä pajche otiphä otkwey tä ofwenho atetsel tä ow'enhihola, wet häp tä lehanhiyeja tä ohäpe Awuk Dios. ₄₃Wet häp tä nech'e amel letichunhichela nilhokej häp akeyis tä ni'isahen tä lewoyayehte tä alekänchiyej. Wet nech'e amenla t'at chik let'ulhan amehenpe m'ak tä ni'isa tä lewoyayehte. ₄₄Israel lhayis, chik oyenla tichunhayaja olhey tä i'amejen, wet owoyej amehen m'ak tä is, nech'e amel lehanhiyeja tä ohäpe Awuk Dios. Tsi nemla oti amejen otasnhayaj tä t'uhawetej chik oti amejen tä lewoyaye akeyis tä hich'atej tä ni'isahen. Olham tä ohäpe Awuk Dios olhämet täja.”

₄₅Lhawuk tahuy n'oyej wet yok:

₄₆–Hin'o, lhek tilhake häp tapinhiye, en ämeta olhämet tä otiyej tayhi tä tumej tapinhiye. ₄₇Fwenho olhämet tä oyok, “Olham ohäpe Awuk Dios. Owunhiyeja amho itäj tä owäkw, wet ihämthila nilhokej hal'äy tä w'atshan lhäy'e hal'äy tä y'il. Wet chik y'oho, ihichet'ala elh chik ihanej chik y'omat, wet tate'pelis y'ohihena häp nilhokej wichi tä i'amhi, tälhiyela lhip tä tumej tafwojyhiye pajla'tha nichäte lhip tä tumej tapinhiye. ₄₈Wet nilhokej wichi tä i'pe honhat hiw'enla tä olham tä ohäpe Awuk Dios olham tä owunej wet ihichet'a elh chik ihanej iwoyneja chik y'omat.”

₄₉Tä oläte Lhawuk lhämetna, wet oyok:

–¡Ay Iwuk Dios! Wichi yäme tä olham ts'ilak t'at m'ak tä lhamel nitäfwelache tä oyen lhämeta.