Tiro laka rey lewit'äyhyaj tä profeta iwo silätaye
1Lhawuk tahuy n'oyej wet yok:
2–Hin'o, is chik lefwenho olhämet häp Tiro laka rey tä lhok, “Häp täja häp Dios lhämet tä t'uhläk ofwel amho, wet yok,
“Am tä ahäpe Tiro laka rey matche tä alechäjlhi.
Lefwetaj ahäpe dios wet lefwetaj letatayhiphä t'at
häp dios lhayis leniyatyajw'et
tä i'pe lewomekitaj lhipey.
Mat olham oyok, Ahäpehit'a dios, ahäpe t'at hin'o,
wet lefwetaj lehan honhatej
chik atet iwoye dios lhayis.
3¿Hä wet lefwetaj lehan honhatej
tha lenutpe häp Danel?
¿Hä wet nilhokej häp m'ak tä õ'iskathiche
tä niwohit elh chik kahanayej?
4Häp ahanyaj tä i'amej
häp tä tamenej tä lew'en m'ak tä akäywet,
wet tä matche tä lehanej
tä lechumyenlhi m'ak tä lew'en,
wet matche tä tapokwe lehis häp oro lhäy'e plata.
5Wet tä wuj tä lehanej tä lefwelwethä akäywet
wet wuj m'ak tä lekalhihlä,
t'aylhatshi t'at häp m'ak tä lew'en,
wet nech'e häp tä tamenej
tä let'ekha ame wet alechäjlhi.
6“Wet häp tä olham tä ohäpe Dios tä matche
ofwel amho olhämet tä oyok,
Tä aletech'aynej dios,
lefwetaj atet iwoye häp dios tä ihan honhatej,
7wet olham ochenhiyela wichi tä lew'etes
honhates iyhäj tä w'enha lhamejen,
häp wichi tä hich'atej tä fwitses,
wet itonhihichela lefwajnhates tä ihi lehis,
wet lhamel tatayhla ahilä,
wet ain'äfwlhatla tä lefwetaj matche tä ahanyaj ihi,
wet matche tä ikänchihla asilatyaj tä i'amej.
8Wet aithathichela häp chowej tä pitoj wet let'inla,
atehlat iwoye wichi tä y'inhen
tä ilech'oye häp lewomekitaj tä pitoj.
9Chik lhewej t'at häp iyhäj tä ailän,
¿hä kamaj lefwetajla ahäpe dios?
Chik lhehi t'at n'olänyajwos takweyey,
ahäpkhila hin'o tä w'et m'akfwaj t'at.
10Wichi tä tälhe honhates iyhäj ailänhihena,
atehlat iwoye wichi tä nena laka diosan'o.
Olham tä ohäpe Dios tä matche olhämet t'at täja.”
N'otenek tä õyen tichunhayaja Tiro laka rey lewit'äyhyaj
11Lhawuk äp tahuy n'oyej wet yok:
12–Hin'o, is chik leten häp wichi tä elh ileyej honhat letenek. Is chik let'äyen häp Tiro laka rey wet lhok,
“Dios yok, Matche tä ais mhaji,
lhäy'e tä tapo amej ahanyaj,
wet wuj tä aisilataj.
13Lhehihte häp Edén tä oka yachuyajw'et,
tä nilhokej häp tuntey tä isis
tä laha ihi tä w'enhache lhamej
tä häp tä hiw'en amho asilatyaj:
rubí, lhäy'e tunte tä ika'tu tä lhey crisólito,
lhäy'e tunte tä w'atshan tä lhey jaspe,
lhäy'e elh tunte tä ika'tu tä lhey topacio,
lhäy'e elh tä cornalina, tet iwoye anek lhawo,
lhäy'e elh tä lhey ónice,
lhäy'e tunte tä ifwak'an tä lhey zafiro,
lhäy'e elh tä ichät tä lhey granate,
wet lhäy'e häp elh tä w'atshan tä lhey esmeralda.
Wet amsilis lhäy'e hach'ote lheley
nilhokej t'at tä häpehen oro,
wet tälhe t'at ifwala tä nech'e oayenlhi
tä oyenchelhi tä owaklhat amho.
14Oayenehte m'ak tä lhafwis ihi,
häp tä one'tek let'uye ow'et,
wet lhehte'pe oka chenaj tä ot'amajchet,
wet let'äschehte t'at häp tuntey tä itäj.
15Wet tälhe ifwala tä oayenlhihte
tä isen häp akeyis tä lewoye,
pajtha nichäte ifwala tä nech'e äp lewoye m'ak tä ni'isa.
16Tsi tä wuj akäywet tä lefwelpejwethä
wet tä wuj m'ak tä lew'en,
häp tä nemhit lewo hap'altsenyaja
lhäy'e tä nech'e lewo hach'isukyaja.
Wet häp tä nech'e oaichench'oye
oka chenaj tä ot'amajchet,
wet oleyej tä oy'uhyen ame ow'et,
wet nemhit let'äsche tuntey tä itäj.
17Häp asilatyaj tä wuj tä i'amej,
häp tä hiw'en amho tä alechäjlhi,
wet tä atoyaj ihi asilatyaj,
häp tä tamenej tä alech'isukyen.
Wet ow'enyente amej reyes
tä i'pe honhat tä oaithat honhate,
wet lhamel hiw'ente awit'äy tä i'amej.
18Wet tä wuj hach'isukyajay tä lewoye,
lhäy'e tä wuj tä alekänchiyej
akäywet tä lefwelpejwethä,
wet nichäte t'at tä nemhit
lhen amajcheta han'okhayajw'etes.
Häp tä tamenej tä oyenlhi itäj
tä tälho t'at achowej wet aihämit,
wet häp tä wichi aiw'en
tä ts'ilak at amok tä ikatsi.
19Wet nilhokej wichil tä nitäfwel amej
tä lhamel inuhat lhamhohen tä hiw'en awit'äyhyaj.
Lhamel matche tä nowaye m'ak tä ni'isa tä i'amej,
tsi nemhit yachajohla chik lhehichela,
matche t'at tä attäy.”
Sidón lewit'äyhyaj tä profeta iwo silätaye
20Lhawuk äp tahuy n'oyej wet yok:
21–Hin'o, lhek tilhake häp Sidón, en ämeta olhämet tä otiyej. 22Is chik lhok, “Dios lhämet yok,
“Sidón, olham ohäpe Dios tä matche,
wet nech'e oayen otayhfwaya.
Wet am tä letamenhiyeja chik wichi iwujyenn'o
chik hiw'en m'ak tä owoyej ame.
Chik okalelhthila amej owäkw
wet on'älthila tä ohäpe Elh tä N'ot'amajchet,
wet nech'e lhamel ihanhiyeja
tä olham tä ohäpe Dios tä matche.
23Wet aka wichi ochenhiyela äytes,
wet lew'oyis ihichehena hup kawayhil.
Wet atayhfwas tälhiyela lhip chik häpe
tä inuhiyela wet ilänhihena.
Wet häp tä nech'e lhamel ihanhiyeja
tä olham tä ohäpe Dios tä matche.
Dios itasnhila häp Israel letayhfwas, häpkhilek Israel letamsek ihi
24“Wet häp Israel lhayis nemhit yachajohla chik iteläytej häp wichi tä ihiche honhates tä iwhäye lhamel tä n'äyihomche, tä tet iwoye ch'uthanil tä itselhäs lhäy'e tä tet iwoye chitsom lhän'i tä äytes. Wet häp tä nech'e lhamel ihanhiyeja tä olham tä ohäpe Dios tä matche. 25Olham ohutlawek oka wichi Israel tä ifwtsatpehen wichi iyhäj laka honhates, wet wichitso lhamel hiw'enla t'at owujyaj tä ohäpe Elh tä N'ot'amajchet, tsi nech'e opäynhiyela häp lhamel. Wet Israel lhayis nech'e lhamel ihihila t'at honhat tä lhamel lew'et, häp honhat tä olham ow'enhohte okawo Jacob. 26Wet lhamel letamsekis ihihila, wet yenhichelhilat lewukwey wet itihlahchä häp uva lhiley. Wet otihiyejena okalelhthayaj tä owäkw häp wichi tä ihiche honhates tä iwhäye lhamel tä n'äyihomche, wet nech'e oka wichi Israel letamsekis ihihila. Wet nech'e ihanhiyeja tä olham tä ohäpe Lewuk Dios.”
