Ezeq 34

₁Lhawuk tahuy n'oyej wet yok:

₂–Hin'o, en ämeta olhämet tä ottayhlä Israel lhayis laka tson'ataswos wet lhok, “Lhawuk Dios lhämet yok, ¡Awit'äy i'amejen häp amel tä ahäpehen Israel lhayis laka tson'ataswos, häp tä ts'ilak at amel tä alechunnhen! ¿Hä tson'ataswos kalechumeta tä ichunhanwethä häp leläy? ₃Amel leyäyej lakat'os, wet lhenay haw'uya lew'ole, wet lelänhen iyhäj tä matche tä yätajen wet häp tä letufway t'isanis, mat tek let'uyehen häp tson'atas. ₄Amel tek letach'otehen aläy tä laj lakhajyhayaja, wet lew'enhihot'a kacha häp iyhäj tä t'inhayaj ilänhen, wet tek lhäyitlhi takälä chik ichä, wet lenachajiyet'a lehi häp elh tä nitpila, wet let'uhikwet'a iyhäj tä wetahen. Matche tä lew'enho leteläythayaj lhamel, wet letihiyejt'a hap'altsenyaj. ₅Häp olham oläy tson'atas lajit lewoya, w'et ifwtsat'atpehen honhat, wet itshätäy tä fwitses tufwen. ₆Häp lhamel ifwtsatpehen nilhokej chenhas wet nilhokej honhatil tä lhamel ihiche, tsi wetahen wet newache hin'o chik häpe chik yen lhakliya häpkhilek t'ukwe.

₇“Amel tä ahäpehen tson'ataswos, ch'ahuyaye olhämet tä otahuy amejen tä oyok, _8-10Olham tä ohäpe Awuk Dios tä n'ilataj, matche tä oayen otayhfwasa'pe oläy. Tsi tä laj lewoya lhamel, wet häp tä itshätäy tä fwitses ilänhen wet tufwen. Amel tä oka tson'ataswos let'uhikwet'a oläy tä tatäywethä, ts'ilak at amel tä let'u amehen wet let'uhiyet'a oläy. Häp tä tamenej tä one'tek letach'ahuyaye olhämet tä yok, Olham tä ohäpe Awuk Dios matche tä ottay ahilähen tä ahäpe tson'ataswos, tsi otum amehenpe oläy tä amel kat'uyaye. Wet osohla amejen tä oayen lewosa oläy, häpkhilek nemhit ts'ilak amel tä lehanej lewoyneja chik let'u amehen. Ofwayhthila amejen oläy, häpkhilek nemhit letufwen.

₁₁“Olham tä ohäpe Awuk Dios oyok, Nech'e olhamla t'at chik ot'ukwe oläy wet olhamla t'at chik otetshan. ₁₂Otehlat iwoye tson'ataswo tä matche tä nilhak'alejlhi leläy tä ifwtsatpehen honhat. Olham tä otetshanhila oläy wet ot'uhikwela lhamel. Ofwayhthiyeja honhates tä lhamel ifwtsatpehen häp ifwalahte lhamel lewit'äyhyaj tä hip'o'pe tet iwoye pule tä ichalaj. ₁₃Otonhiphäla tä ihiche honhates tä kalew'eta, wet onachajiyela honhat tä lew'et. Wet ohutlawek lhamel wet ochunhanhilawethä, ohänhiyela chenhas tä ihi Israel, lhäy'e häp tewok lhayis, wet lhäy'e nilhokej lhipey tä wichi ihiche. ₁₄Ochunhanhilawethä, ohänhiyela hup tä w'atshan, häp hup tä i'pe chenhas tä atoschephä tä ihi Israel. Wet lhamel iwohla t'elakw'etesa chik ihi honhattso, wet tufwila häp hup tä is wet w'atshan wet akäj. ₁₅Wet matche tä olhamla t'at chik ot'uhiyela oläy tson'atas, wet ohänhiyela honhat tä lhamel iwohla t'elakw'etesahi. Olham tä ohäpe Lewuk Dios olhämet täja. ₁₆Ot'uhikwela iyhäj tä wetahen wet onachajiyela lehi häp elh tä nitpila. Wet elh chik takälä ichä, wet oyäythilhila, wet otch'othiyela häp iyhäj tä laj lakhajyhayaja. Mat otäyhthila iyhäj tä yätajen lhäy'e tä takhajayhen, wet owohiyejela lhamel m'ak tä t'uhawetej lakeyis tä ni'isahen tä iwoye.

₁₇“Olham tä ohäpe Awuk Dios oyok, Ch'ahuyay n'oye, amel tä oaleläy tson'atas lhäy'e kayla lhayis. Okalelhthilahchä amel, ow'enhatla iyhäj tä isen tä iyej iyhäj tä ni'isahen. ₁₈¿Hä ninayaya häp hup tä is tä letufw, wet let'äsche lhip tä imälhehi? ¿Hä ninayaya inät tä is tä leyäyej, wet lech'oyhteji apach'ol häp lhip tä imälhehi? ₁₉Oläy tufw at häp hup tä amel let'äsche wet iyäyej at inät tä amel lech'oyhteji apach'ol. ₂₀Häp tä tamenej tä olham tä ohäpe Awuk Dios oyok, Olham okalelhthilahchä häp tson'atas tä yätajen lhäy'e iyhäj tä ilopenhen. ₂₁Amel letafwomejwethä iyhäj tä laj lakhajyhayaja, wet lenhäpäjejwethä hach'ul häp lhamel wet letamenej tä yikhen. ₂₂Mat olham tä ofwayhthihena oläy wet nemhit otch'anlhaye chik õ'länhen. Okalelhthilahchä lhamel, ow'enhatla iyhäj tä isen tä iyej iyhäj tä ni'isahen. ₂₃Wet ot'änhiyela elh tä tet iwoye okawo David häpkhilek niyatej lhamel, wet äp oyämla tefwaj'atni häp lham chik oyenla oläy lewoya. Wet lham tä t'uhiyela lhamel. ₂₄Wet olham ohäpehila lhamel Lewuk Dios, wet okawotso häp tä häpehila laka niyat. Olham tä ohäpe lhamel Lewuk olhämet täja. ₂₅Wet oyämla matche tä häpe oläy häpkhilek letamsek ihi. Wet otäyhthila nilhokej häp itshätäy tä fwitses tä ihi honhat tä lhamel yen lew'etesa, häpkhilek matche tä letamsek ihi oläy tson'atas tä ihi honhat tä tsajphä, wet newache m'ak chik ilhaklit tä imähen tä ihi tayhi.

₂₆“Wet ohänhiyela honhat lhipey tä ilunejlhi oka chenaj tä ot'amajchet, wet oyenla okäpfwayajayej pelhay tä ochenhiyela lhamel häp lewhäypej tä lhamel iwatlä. ₂₇Wet häp hal'äy iwohla lhaya, wet wujla yachuyaj tä wichi ilanhi, wet matche tä letamsek ihihila tä lhamel ihi laka honhat. Chik ofwayhthiyeja n'okwenkanyaj oka wichi, wet häp tä nech'e lhamel ihanhiyeja tä ohäpe Lewuk Dios. ₂₈Häp wichi tä tälhe iyhäj honhates nemhit ihanhiyeja iwoyneja chik lhayenla lewuhuya lhamel, wet itshätäy tä fwitses nemhit tufwen. Matche tä lhamel iwohlat letamsekisa, wet newache m'ak chik istunlawethä. ₂₉Wet otkäpfwayhiyela honhat häpkhilek lhamel tutcheyhen wet nemla nehläs ilänhen. Wet wichi tä ihiche honhates iyhäj nemla itiyej leläkwyhanyaj häp lhamel. ₃₀Wet häp tä nech'e lhamel ihanhiyeja tä olham tä ohäpe Lewuk Dios wet oiyej t'at häp lhamel, tsi oka wichi t'at Israel lhayis. Olham tä ohäpe Lewuk Dios olhämet täja.

₃₁“Amel ahäpehen oläy tson'atas, häp tson'atas tä häpehen oka wichi, wet oaichunhanwethä. Wet olham tä ohäpe t'at amel aka Dios. Olham tä ohäpe Awuk häp tä tetso olhämet tä owoye.”