Lhawuk lefwajnhat
1Wet Lhawuk tahuy n'oyej wet yok:
2–Hin'o, lhek tilhake häp Jerusalén, tiyej ämet häp Owukwe tä ihi. En ämeta olhämet tä otiyej Israel lhayis kahonhat. 3Fwenho olhämet tä oyok, “Olham ohäpe Awuk Dios, mat nech'e ohäpe amel atayhfwa. Otonhihila ofwajnhat tä iche lehi wet olänhihena wichi tä isen lhäy'e häp wichi tä ni'isahen. 4Matche, otonhihila ofwajnhat tä olänhen wichi tä isen lhäy'e häp wichi tä ni'isahen, tälhiyela honhat lhip tä tumej tafwojyhiye pajla'tha nichäte lhip tä tumej tapinhiye. 5Wet nilhokej wichi tä i'pe honhat ihanhiyeja tä olham tä ohäpe Awuk Dios otonhi häp ofwajnhat tä iche lehi wet nemhit oyachaje, ochäjilhi t'at otkwey.”
6“Wet am, hin'o, is chik letafwlhi wet ahusek wuj tä äytaj tä lhehi tä wichi tatache. 7Wet chik lhamel tay'ätshanej ame häp m'ak tä tamenej tä letafwlhi, wet fwenho lhamel tä häp tä lehanej tä nek t'at häp wichi lewit'äyhyaj. Wet nilhokhiyeja wichi nemhit iche m'ak chik ikalhik iwoye, wet takweyey tak'efwihichehena. Wet nemhit iche elh chik t'otle t'un, wet nilhokhiyeja häp wichi tä tachetthiyejchehena lenowayhyaj. Tsi nichäte t'at lewhäy tä amel awit'äyhyaj, näm amehen. Olham tä ohäpe Awuk Dios olhämet täja.”
8Wet Lhawuk tahuy n'oyej wet yok:
9–Hin'o, en ämeta olhämet tä oyok,
“¡Ofwajnhat, oka matsetaj!
Pajche ofwut wet oyäm nofwche tä olej lech'ohle.
10Ofwut tsi olänhiyejena wichi,
wet oyäm nofwche tä olej lech'ohle
häpkhilek leleplehyaj ihi wet isi.
11Olejche, oyäm nofw lech'ohle
tä iche wet otsok lew'ut.
Wet oyäm y'uy tä ofwut
wet oyäm nofwche tä olejche,
wet ow'enho hin'o tä ilänhen iyhäj.
12Wet am, hin'o, än wet afwlhi,
tsi häp tä oka wichi nech'e häpkhila n'olänhay,
wet nilhokej häp Israel lhayis kaniyatey
tä nichäthihola t'at n'olänyaj.
Akalelhäj tä õ'länhihena lhamel,
õ'tan'istej t'at oka wichi.
Wet fwitsenej tä lenhäpäjen echey
tä lhen atetnekayej tä Israel lhayis laj lefwayhyaja.
13Olham tä ohäpe Awuk Dios olhämet täja.
14“Hin'o, en ämeta olhämet.
Ajwek akwech'ol, wet n'ofwajnhat
lajit lepesa tä ilänhen wichi.
Häpe t'at n'ofwajnhat tä n'olänyajcha,
wet wichi wuj tä nowayhiyela
tsi wujla'pe lhamel chik õ'länhiyejena.
15Wet matche tä hiw'enho lenowayhyaj wichi,
wet wujla'pe lhamel tä nichäthichela katsi.
Olham pajche otihiche lhamel lewukwey pelis
häp n'ofwajnhat tä n'olänyajcha.
Häpe n'ofwajnhat tä olejche tä oyäm nofwche,
wet leleplehyaj ihi wet isi,
wet ofwut tsi häp tä õ'länhiyejena häp wichi.
16¡N'ofwajnhat, ayhi tä y'uy,
iset lhip tä lefwomkat lhäy'e lhip tä lets'amkat,
isthen nilhokej häp lhipey!
17Äpte olham oy'ajlawek otkwech'ol
häpkhilek owäkw nofw.
Olham tä ohäpe Awuk Dios olhämet täja.”
Babilonia laka rey nek tet iwoye n'ofwajnhat, Lhawuk tä ilänej Israel lhayis
18Lhawuk tahuy n'oyej wet yok:
19–Hin'o, enlhi alesaynek tä letech'aynej täkwfwas n'äyhäy, wet is chik Babilonia laka rey tet iwoyek nekche tä ichäj lefwajnhat. Häp n'äyhäyna nilhokej t'at tä is chik tälhe t'at tefwaji häp honhat. Wet tihiche atetnhay häp n'äyhäyna tä nech'e iwopej tesa tä tälho honhatna, wet let'ithat häp hupuy tä tataye. 20N'älitche n'äyij tä tataye Hup Lhokwetaj tä Amón lhayis kahonhat, wet äp n'älitche n'äyij elh tä tataye honhat tä takhajay tä ihi Judá tä häpe Jerusalén. Häpkhilek rey tä nek tä ichäj lefwajnhat ihanej ihi honhates tä n'äyhäyna tataye. 21Tsi häp tä ihi t'at tä täkwfwas n'äyhäy tä nech'e iwo tesa tä tälho honhatna. Itetshanch'oye m'ak tä tehla laka'tshayaj tä iwoye, wet isichätwethä lech'ähal, wet t'uhläk laka dios lhayis ifwenho m'ak tä is chik iwohiyela, wet itetshanej häp itshätäy tänhay. 22Wet lech'äha tä ihi takwey tä lefwomkat tataye Jerusalén, wet nech'e häp tä ihanej tä is chik ikelit tä inuye hupuy. Wet t'änehen laka nifwotas häpkhilek ilänhen wichi tä ihi, wet lhamel tachuma laka'tshayajchal tä y'ajihomchela huppe p'otes. Wet ipotpe honhat lhipey tä iwhäye hupuy lelafwek, wet yäm atojphä yämthilek takasitpe, wet yenlhi n'ot'äsawtes yämthilek isakan lech'oye. 23Mat häp wichi tä ihi Jerusalén fwetaj häpe n'olhämet tä kamatache, tsi häp tä pajche lha'isyene wichi iyhäj wet yen puhfwasa. Mat rey tä iwoynejatso m'ak tä iwoye, itichunyenche Jerusalén lheley häp lhamel lakeyis tä ni'isahen, häpkhilek itsok'atwethä lhamel wet yen lhäytshaya.
24“Häp tä tamenej tä olham tä ohäpe lhamel Lewuk Dios oyok, Tä amel letatay n'ohlä, wet häp tä n'äl t'at tä ates ihi. Wet nilhokej achumtes tä lewoyaye n'äl tä häpe t'at hach'isukyaj, häp tä tamenej tä n'am p'ethatlä akeyistso wet oyachajila amehen häp wichi iyhäj takweyey.
25“Wet häp am ahäpe Israel lhayis laka rey tä lakey matche tä ni'isa. Atott'aye t'at lewhäy tä lekathiyeja n'otasnhayaj tä häpe t'at n'otasnhayaj tä lepes. 26Olham tä ohäpe Awuk Dios oyok, ¡Soyej etekp'ot, lanhi akawon'a tä aniyatyaj kawon'a, häpkhilek nilhokej m'ak tä w'enha lhamej! Õ'neyhthiphäla iyhäj tä w'et m'ayhay t'at, wet õy'ayhthilahchä iyhäj tä len'ohyajay ihiche. 27Wet nilhokej tä olham okänchihla, ts'ilakhilat lhipey, okänchihla, oy'ayhthilahchä, wet nemhit yachajohla chik häpe m'ak tä häpe, pajla'tha näm häp elh tä t'uhawetej, tsi häp tä lewuk wet häp tä oyachajiyela.
Lhawuk itäyhthila Amón lhayis
28“Am, hin'o, en ämeta olhämet tä otiyej Amón lhayis tä n'äyiho Israel lhayis. Fwenho lhamel, ok, Pajche õ'tonhi n'ofwajnhat tä iche lehi, wak'alh t'at tä õ'länhiyejena amel, wet õ'lejche häpkhilek leleplehyaj ihi wet aihämthihena. 29Haw'enhay tek matchehen, wet tä lefwetaj lhäme m'ak tä ihichela, w'et lhäm'atwethä, mathichet'a. Olänhiyeja ofwajnhat häp amel tä matche tä akni'isahen. Nech'e atott'a alhoho lewhäy tä otasin häp amel wet lenofwiyeja t'at.
30“¡Achajche lehis häp afwajnhates! Tä amel lhehi haw'et honhat tä letälhe tä alechihelthi, okalelhthila amejen awit'äyhyaj. 31Otihla amejen owäkw tä häte iwoye itäj wet aip'ohihena. Wet oyachajila amehen häp hin'ol tä w'et hin'ol t'at tä ihoyenlä tä ilänhen iyhäj. 32Oaip'ohihena wet lenofwihena t'at, wet haw'oyis nitsäyhlatpe nilhokej aka honhat. Wet wichi hip'ethathila ahilähen, tsi häp tä olham tä ohäpe Israel laka Dios olhämet t'at täja.”
