Ezeq 23

₁Lhawuk tahuy n'oyej wet yok:

₂–Hin'o, ichehte täkwfwas atsinhay tä elh lako t'at häp elh lako. ₃Tälhe tä nech'e thänhäy tä iwo lakeya tä ihi Egipto, wet tek n'äyej t'aatey tä õtchasen, tsi häpkhit'a häp atsinhay tä kahoyenhasa. ₄Wet elh tä thaläkw lhey häp Ohola wet lech'inhä häp tä lhey Oholiba. Wet olham tä Olewuk, wet tä iwo lelesa, wet leles hin'ol lhäy'e leles tä atsinhay. Wet Ohola häp Samaria wet Oholiba häp tä Jerusalén.

_5-6“Wet Ohola iwo lakeya, tej tä olham tä Olewuk thayej. Matche tä lehumnhay häp Asirio lhayis kaniyatey lhäy'e laka sip'älis kaniyatey. Lhamel lew'uyis ifwak'an wet häpe mamses tä isis tä iche'pe lew'utey yel'atas tä laka'tshayajchal. ₇Matche tä inu'pe iyhäj häp Asirio lhayis, wet häp tä Ohola iwo lakeyayej lhamel wet wuj tä lhaikänchiyej lhamel lecheyälis. ₈Tälhe t'at ifwalas tä ihihte Egipto tä lhaitech'aynej elh tä kain'oye, wet ilehichet'a lakeytso. Ifwalas tä lhutsha hin'ol imäyejlhi t'at, nemhit häpe atsinha tä kan'och'efwaya, nech'e häpe kain'oye.

₉“Häp tä tamenej tä oyachaje t'at häp lehumnhay Asirio lhayis, wichi tä lham tä ihumnhen. ₁₀Wet wichitso hin'äfwlhatlhihte häp lham wet isoyej leles. Wet lhamel itiyej otasnhayaj häp lham wet ilänej lefwajnhates. Wet iyhäj atsinhay yämejwethä wet itiyej leläkwyhanyaj.

₁₁“Wet lech'inhä Oholiba, tej tä hiw'en t'at m'ak tä iyejpe lechita häp m'ak tä ni'isa tä iwoye, mat nem koyhyaj tä lhaich'isukyenej häp t'isan lenech'ethayaj, inu'pe lechita tä iwo lakeya. ₁₂Wet itiyej lehumnhayaj häp Asirio lhayis kaniyatey lhäy'e laka sip'älis kaniyatey. Lhamel häpehen mamses tä isis, lhamel iche'pe lew'utey yel'atas tä laka'tshayajchal wet lew'uyis tä nifwotaj khäy tä lesilatyaj ihi. ₁₃Wet ow'en tä tej tä lham tha lhaikänchiyej t'at häp lakey tä ni'isa, tsi matche tä iten t'at häp lechita tä iwo lakeya.

₁₄“Tä nem koyhyaj lakey tä iwoye, wet tä hiw'en häp Babilonio lhayis lepeykas tä ichäthen tä iyej lewukwe lhipey, t'uhläk iwo keyayej. ₁₅Häp lepeykastso häpe niyatey lepeykas tä lakawakay ihiche lhäy'e lhetekp'otes tä isis. ₁₆Wet tä Oholiba hiw'en lhamel, wet matche tä ihumin wet iwo chenhayaye lhamel tä ihi Babilonia. ₁₇Wet nämhen Babilonia lheley wet häp tä lhamel imäyejlhi. Matche tä lhamel yen lehumneka wet ikänchiyej tä iwo lakeya, pajtha atsinhatso n'äfwtseye'pe m'ak tä lhamel iwoyeje. ₁₈Wet tä nilhokej häp wichi hiw'en tä iwo lakeya wet ilanche lakhäy, wet hin'ältej t'isan tä ts'ilakche häp wichi, wet matche tä okokyene, tet iwoye tähaj okokyene häp lechita tä iwo lakeya. ₁₉Wet nemhit koyhyaj tä iwo lakeya, tsi häp tä nip'ethatahlä ifwalas tä lhutsha tä iwohte lakeyahi Egipto. ₂₀Matche tä lehumnhay häp Egipto lheley, wet lakey tä iwoye tet iwoye m'ak tä n'äleyeje asno lhäy'e yel'ataj.

₂₁“Wet am, Oholiba, wuj tä letichunche m'ak tä lewoyepmhaji häp ifwalas tä alhutsha tä Egipto lheley tachasen aatey. ₂₂Wet häp tä tamenej tä olham tä ohäpe Awuk Dios oyok, Häp wichi tä lhen ahumnhaya tä nech'e len'äfwtseye häp lhamelna, nech'e oyenla atayhfwasa lhamel wet ochenla alhoho wet lhehihla lechowej lhamel. ₂₃Ochenla alhoho häp Babilonia lheley, lhäy'e Caldea lheley, lhäy'e Pekod lheley, lhäy'e Soa lheley, lhäy'e Koa lheley. Matche, otayhthila ahilä häp mamses tä isis tä niyatey lhäy'e tä sip'älis kaniyatey. Nilhokej ihichela'pe lew'utey yel'atas tä laka'tshayajchal tä nekhen. ₂₄Lhamel nämhihena wet tatayhla ahilä, wet wujla'pe häp laka kaletas tä laka'tshayajchal, lhäy'e häp sip'älis tä iwo laka'tshayaja amej. Wujlak näm ame wet lhehihlat lechowej lhamel, wet nilhokej laka'tshayajchal tä iti lhamejen, lhetekp'otes lhäy'e m'ak tä hip'oyej letapehen. Wet olham tä owahnej lhamel chik iti amej lakalelhthayaj, häpkhilek aikalelhthila mälhyej lhamel lakeyis. ₂₅Olham otihla amej owäkw tä äytajche, wet lhamel tä hich'athiyeja m'ak tä iwoyej ame, wet yisthila anhus lhäy'e hach'otey. Wet aiyhäj tä kamaj n'ilahen lhamel ilänhiyejena lefwajnhates, wet isohla amej ales, wet aiyhäj chik imälhehihla häp tä itäj tä ihämthiyeja. ₂₆Wet ailikyenhichela wet lhayenla lewuka häp amsilis tä isis. ₂₇Tsi häp tä oyen lepesa tä lewo kotsayej akey tä lewoye lhäy'e akänyaj tä letiyej honhat tä Egipto. Wet häp tä nemhit lewatlahläk lew'en Egipto lheley, wet nemhit lhenla atichunhayaja lhamel.

₂₈“Olham tä ohäpe Awuk Dios olhämet oyok, Oyachajila ame wichi tä am len'äyiho tä ihiche honhates, häp wichi tä len'äfwtseye'pe m'ak tä iwoye. ₂₉Wet lhamel hich'athiyeja tä n'äyi amho wet isohla amej häp m'ak tä lekalhi tä tälhe achumet tä lewoye. Wet matche tä ailikyenhichela, ilanhichela haw'uyis tä i'atape tä hin'ältej atape akey tä lewoyeje naji lhäy'e akänyaj tä letiyej naji. ₃₀Tsi lewonaj akeyayej wichi tä ihiche honhates wet äpte alekänchiyej häp lhamel lecheyälis tä len'okwiyej. Wet häp tä tamenej tä awit'äyhyaj ihi. ₃₁Matche tä am leten häp achita tä iwohte lech'isukyaja, wet häp tä tamenej tä oyäynhila amhi n'olhäthi tä otetnekej owäkw tä oyäynhihte achita.

₃₂“Häp täja olhämet tä olham tä ohäpe Awuk Dios oyok,

₃₅“Häp tä tamenej tä olham tä ohäpe Awuk Dios oyok, Tä nem lhen atichunhayajan'o wet achäyi ithat n'ohlä, owohla ateläythayaja'pe m'ak tä lewoye naji lhäy'e tä wuj tä lekän häp akeyis tä ni'isa tä lewoye.”

₃₆Lhawuk tahuy n'oyej wet yok:

–Hin'o, is chik letiyej akalelhthayaj häp Ohola lhäy'e Oholiba. Is chik lefwenho häp lech'isukyaj tä hich'atej tä ni'isanaj tä iwoye, ₃₇tsi lhamel ile n'oyej wet w'oyis ichehen takweyey. Wet tä lhamel ile n'oyej wet n'okwiyej n'ocheyälis, wet lhamel tachuma leles tä takapuhtshanejen naji tä olham tä Olewuk, wet iwunhomche tä iwujyenej n'ocheyälis wet yen n'ocheyälis lhäka. ₃₈M'ak elh tä matche tä ni'isa tä iwoye tä tatay n'ohlä, häp tä yen häpeya m'ak tä kan'ot'amajcheta häp Owukwe tä Ot'amajchet, wet yenhit'a t'amajcheta ifwalas tä olham tä oyen n'ot'elakw'eta. ₃₉Häp ifwala tä lhamel iwunhomche leles tä iwujyenej lecheyälis, wet lhamel nämhen tä ihochufwi Owukwe tä Ot'amajchet wet yenhit'a n'ot'amajchetayej lakeyis tä kok'aye. Häp täja häp m'ak tä iwoyeje olham Owukwe.

₄₀“Wet lhamel ichen wichi tä t'ukwe häp hin'ol tä lew'et atofwey, lhamel t'alhch'oye häpkhilek nämhen. Wet atsinhayna, lhamel täkwfwasna, lhamel inay wet ipakhen tatet'ähes, wet y'ayhtejtshi lesilatyaj häp lhamsilis tä isis tä ithat lhamej, häpkhilek wak'alhen chik nämhen häp hin'oltso. ₄₁Wet tatayphä'pe n'omäwet tä isilataj, wet mesa tä iwhäye n'omäwet wak'alh, tä õ'ti'pe incienso tä õyenpej t'amajcheta n'oyej lhäy'e häp aceite tä ot'amajchet.

₄₂“Wet õ'lätlä wichi tä wuj tä t'änhen tä iwo lakäjyaja. Häpe hin'ol tä nämhen tä õ'tälhte honhat tä ts'anis, wet lhamel y'uyitchehen atsinhayna takweyey häp n'otkwet'akay tä oro, wet itiche'pe lhethey häp niyat tsinha lakawon'alis tä isis. ₄₃Wet ofwenho lhamel tä atsinhayna hich'utejen häp lakey tä iwoye, wet oyok, ¿Hä kamaj amel lewohlat akeyayej atsinhayna, wet lhamel äpte iwohla lakeya amejen p'iya?

₄₄“Lhamel näme häp Ohola lhäy'e Oholiba, häp atsinhay tä nitetshana m'ak tä iwoye. Wet tä lhamel näme, tet iwoye häp wichi tä näme atsinhay tä iwo lakain'oyaja. ₄₅Wet hin'ol tä is alhoho m'ak tä iwoye itayhthiyejahlä atsinhayna tä lakain'oyaj ihi häp n'okey tä tatayhlä n'okain'oyaj lhäy'e häp n'okey tä tatayhlä atsinhay tä ilänhen iyhäj. Tsi häpehen n'okain'oyajwos wet iyhäj tä ilänhen lew'oyis ichehen häp takweyey.”

₄₆Lhawuk Dios lhämet yok:

–Is chik lehutwek wichi tä lhäm wujpey wet tayhatlä häp atsinhayna, häpkhilek y'ilejen lenowayhyaj tä nowaye wichi, wet äpte is chik isoyej m'ak tä hiw'en. ₄₇Wet is chik wichitso ithatejlhi tuntey häpkhilek y'inhen, wet itshänejwethä lefwajnhates, wet ilänhen leles, wet iwunhomche lewukwey. ₄₈Olham on'äyhiyejola n'ochumyaj tä ni'isa tä ihi honhatna, häpkhilek nilhokej häp atsinhay iyhäj hiw'en tä ow'enho'pe lewit'äyhyaj häp iyhäj tä ni'isa lakeyis tä iwoye, wet häpkhilek lhamel nitena iyhäj lech'isukyajay tä iwoye. ₄₉Häp atsinhay täkwfwasna lhamel ikathiyeja'pe otasnhayaj häp lhamel lechumyajay tä matche tä ni'isa tä iwoye, lhäy'e tä iwo ch'isukyajayej n'ocheyälis tä lhamel n'okwiyej. Wet häp tä nech'e amel lehanhiyeja tä ohäpe Awuk Dios.