Egipto lewit'äyhyaj tä profeta iwo silätaye
1Häp nekchäm tä diez tä olhamel oihi Babilonia tä häpe honhat tä ka'ow'eta, wet iwel'a tä diez, häp ifwala tä doce, häp tä Lhawuk tahuy n'oyej wet yok:
2–Hin'o, lhek tilhake Egipto kaniyat wet en ämeta olhämet tä otiyej häp lham lhäy'e laka honhat. 3Is chik lhok, “Dios lhämet yok,
“Egipto kaniyat, olham ohäpe Dios tä matche.
Wet nech'e oayen otayhfwaya tä atet iwoye
alhutaj tä wujchey tä ihi tewokitaj tä lhey Nilo,
wet lhok, Nilo olham tä olewuk wet olham tä olhenek.
4“Am tä ahäpe Egipto kaniyat,
olham onuhthihola onichäte häp anhus,
wet osatthiyeja afwinchos
häp w'ahat lhayis tä ihi aka tewok.
¡Wet oaitonhiphäla tä lhehi aka tewok,
wet w'ahat lhayis tä satej afwinchos yikhilat amche!
5Wet otfwomla amej, othatla ame honhat tä ts'anis,
wet w'ahat lhayis tä ihi aka tewok
wet äpte op'ajthilat amej.
Wet lechäthiyela honhat tä tsajphä,
wet niwohit täjche tachumla ame chik tajänla ahilä.
Wet itshätäy tä fwitses
lhäy'e afwenchey häp tä atufwila,
tsi häp tä ow'en amho lhamel.
6Wet nilhokej häp wichi tä ihi Egipto
tä lhamel nech'e ihanhiyeja
tä olham tä ohäpe Dios tä matche.
Häp Israel t'ukwepej am hach'otyaj,
mat tajlhamat tä w'et ayen at tsuta.
7Wet tä lhamel itsok amej takwech'ol,
wet lechäpej tha letijomche t'at häp lesij lhiley.
Wet tä lhamel lhay'it atape,
wet lechäpej tha lhamel nichätchet katsi.
8“Häp tä tamenej tä olham tä ohäpe Dios tä matche oyok, Olham ochenla ame häp wichi tä ilänla amejen lefwajnhates, wet ilänhihena hin'ol lhäy'e häp itshätäy tä aläy. 9Wet nech'e ahäpkhila t'at häp honhat tä ts'anis, wet häp tä nech'e wichi ihanhiyeja tä olham tä ohäpe Dios tä matche.
“Am lhonaj, Häp tewokitaj Nilo olham tä olewuk wet olham tä olhenek. 10Häp tä tamenej tä olham ottay ahilä wet ottayhlä aka tewok. Wet Egipto oyenla häpeya honhat tä ts'anis wet nemhit wichi ihi, tälhiyela Migdol tä tumej tafwojyhiye pajla'tha nichäte Aswán tä tumej tapinhiye, wet pajla'tha äp nichäte Etiopía tä honhat elh tä Egipto lepes. 11Ihichet'ala hin'o chik häpe chik inuhikwela, nits'ilakhiyat itshätäy chik inuhikwela honhattso. Pajla'tha cuarenta nekchämis tä wichi newhiyahila. 12Egipto, oayenhiyela honhat tä wichi newahi, lenuhlatpe iyhäj honhatil tä ts'anis. Pajla'tha cuarenta nekchämis tä aka hupuy tä wasiche, tafwayhlatpe iyhäj honhates tä pajche wasiche. Olham ofwtsatkatla'pe honhatil iyhäj häp aka wichi, wet lhamel lhahiyeja wichi tä w'enha lhamejen.
13“Olham tä ohäpe Dios tä matche oyok, Chik tajyäme häp cuarenta nekchämis, wet yachajohla chik ohutlawek Egipto lheley tä lhamel ifwtsatpehen wichi iyhäj laka honhatil. 14Onachajichelahchä Egipto lheley tä n'okwenkay, wet nech'e lhamel ihihichela häp honhat tä lhamel laka honhat tä häpe Egipto lhip tä tumej tapinhiye. Wet häp tä lhamel yenhilhila lhamel leniyatyaj tä nemhit laha ihi. 15Häpehila n'oniyatyaj tä niw'awulhiyahila iyhäj n'oniyatyajay, wet nemhit yachajo chik inuhla'pe lhamel. Häpkhila t'at n'oniyatyaj tä lhämsaj, wet nemhit ihichela honhat chik lham ikalhihila, tsi häpe häp n'oniyatyaj tä niwuja. 16Wet häp tä Israel lhayis nemhit ihanhiyeja iwoyneja chik t'ekhahiyela häp Egipto lheley, tsi Israel lhayis yenla tichunhayaja tä isit'ahte m'ak tä iwoye tä t'ukwe Egipto lech'otyaj. Wet nech'e lhamel ihanhiyeja tä olham tä ohäpe Dios tä matche.”
Nabucodonosor ikalhihila Egipto
17Häp nekchäm tä veintisiete tä olhamel oihi Babilonia tä häpe honhat tä ka'ow'eta, wet iwel'a tä ichun, wet ifwala tä äp ichunpe iwel'a, häp tä Lhawuk tahuy n'oyej wet yok:
18–Hin'o, häp Nabucodonosor tä Babilonia laka rey lham pajche ichen laka nifwotas tä wujpey häpkhilek tatayhlä häp Tiro. Wuj tä äytajche lechumet sip'älis, wet tä wujpey nekchämis tä tachumwethä, wet lhethey isathen, lakawon'a tä ilanche lew'oley, wet m'ak tä talhunej hits'utajaynhiche lechäyi. Mat niwohit m'ak chik lham ikalhihlä häp Tiro tä tatayhlä, lhäy'e häp laka nifwotas niwohit m'ak chik lhamel ikalhihlä laka'tshayaj tä iwoye. 19Häp tä tamenej tä olham tä ohäpe Dios tä matche oyok, Mat Egipto häp tä otch'othiyela häp Nabucodonosor häpkhilek ikalhi, wet isohiyeja lakäywet lhäy'e nilhokej m'ak tä ihi, häpkhilek yen laka nifwotaj lakahaya. 20Otch'othiyela Nabucodonosor häpkhilek ikalhi honhat tä Egipto, häp tä oyen lahaya lechumet tä iwoye tä tatayhlä Tiro, tsi häp tä olham tä tach'ot n'oye. Olham tä ohäpe Dios tä matche olhämet täja.
21“Wet häp ifwalatso oy'ayhthitshila oka wichi Israel lakhajyhayaj, wet am, Ezequiel, häp tä nech'e lesakanhiyeja chik lhämhoplhi häp lhamel. Wet nech'e lhamel ihanhiyeja tä olham tä ohäpe Lewuk Dios.”
