Ezeq 32

₁Häp nekchäm tä doce tä olhamel oihi Babilonia tä häpe honhat tä ka'ow'eta, wet iwel'a tä doce, wet ifwala tä ichunpe häp iwel'a, häp tä Lhawuk tahuy n'oyej wet yok:

₂–Hin'o, is chik leten häp wichi tä elh ileyej honhat letenek. Is chik pajche let'äyen häp Egipto kaniyat wet lhok,

₃Wet Dios yok:

–Osekhiyeja ahilä owot wet wichil tä wujpey tä lhaihutwek isakanla amej. ₄Wet oaitonla ufwey, oaitihlat katsi, wet ochenla ame nilhokej häp afwenchey wet t'äsila atape, wet nilhokhiyeja itshätäy tä ihi tayhi tä lhamel itshathiyejena asan. ₅Wet häp tachenhas lhäy'e lakawayhil kok'ahiyejela hap'itsek tä najut tä waso. ₆Wet honhat oyämla yits'iwajejchephä haw'oyis pajla'tha nichätpe tachenhas, wet tapohikwela häp tewok lhayis. ₇Wet chik oaitäyhthila, wet pule tä ichalaj nämla wet y'omathihena katetsel. Wet pule hip'ohla'pe ifwala wet iwel'a nemhit isihla. ₈Am tä letamenhiyeja chik oy'omathen häp isi lhayis tä ihi pule, wet honataj hip'ohla'pe aka honhat. Olham tä ohäpe Dios tä matche olhämet täja.

₉“Wet chik wichil tä älhyej katäfwelayej ihanlach'oye tä oaitäyhat, lhamel wujlak lelhakli ihi. ₁₀Olham ow'enhihola wujpey wichi tä is chik wuj tä inuhat lhamhohen chik ihanhiyeja awit'äyhyaj tä i'amejna. Wet lhamel laka reyes tatey ipelajiyeja'pe lenowayhyajay chik ochäjiyejlhila ofwajnhat chik otihi tä lhamel tatache. Tsi ifwala chik am atäyhyaj ihi, wet elhpej nech'e lhamenla t'at chik nowayhlahläk olänhen.”

₁₁Wet Dios yok:

–Häp Babilonia laka rey nämla wet ichäjla amehen lefwajnhat. ₁₂Wet aka wichi tä wujpey oyachajiyela häp nifwotas tä lajit lep'altsenyaja. Häp tä hin'äfwlhatla häp Egipto wet lepes t'at tä lewujyaj ihi, wet nofwila aka wichi tä wujpey. ₁₃Otäyhthila nilhokej itshätäy tä yike inät tä iyäyej, wet hin'ol lhäy'e itshätäy nemla hich'oyhtejiche inät häp lepach'ol tä t'äseji, tsi nemla ichehen. ₁₄Wet häp tä nech'e inät isathichela, wet tewok lhayis iläfwenhichehena tehlat iwoye aceite. Olham tä ohäpe Dios tä matche olhämet täja. ₁₅Chik nichäthiyela lewhäy tä owelanhat ts'anisej häp Egipto, wet otäyhthen nilhokej wichi tä ihi wet nemhit lhele ihi honhat, wet häp tä nech'e õ'hanhiyeja tä olham tä ohäpe Dios.

₁₆“Häp täja häp wichi tä elh ileyej honhat letenek, wet nilhokhiyeja häp atsinhay tä ihiche honhates iyhäj tä lhamel itenla n'otenekna tä y'äynhila Egipto lhäy'e laka wichi tä wujpey. Olham tä ohäpe Dios tä matche olhämet täja.”

₁₇Häp nekchämtso tä doce, wet iwel'a tä doce, wet ifwala tä quince, häp tä Lhawuk tahuy n'oyej wet yok:

₁₈–Hin'o, is chik leten häp wichi tä elh ileyej honhat letenek, wet äy'e atsinhay tä tälhe honhates iyhäj. Amel äyen häp wichi tä wujpey tä lew'et Egipto, lhäy'e laka niyatey. Oyaykwe,

₂₀“Egipto lheley tiyäjla honhatch'oye, tan'isiyeja t'at häp wichi tä õ'länhen tä ihi n'oka'tshayaj. Wak'alh t'at häp n'ofwajnhat tä õ'länhiyejena, wet wujla'pey Egipto lheley tä y'inhihena. ₂₁Niyatey tä takhajayhen tä pajche ihi n'ot'ilek niyatyajw'et, lhamel yämhiyejawethä Egipto lheley lhäy'e häp wichi tä lhaip'ajtej lhamel. Wet yohlakwe, Nech'e lhamel nichätho n'ot'ilek niyatyajw'et. Nech'e lep'itseyhay imätpe häp wichi tä kahäpeya Dios laka wichi lep'itseyhay, wichi p'ante õ'länhen tä ihi n'oka'tshayaj.

₂₂“Lhek yahinya häp Asiria lhäy'e nilhokej laka wichi tä pajche lep'itseyhay lew'etes ihi t'at n'otilek niyatyajw'et. Nilhokej lhamel pajche y'inhen tä ihi n'oka'tshayaj, ₂₃wet lep'itseyhay häp tä õ'thatho lew'etes tä lhäy'e lhip tä atoschehchä. Ifwalas tä pajche wichi tä kamaj n'ilahen wuj tä nowaye lhamel, mat tä paj wet lhamel Asirio lhayis tä õ'länhen tä ihi n'oka'tshayaj, wet ifwalasna lhamel ihi t'at honhat tä n'op'itseyhay lew'et.

₂₄“Äpte lhek yahinya häp Elam wet nilhokej laka sip'älis tä ihi lep'itseyhayw'etes. Tä häpe wichi tä kahäpeya Dios laka wichi, õ'länhen tä ihi n'oka'tshayaj wet tiyäj honhatch'oye. Ifwalas tä pajche wichi tä kamaj n'ilahen wuj tä nowaye lhamel, mat athana nemhit len'ohyaj ihi tä iyej wichi tä ihi honhat tä n'op'itseyhay lew'et. ₂₅Tä Elam laka sip'älis kahäpeya Dios laka wichi, wet õ'länhen lhamel tä ihi n'oka'tshayaj wet lep'itseyhay ihi t'at n'ot'ilekw'et. Ifwalas tä pajche wichi tä kamaj n'ilahen wuj tä nowaye lhamel, mat athana lhamel Elam lheley nemhit len'ohyaj ihi tä iyej wichi tä ihi honhat tä n'op'itseyhay lew'et, wet lhamel iyej t'at häp wichi tä pajche õ'länhen.

₂₆“Wet lhek yahinya häp Mesec lhäy'e Tubal, wet lhäy'e nilhokej lhamel laka sip'älis, tä pajche lep'itseyhay lew'etes ihi t'at n'ot'ilek niyatyaj. Lhamel häpehen t'at häp wichi tä kahäpeya Dios laka wichi. Ifwalas tä pajche wichi tä kamaj n'ilahen wuj tä nowaye lhamel, mat tä paj wet lhamel Mesec lheley lhäy'e Tubal lheley tä õ'länhen tä ihi n'oka'tshayaj. ₂₇Wet tä õtjänlä lhamel, õ'tihiyejt'a wichi tä pajchehen tä n'oka'tshayajwos tä wuj tä takhajayhen lep'itseyhay. Häp hin'ol tä pajchehenna õ'thatehte laka'tshayajchal lep'itseyhay tä lhamel tiyäje n'ot'ilekw'et. Häp lefwajnhates õ'tichufwi lhethey, wet laka'tshayajchal tä hip'oyej letapehen häp tä õhp'oyejpe lep'itseyhay. Ifwalas tä kamaj iläyhen lhamel, wichi wuj tä nowaye.

₂₈“Wet am tä ahäpe Egipto kaniyat, hap'itsek õ'thathiyela wichi tä kahäpeya Lhawuk laka wichi lep'itseyhay, wet wasihila hap'itsek tä iyej wichi tä õ'länhen tä ihi n'oka'tshayaj.

₂₉“Wet lhek yahinya häp Edom, lhäy'e laka reyes, wet lhäy'e nilhokej häp leniyatfwas. Tej tä häpehen mhaji wichi tä takhajayhen, tha hap'akej t'at wichi tä õ'länhen tä ihi n'oka'tshayaj. Wet lhamel lep'itseyhay iyej t'at häp wichi tä kahäpeya Dios laka wichi lep'itseyhay tä õ'häne n'ot'ilek lew'et.

₃₀“Wet lhek yahinya häp wichi tä niyatey tä tälhe honhates tä itafwojyhiye, wet lhäy'e wichi iyhäj tä Sidón lheley. Tej tä häpehen mhaji wichi tä takhajayhen wet iyhäj wichi wuj tä nowaye, mat athana tan'isej t'at häp wichi tä õ'länhen tä ihi n'oka'tshayaj, wet nemhit len'ohyaj ihi, tiyäj honhatch'oye. Wet tä äp häpehen t'at wichi tä kahäpeya Dios laka wichi, hich'atej tä õ'tech'aynej t'at häp wichi chik lajit lahaya, wet õtjänchehlä, õ'tiyej t'at wichi tä y'inhen tä ihi n'oka'tshayaj tä lhamel tiyäje n'ot'ilek lew'et.

₃₁“Wet chik Egipto kaniyat hiw'enla tä nofwej häp wichi tä wujpeyna tä y'inhen, wet lham akäjiyejlhila. Tsi pajche õ'länte lham tä ihi n'oka'tshayaj, lhäy'e laka nifwotas. Olham tä ohäpe Dios tä matche olhämet täja. ₃₂Egipto kaniyat olham tä otch'anlhayehte tä wichi tä kamaj n'ilahen lhamel nowaye. Wet nech'e häp tä tamenej tä äp otch'anlhaye chik lep'itsek iyej häp wichi tä kahäpeya olham oka wichi lep'itseyhay, wet äpte hap'akej t'at wichi tä õ'länhen tä ihi n'oka'tshayaj lep'itseyhay. Wet lham laka sip'älis tä wujpey tan'isej t'at häp lham. Olham tä ohäpe Dios tä matche olhämet täja.”