Häp honhat lhip tä õyen t'amajchetayej Lhawuk
1“Chik amel lech'esajen honhat tä lew'enhomche Israel lhayis, häp lhamel tä tälhehen doce letetsel, is chik lew'enhat n'oyej lhip tä doce kilómetros y medio tä pitaj wet diez kilómetros tä tsajo, häpkhilek ot'amajchet t'at, tsi olham ohäpe Awuk Dios. Nilhokej häp honhat lhiptso häpkhila oka honhat tä ot'amajchet. 2Wet nech'e häp tä amel äp lhenhilhila lhip tä let'amajejo olham Owukwe, doscientos cincuenta metros tä pitaj wet doscientos cincuenta metros tä tsajo. Wet ihichela lhip tä ilunejlhi tä hup tä w'atshan i'pe, wet hiw'enla veinticinco metros tä tsajche. 3Wet häp lhip tä amel let'amajej n'oho, is chik äp lekalelhätchä lhip tä matche tä ot'amajchet, doce kilómetros y medio tä pitaj wet cinco kilómetros tä tsajo. Wet häp tä Owukwe ihihila. 4Wet häp honhat lhiptso, sacerdotes tä lhaitott'ayen n'oye wet tach'ote ochumet tä ihi Owukwe, häp tä lhamel yenla lew'eta wet itihihichela lewukwey. Wet häpe honhat tä ot'amajchet, tsi häp tä õt'amajejo Owukwe. 5Wet äpte is chik iche honhat lhip tä õt'amajejo Leví lhayis tä tach'ote ochumet tä ihi Owukwe, häpkhilek te lhamel laka hupuy ihiche tä yenla lew'etesa, doce kilómetros y medio tä pitaj wet cinco kilómetros tä tsajo. 6Wet chik tajyäme täja, wet is chik nech'e amel letetshan häp lhip tä õ'tihihila hupuy tä lewuk nilhokej Israel lhayis, doce kilómetros y medio tä pitaj wet dos y medio tä tsajo, wet is chik ifwache t'at honhat lhip tä ot'amajchet.
Honhat lhip tä õt'amajejo wichi laka niyat
7“Wet äpte is chik iche täkwfwas honhat lhipey tä amel let'amajejo häp Israel lhayis laka niyat. Wet is chik tumej lhip tä ifwala inuhiphä wet lhip elh honhat is chik tumej tä ifwala y'uyhi. Wok oyok, honhat lhip tä ot'amajchet ihihila lechowej, lhäy'e häp lhip tä õt'amajejo Israel lhayis laka hupuy. Tälhe lhip tä ifwala inuhiphä pajla'tha nichäte lhip tä ifwala y'uyhi, w'awulhihila tä pitaj häp honhat tä õhw'enhatej Israel lhayis tä tälhe letes tefwajpejni. 8Häp honhat lhipeyna häp tä õt'amajejo Israel lhayis kaniyat. Wet häp tä nemhit ihanhiyeja iwoyneja chik isohiyeja m'ak tä lewuk oka wichi, mat tach'anlhahiyela t'at chik ihi honhat tä laka honhatpej.
M'ak tä t'uhawetej chik niyat iwoye
9“Olham tä ohäpe Awuk Dios oyok, Amel tä ahäpehen Israel lhayis kaniyatey, ¡naya häp m'ak tä ni'isa tä lewoyayeje lhamel! ¡Isit'a tä katach'anlhayaye wet lesoyej m'ak tä lewuk lhamel! ¡Woyaye m'ak tä is alhoho! ¡Yej soyej oka wichi häp laka honhates tä lhamel tä lewuhuy! Olham tä ohäpe Lewuk Dios olhämet täja.
10“Is chik amel lechumyenwethä n'okaw'awlhanthis tä isen lhäy'e n'okaw'awlhanhatchal tä matchehen. 11-12Wet häp n'okaw'awlhanthi tä letetshanej yachuyaj lhoy, is chik tet iwoye n'okaw'awlhanthi tä letetshanej häp m'ak tä isathi tä lewom.
13“Häp tähesna n'otw'ayhtes tä is chik amel lew'en n'oho: Häp trigo lhäy'e cebada tä lelanhi tä tälho alafwek, tihipeja sesenta lhipey tä lech'esajen, wet chumala lhip tefwaji wet häp tä lhenla otw'ayhata. 14Wet aceite is chik letihipeja cien, wet häp tä letachumhiyepeja tefwaji wet lhenla otw'ayhata. 15Wet häp tson'atas is chik letachumapej doscientos, wet lew'enpej n'oho tefwaji tä tälhe t'ekhawtes tä hup tä w'atshan ihi tä ihi Israel. Is chik lechäj alhoho yachuyaj lhay, lhäy'e itshätäy tä lewunhomche, lhäy'e häp itshätäy tä lelänhen häpkhilek ale'isyen n'oye. Wet chik mälhyejtso m'ak tä lewoyaye, wet häp tä olham otäyhthila hach'isukyajay. Olham tä ohäpe Awuk Dios olhämet täja.
16“Nilhokej häp wichi tä ihi honhatna tä iwohiyet'a chik nenalhi häp n'otw'ayhtesna, häpkhilek lhamel yachaje laka niyat. 17Wet chik nichätepej tä iwel'a nech'ayek, lhäy'e häp ifwalas tä n'ot'elakw'etes, wet lhäy'e nilhokej ifwalas tä lewhäy häp Israel lhayis lakäjyajay tä iwoye, niyat lhamlak iwom häp itshätäy häpkhilek õ'wunhomche, lhäy'e häp yachuyaj lhay lhäy'e hat'es tä häpe otw'ayhtes. Wet äpte lhamlak iwom itshätäy tä õtiskanejpe n'och'isukyajay, lhäy'e n'otw'ayhtes tä häpe yachuyaj lhay, lhäy'e häp itshätäy tä õ'wunhomche, wet lhäy'e itshätäy tä õ'länhen häpkhilek wichi lha'isyen n'oye. Is chik niyat iwoynejatso, häpkhilek otäyhtejen letes tä ihihlä häp Israel lhayis lech'isukyajay tä iwoyehen.
N'okäjyajay
18“Olham tä ohäpe Awuk Dios oyok, Häp iwel'a tä ichun wet ifwala tä ichun, is chik amel lelän tolo lhäs tä pumfwetaj tä isilataj tä newache m'ak chik iyej, wet en otw'ayhata. Wet häp tä nech'e nofwila tä kok'aye Owukwe wet nech'e häpe ot'amajchet. 19Wet sacerdote tachumhiyela lhip lew'oyis häp itshäwetna tä õ'länpe n'och'isukyaj, wet y'ilenhichehena Owukwe lepe ch'utey, lhäy'e altar letselhäs tä ihi cuatro, lhäy'e häp hup ka'alho lepe ch'utey tä ilech'oye Owukwe. 20Wet äpte chik nichäte iwel'a tä siete wet ifwala tä ichun, is chik lewoynejatso m'ak tä lewoye häpkhilek wichi tä iwoye lech'isukyajay tä kalenech'ethayaja isej, lhäy'e häp lech'isukyaj tä nhanahläk iwoye. Wet chik mälhyejtso, wet häp tä nech'e nofwila tä kok'aye Owukwe wet nech'e häpe ot'amajchet.
21“Wet chik nichäte ifwala tä catorce tä ihi iwel'a tä ichun, häp tä is chik amel lewo tesa akäjyaj tä häpe Pascua. Wet siete ifwalas tä nemhit letufwayhla pan tä levadura iyej. 22Wet häp ifwala tä ichuntso, wichi laka niyat yenla otw'ayhata tolo lhäs tä õ'län tä tiskanejpe lham lech'isukyaj lhäy'e häp nilhokej wichi lech'isukyajay. 23Wet n'okäjyajna pajla'tha siete ifwalas, ifwala tefwaji niyat iwomla siete tolo les tä pumfwetas tä isis tä newache m'ak chik iyej, wet ilänla tä yenla otw'ayhata. Wet äpte iwomla siete tson'atas tä hin'ol tä isis tä newache m'ak chik iyej, wet ilänla tä yenla otw'ayhata. Wet äpte ifwala tefwaji ilänla kayla tä hin'o tä tiskanejpe n'och'isukyaj, pajla'tha nofwphä ifwalas tä ihi siete häp n'okäjyaj. 24Wet tolo tefwaji lhäy'e häp tson'ataj tefwaji, niyat y'isiyejpeja diez kilos yachuyaj lhay tä yen otw'ayhtesa wet tres litros y medio aceite.
25“Wet äpte häp n'okäjyaj tä N'ohupelis tä wichi yen lehupelisa hal'ä w'oley, tä iwo tesa tä iwel'a tä siete wet ifwala quince, is chik niyat iwom itshätäy tet iwoye tä iwom tä ihi n'okäjyaj tä Pascua, pajla'tha siete ifwalas. Wet iyhäj itshätäy õ'länhen tä õtiskanejpe n'och'isukyajay, wet iyhäj õ'wunhomche, mälhyej tä iwoye ifwalapej tä Pascua. Wet äpte is chik yachaj n'oye yachuyaj lhay lhäy'e aceite, tet iwoye tä yachaj n'oye ifwalapej tä Pascua.
