Ezeq 22

₁Lhawuk tahuy n'oyej wet yok:

₂–Hin'o, is chik letiyej akalelhthayaj häp hupuy tä wichi tä ilänhen iyhäj tapoyej. Fwenho lech'isukyaj tä matche tä ni'isa tä iwoye. ₃Fwenho olhämet tä oyok, “Olham ohäpe Awuk Dios. Wet amel lelänhen wichi tä haw'etfwas wet lhenlhi n'ocheyälis tä häp tä lekokyenej amehen. Mat nichäthiyela t'at lewhäy tä awit'äyhyaj näm amehen. ₄Tä lelänhen wichi, häp tä oayen tesayej, lhäy'e tä lhenchelhi n'ocheyälis, häp tä alekokyenteje. Wet matche tä leton amehen awit'äyhyaj, wet atott'aye t'at lewhäy tä õ'aitäyhthila. Wet olham ow'enla amhohen tä nilhokej wichi tä i'pe honhat n'äyi amhohen wet ayen leläkwika.

₅“Jerusalén, wichi tä atott'a amho ailäkwilhila, wet wichi tä lew'etes atofwey lhamel t'ischeyhla amej tä ahäpe hupuy tä letoyaj iyeji lecheyälis wet aka wichi yenhilhit'a m'ak tä is. ₆Wet Israel lhayis laka niyatey tä ayen w'eta, w'et len'ohyaj ihi t'at wet lhayen anikoyisa. ₇Wichi tä ayen w'eta, lhamel iwohit'a haya lajchalis lhäy'e lakolis. Wet lhamel iwoyeje m'ak tä ni'isa wichi tä kalew'eta tä iyej lhamel. Wet lhamel hip'altsenhit'a chipenhas lhäy'e häp tesalis. ₈Wet nemhit yen t'amajchetesa ow'etes tä ot'amajchetes lhäy'e häp ifwalas tä oyen n'ot'elakw'etesa. ₉Iche hin'ol tä ayen w'eta tä itiyej lesufwkanyaj iyhäj, häpkhilek õ'länhen lhamelna. Wet iche iyhäj tä t'awaye n'olhäk tä i'pe tachenhas tä õyen käjyajayej n'ocheyälis, wet matche tä iwoye lakeyis tä hich'atej tä ni'isa. ₁₀Wet iche iyhäj tä itiyej lakey häp lajcha ch'efwa, wet iyhäj hip'ajtitchehchä häp atsinhay tä nowaywethä. ₁₁Wet äpte iche hin'ol tä itiyej lakey häp lepuhfwa ch'efwa, wok häp letiche tä lhäs ch'efwa tä itiyej lakey, wok häp lech'inhä tä lajcha lhäse tä iwoyeje lakey. ₁₂Wet iche hin'ol tä õ'sukunej tä ilänhen iyhäj wet õtispe, wet lhamel tä icheyjäntej iyhäj häp laka chinaj t'äj, lhamel y'ayhattshi iyhäj letes. Lhamel hiw'en m'ak tsi häp tä ikanej iyhäj, wet lhamel matche tä hip'ethat n'ohlä. Olham tä ohäpe Awuk Dios olhämet täja.

₁₃“Olham matche tä owäkw iyeji häp akanyaj tä wuj tä letiyej aiyhäj, tä wuj chinaj t'äj tä lekalhihlä akanyaj lhäy'e tä lelänhen aiyhäj. ₁₄Yej fwetaj lehanhiyeja lewoyneja chik letatay n'ohlä chik otetshan m'ak tä ni'isa tä lewoye, chik onchuwethila ame'pe akeyisna. Olham tä ohäpe Awuk Dios ofwel amhohen olhämetna, wet akalelhäj tä omatthichela. ₁₅Oaifwtsatkatla'pe häp honhatil wet lelhahiyeja wichi tä w'enha lhamejen, wet äp owohla pesa akeyis tä ni'isachehen tä lekokyenej amehen. ₁₆Wet nilhokhiyeja wichi tä i'pe honhat tä hiw'enla tä osohla amejen han'ohyaj. Wet häp tä nech'e lehanhiyeja tä olham tä ohäpe Awuk Dios.”

₁₇Wet Lhawuk äp tahuy n'oyej wet yok:

₁₈–Hin'o, Israel lhayis nech'e tet iwoye häp lechinhas lhip tä ni'isa tä imälhehi tä õ'iskonche n'onhonthi tä wachuhiche. ₁₉Wet häp tä olham tä ohäpe Lewuk Dios olhämet tä ofwenho lhamel, oyok, “Amel atet iwoye lechinhas lhip tä ni'isa tä imälhehi tä õ'wachuhathiche. Oaihutlawek häp amel, oskonla amhohen häp Jerusalén. ₂₀Häp tä tehlat iwoye lechinhas tä w'enhache lhamejen tä õhp'ajtitwek tä õ'iskonche n'onhonthi, wet õy'isej iyhäj lehuy häpkhilek lhäy'e lhip tä chayo, wet iwachuhathiche lechinhas. Häp tä mälhyejtso owäkw tä tanhoch'ay chik owohiyela, ohutlawek häp amel wet oaiwachuhathihichela. ₂₁Olham owäkw tä owohiyela tehlat iwoye itäj tä oy'isej lhip häp lehuy wet matche tä chayo. Wet oaihutlawek, otihla amhi hupuy lechowej wet oaiwachuhathihichela. ₂₂Häp tä mälhhiyejatso, atehlat iwoye chinaj tä plata tä wachuhiche tä ihi n'onhonthi, lewachuhihichela tä lhehi hupuy lechowej. Wet häp tä nech'e lehanhiyeja tä ohäpe Awuk Dios wet nech'e ottay ahilä, oti amejen owäkw.”

₂₃Lhawuk äp tahuy n'oyej wet yok:

₂₄–Hin'o, fwenho Israel, ok, “Ahäp honhat tä ikatej n'otasnhayaj wet nemhit iwomchä wet nemhit lew'en häp inät. ₂₅Ahäp honhat tä laka niyatey tet iwoye häp t'owalhas tä tanhätinhen wet iwo lhipeya itshäwet elh tä ilän. Lhamel ilänhen wichi wet t'etane lakäywet lhäy'e nilhokej m'ak tä hiw'en, wet wuj häp atsinhay tä yen tesalisa tä ilänhen lech'efwas. ₂₆Wet sacerdotes itilhkat m'ak tä häpe olham ochufwenyaj, wet yenhit'a t'amajchetesa m'ak tä olham tä oyen ot'amajchetesa. Wet nemhit häp chik hiw'enhat m'ak tä n'ot'amajchet, mat itech'aynej t'at m'ak tä kan'ot'amajcheta. Wet ichufwenhiyejt'a iyhäj chik hiw'enhatlä m'ak tä kok'aye häp m'ak tä n'ot'amajchet. Wet nemhit itetshan oka ifwalas tä oyen t'elakw'eta, wet nemhit iwujyen n'oyej.

₂₇“Häp niyatey tet iwoye m'awotas tä ilän itshäwet elh wet iwo lhipeya. Wuj wichi tä lhamel ilänhen, wet häp tä tamenej tä lhamel hiw'en m'ak. ₂₈Häp profetas iskat m'ak tä matche, tet iwoye häp hin'o tä ipelnhat hup. Lhamel fwetaj lew'enhay ihi, wet m'ayhay tä lhamel yen lhämtesa häpe t'at häp m'ak tä kamatachehen. Lhamel fwetaj olham tä oyämhoplhi lhamel, mat olham matche tä n'am nämhoplhi lhamel. ₂₉Wichi tä lew'et honhattso tach'anlhahiyet'a iyhäj chik iwoye m'ak tä lhamel ihuminche. Wet lhamel t'etane m'ak tä lewuk iyhäj, wet ikanej elh tä p'elitsaj lhäy'e häp elh tä niw'ena m'ak. Lhamel hip'altsenhit'a wichi tä kalew'eta honhat tä iyej lhamel. Matche tä lhamel nit'amajayej wichi tä kahäpeya lhamel.

₃₀“Olham ot'ukwe hin'o tä oyen lewoya tä ifwenho iyhäj wichi häp lewit'äyhyaj tä atott'a alhoho häpkhilek n'am täyhthen lhamel. Mat onlhokhiyet'a. ₃₁Wet häp tä tamenej tä otiyej lhamel owäkw tä tet iwoye itäj, wet otifwej lhamel, tsi häp tä otasinpe lakeyis tä ni'isa tä iwoyej n'oye. Olham tä ohäpe Lewuk Dios olhämet täja.”