Ezeq 44

₁Wet häp hin'o tä ipäyen n'oye Lhawuk Lewukwe lhipey äp yachajo tä ihän n'oye lepe tä i'alhoye tä tumej lhip tä ifwala inuhiphä. Wet ow'en tä õhp'ohi. ₂Wet häp tä Lhawuk tahuy n'oyej tä yok:

–Häp lepena is chik t'oyhi nilhokej ifwalas, häpkhilek newache elh chik häpe chik tiyäjche. Tsi olham tä ohäpe Dios tä Israel lhayis Lewuk pajchemat otiyäjche lepena tä ohochufwi Owukwe. ₃Mat tajlhama häp hin'o tä wichi laka niyat häp tä tatayhiphälachufwi wet tufwila lhäk tä n'ot'amajchet tä ihi tä olham ottache. Mat ts'ilakhila t'at hupch'o elh tä tsajo tä tumejlä Owukwe lepe tä i'alhoye, lepe häp tä is chik tiyäjche. Wet chik inuphä, wet äp kamaj tälhichela lepetso.

₄Wet häp hin'o äp ihän n'oye lepe tä tumej tafwojyhiye tä tatayhlä Lhawuk Lewukwe. Wet tä oyahinphä, ow'en Lhawuk lewujyaj tä isi, tapoyej tä ichufwi Lewukwe, wet ot'upeyhchä pajtha otacho tiji honhat. ₅Wet häp tä Lhawuk tahuy n'oyej tä yok:

–Hin'o, untejiche atey tä leyahin m'ak tä lew'en, wet äm matche tä letach'ahuye nilhokej häp m'ak tä ofwel amho tä häpe leyes tä õyen keyayej Owukwe, lhäy'e häp wichi tä owahnej chik tiyäjchufwi Owukwe, lhäy'e häp iyhäj tä n'am wahnej chik tiyäjchufwi. ₆Is chik lefwenho olhämtes häp Israel lhayis tä tatay n'ohlä tä oyok, “Israel lhayis, olham ohäpe Awuk Dios. Naya t'at häp amel akeyis tä matche tä oy'ulhan atapehen tä lewoyaye. ₇Tsi häp tä lhenhit'a amajcheta Owukwe tä lewahinchufwi wichi tä tälhe iyhäj honhatil tä n'otetnek tä n'olhijtsek newayej t'isanis lhäy'e tä newayej lehusey. Tä amel lhen otw'ayhata itshäwet t'alhäs lhäy'e lew'oyis, wet häp tä wichi tä akachuhantsestso ihochufwi Owukwe wet nech'e nemhit häpe hup tä n'ot'amajchet. Matche tä amel lenäk'äs olhämette owoyej amehen, tsi häp tä lewoye akeyis tä hich'atej tä ni'isahen. ₈Wet amel lhenhilhit'a achumet tä n'ot'amajchet tä ihi Owukwe, wet lhachaje wichi iyhäjtso häpkhilek lhamel tä yenlhi.

₉“Häp tä tamenej tä olham tä ohäpe amel Awuk Dios oyok, Isit'ak wichi tä w'enha lhamejen ihochufwi Owukwe. Elh chik häpe tä tälhe honhat elh tä n'otetnek tä n'olhijtsek newayej t'isan lhäy'e tä newayej lehusek, tek owahinchufwi Owukwe. Wet elh tä kahäpeya Israel tä lew'et Israel lhayis kahonhat, äpte tek owahinchufwi Owukwe.”

₁₀Wet Lhawuk äp tahuy n'oyej tä yok:

–Häp Leví lhayis ilehte n'oyej tä iyhäj Israel lhayis ileyej tä ihänlhin'o, yik n'och'oye wet n'okwiyej n'ocheyälis. Wet is chik Leví lhayis tiskanpe lech'isukyajay tä iwoye. ₁₁Häpkhilek ts'ilak tä t'uye Owukwe lepelis, wet lhäy'e iyhäj häp lechumtes tä kahäpeya n'ot'amajchetes tä ihi Owukwe. Wet lhamel ilänhihena itshätäy tä õ'wunhomche tä õyen otw'ayhtesa, lhäy'e iyhäj itshätäy tä wichi yen n'okhayaja n'oyej. Wet äpte is chik nilhokej ifwalas tä wak'alhen t'at häpkhilek iwoye lechumet tä tach'ote wichi. ₁₂Lhamel lhayente lewosa n'on'okhayaj tä õn'okwiyej n'ocheyälis, wet häp tä iwetahat Israel lhayis. Häp tä tamenej tä olham tä ohäpe Lewuk Dios otiyejphä otkwey olhämet tä ot'unhatche wet oyok, Leví lhayis tiskanlatpe lech'isukyajay. ₁₃Wet häp tä iwohiyet'a chik lhaitott'ayen n'oye, tsi isit'a chik yenlhi sacerdote lechumet. Wet nemhit iwoye chik lhaitott'ayne m'ayhay tä n'ot'amajchetes tä olham tä Olewuk, tsi nemhit len'ohyaj ihi, häp lakeyis tä hich'atej tä ni'isa tä iwoye häp tä tamenej. ₁₄Wet olham nech'e oyen häpeya häp wichi tä t'uye Owukwe, lhäy'e nilhokej iyhäj häp n'ochumtes tä kahäpeya n'ot'amajchetes tä ihi Owukwe.

₁₅“Mat häp Leví lhayis tä häpehen sacerdotes tä letes häp Sadoc, tej tä Israel lhayis ilehte n'oyej, tha kamaj lhamel tujlhache t'at tä iwo lechumeta tä ihi Owukwe. Wet häp tä tamenej tä is chik lhamel kamaj tujlhache t'at tä lhaitott'ayen n'oye wet tach'ote ochumet, wet yenla otw'ayhata itshäwet t'alhä lhäy'e lew'oyis tä wichi ihän alhoho. Olham tä ohäpe Lewuk Dios olhämet täja. ₁₆Wet lhamel tiyäjlachufwi Owukwe wet ihohiyela oka altar tä tach'ote ochumet. Tsi lhamel tä oyen lechumeta häp ochumet tä ihi Owukwe.

₁₇“Wet chik lhamel tiyäjche lepe tä tataye hup ka'alho tä ilech'oye hup, is chik lhamel taw'uyhiche lew'uyis tä wesaj tä lino. Tsi chik lhamel iwo lechumeta tä ihi Owukwe wok hup ka'alho tä ilech'oye hup, isit'a chik lhamel taw'uyhiche lew'uyis tä häpe häp wesaj tä tälhe tson'ataj w'ole. ₁₈Wet häp wile tä lhamel yen lhetekp'ota, is chik kamaj äp häpe t'at wesaj tä lino. Wet häp lekoset les äpte is chik häpe wesaj tä lino, wet isit'ak yäyit lhamej lakawakay häpkhilek chufw niläna. ₁₉Wet chik lhamel inukwephä tä ichufwi häp hup wet ihoye lhip tä wichi lhaihuthiwek, is chik lhamel ilanche lakhäy tä taw'uyhiche tä tach'ote ochumet, wet hin'äyhlachufwi häp hup lech'ol iyhäj tä ot'amajchetes, wet iwohla lew'uyis iyhäja, häpkhilek wileytso tä ot'amajchetes nitijayej wichi.

₂₀“Wet häp sacerdotes isit'ak yähäs lhetek w'ole, wet äpte isit'ak lew'oley pites. Is chik t'amajej tä yisetche. ₂₁Wet chik tiyäjchufwi Owukwech'o ka'alho lhip tä ilech'oye hup, isit'ak iyäyej hat'es. ₂₂Wet isit'ak iyej atsinha tä tesa wet äpte isit'ak iyej atsinha tä n'owomek. Mat is chik iyej häp Israel lhayis ka'tsinha tä kamaj kan'och'efwaya, wok häp tesa tä sacerdote tä lech'efwa p'ante.

₂₃“Häp sacerdotes is chik ichufwenej oka wichi tä hiw'enhatlä m'ak tä n'ot'amajchet häp m'ak tä kan'ot'amajcheta, wet lhäy'e m'ak tä is lhäy'e häp m'ak tä kok'aye tä is chik lhamel hiw'enhathen. ₂₄Wet chik iche wichi chik tataywek, is chik sacerdotes tä itetshan. Wet chik iwo lakalelhthayajayej wichina, is chik nitichunejche olham olhämtes tä ihi lehi. Wet äpte lhamel tä oyen lewosayej wichi lakäjyajay chik nichätepej ifwalas tä oyen lewhäya. Wet chik lhamel itetshan, is chik nitichunejche nilhokej häp olhämtes lhäy'e ochufwenyajay tä yäme n'okäjyaj. Wet äpte is chik yen t'amajchetesa ifwalas tä oyen n'ot'elakw'eta.

₂₅“Sacerdotes iwohiyet'ak tachuma häp elh p'itsek tsi häp tä kok'ahiyejela. Tha mat chik lajcha wok lako, wok lhäs wok lhäse, wok lech'inij, wok lech'inhä tä kamaj laj lech'efwaya, häp tä tej chik kok'ayeje, tha is t'at chik tachuma t'at, ₂₆mat is chik lhailejlhi. Chik tajyäme täja, is chik tataye pajla'tha siete ifwalas, ₂₇wet nech'e iwoye tä ihoye hup ka'alho lhip tä ilech'oye Owukwe. Wet chik kamaj nitchumaye lechumet, is chik tiskan'ajpe lech'isukyaj tä iwoye. Is chik ilän itshäwet tä yen otw'ayhata. Olham tä ohäpe Lewuk Dios olhämet täja.

₂₈“Wet häp sacerdotes ihichet'a m'ak tä lewuk lakäywet tä tälhe lajcha, tsi olham tä lakäywetn'o. Ihichet'a honhat lhip chik häpe chik ihi Israel chik õyenla lewuka. ₂₉Lhamel tufwila yachuyaj lhay tä Israel lhayis yen otw'ayhata, lhäy'e häp itshätäy tä õ'länhen tä õtiskanejpe lech'isukyajay lhäy'e letes tä ihi. Wet nilhokej häp m'ak tä Israel lhayis yen t'amajcheta n'oyej, sacerdotes t'at tä lhäk täja. ₃₀Wet nilhokej yachuyaj lhay tä ichun tä iche tä isis, häp tä amel lew'enhihola häp sacerdotes, wet nilhokej häp m'ak tä lhen otw'ayhata, lhamel tä lewuk lhip tä matche tä isilataj. Wet chik amel lechofwaji yachuyaj lhoy, wet lhip tä matche tä is häp tä is chik lew'enho häp sacerdotes. Wet häp tä olham otkäpfwayhiyejela m'ak tä is nilhokej häp amel haw'etes. ₃₁Wet sacerdotes isit'ak tufw afwenche wok itshäwet tä nilhoke chik y'il, wok häp itshäwet tä fwitsaj lelänek.