Atott'aye t'at ifwala tä Israel lhayis lakapes
1Lhawuk tahuy n'oyej wet yok:
2–Hin'o, olham ohäpe Awuk Dios. Owo silätayej honhat tä Israel lhayis kahonhat tä nichäte lewhäy tä nofw. Imälhewek tä nofwila. 3Israel lhayis, amel lechäte t'at akapes. Nilhok owäkw tä otihla amejen tsi ottay ahilä, otihla amejen ates mälhyej achumtes tä lewoye. Otasnhila atapehen häp akeyis tä hich'atej tä ni'isachehen tä lewoye. 4Owäkw tä otihla amejen ihichet'a chik otäyhthila amejen häp ates tä ihi n'ohlä. Nemla oaip'altsenhen mat oaitasnhilatpe häp m'ak tä ni'isa tä lewoye. Letiskanlatpe akeyis tä hich'atej tä ni'isa tä letatayej n'ohlä, wet häp tä nech'e lehanhiyeja tä ohäpe Awuk Dios.
5“Olham tä ohäpe Awuk Dios oyok, ¡Lhek yahinya, nämhipeja amehen awit'äyhyajay! 6¡Atott'a alhoho lepes! ¡Atott'a alhoho amel akapes! ¡Lhek yahinlä! 7¡Amel tä lhehi honhatna, nek t'at atäyhyaj! Lewhäy athana, atott'at alhoho häp ifwala tä lewhäy tä nemhit amel lehanhiyeja m'ak tä lewoyaye. Nemhit lakäjyaj ihihila häp wichi tä ihi tachenhas. 8Häpe t'at athana tä oti amejen owäkw, pajla'tha nofwej. Tsi ottay ahilä, otihla amejen ates mälhyej achumtes tä lewoye wet otasnhila atapehen häp akeyis tä hich'atej tä ni'isachehen tä lewoye. 9Owäkw tä otihla amejen ihichet'a chik otäyhthila amejen häp ates tä ihi n'ohlä. Nemla oaip'altsenhen mat oaitasnhilatpe häp m'ak tä ni'isa tä lewoye. Letiskanlatpe akeyis tä hich'atej tä ni'isa tä letatayej n'ohlä, wet häp tä nech'e lehanhiyeja tä ohäpe Awuk Dios wet oaitasin.
10“¡Atott'a alhoho ifwala! ¡Näm t'at amel atäyhyaj! ¡Nek t'at otasnhayaj tä otiyej amel tä alechäjwethä! 11Matche tä ni'isa m'ak tä wichi iwoye, lajit lep'altsenyaja. Mat nofwiyeja t'at lhamel, lhäy'e lakäywet, lhäy'e len'ohyaj, niwohit m'ak chik imälhehi. 12Näm t'at häp ifwala tä lhamel lewit'äyhyaj nichätpe. Näm t'at, atott'a alhoho. Elh tä ichäj m'ayhay isit'a chik akäjlhi, wet elh tä iwom laka m'ayhay isit'ak nilhak'alejlhi, tsi owäkw nech'e nichätla'pe nilhokej häp wichi. 13Tsi häp tä elh chik iwom m'ayhay nemhit yachajohlak hiw'en nilhokej ifwalas tä kamaj iläy. Tsi häp tä khit'ala m'ak tä kamatache tä nichätla'pe häp wichi, wet lhamel tä n'och'isukyaj kwenkay akalelhäj tä tek tafwayhiyeja häp t'ilek tä laha m'ak tä ni'isa tä iwoye.
14“Pitsajiyela n'ofwolis tä t'äne wichi tä ihohiyela n'oka'tshayaj. Wet lhamel iwaklhatla nilhokej häp m'ayhay tä ichäj tä ihoye n'oka'tshayaj. Mat ihichet'ala elh chik ihoye n'oka'tshayaj, tsi häp tä olham t'at tä otiyej owäkw häp Israel lhayis. 15Ihichela äytes lhäy'e nehläs tä ihi hupuy, wet lhäy'e n'oka'tshayaj tä ihiyeja wichi tä i'alhoye. Wet wichi chik inuphä tä tälho hupuy wet iho alhoye, y'inhihena tä ihi n'oka'tshayaj. Wet wichi chik nekach'oye hupuy häp tä nehläs lhäy'e äytes ilänhihena. 16Tejlak iche iyhäj wichi chik ihanej lhaiwoynejahen chik lhayämthen, wet ihohla'pe tachenhas tä hätet iwoye häp hokwinatas tä woyhay, kamaj y'inhihena t'at, häp lech'isukyajay tä tamenhiyeja. 17Nilhokhiyeja t'at häp lhamel tä nemhit takweyey takhajayhen, äp tek t'unhichehena, wet lhechey tachetteyhiyejchehena lenowayhyaj. 18Lhamel taw'uyhihichela lew'uyis tä yelaj, tsi häp tä letetnekej tä lhamel wuj tä lelhakli ihi. Wet t'isanis tachetteyhiyejchehena lenowayhyaj, wet len'äfwlhi tä wuj ihla'pe tate'pelis, wet yähäsila lhetek w'oley. 19Lhamel ithathiyela hup kawayhil häp laka oro lhäy'e laka plata, itech'aynhiyejat chik häpe m'ak tä kok'aye. Tsi häp tä oro lhäy'e plata tek ifwayhthiyeja Lhawuk lewäkw chik näme häp lhamel. Tsi oro lhäy'e plata tek isohiyeja nehläs tä ilänhen häp lhamel, matche tä nichuyuhihena. Wet oro lhäy'e plata häp tä tamenej tä lhamel nichätho häp m'ak tä ni'isa. 20Lhamel w'et lhaichäjej'atwethä laka m'ayhay tä isis wet yen lepeykasa lecheyälis tä matche tä ni'isahen tä olham on'äyihomche. Häp tä tamenej tä olham oyenla häpeya m'ak tä kok'aye häp laka m'ayhaytso. 21Olham ochenhiyela wichi tä tälhe honhatil iyhäj, häpkhilek isoyej lhamel laka m'ayhaytso. Wet äp ochenhiyela wichi iyhäj tä lajit lep'altsenyaja, wet häp tä lhayenla lewuhuya lhamel laka m'ayhaytso. Wet häp tä lhamel nech'e itech'aynhiyejat chik häpe m'ak tä kok'aye. 22Olham oyikhilach'oye honhatna wet otch'anlhahiyela t'at häp wichi tä w'et yen m'ayeka häp Owukwe tä Ot'amajchet tä olham tä Olewuk. Nämhihena etantses wet yenla häpeya m'ak tä kan'ot'amajcheta.
23“Enlhi cadena, tsi n'olänyaj tapoyej honhat wet tachum t'at wichi tä ihi hupuy. 24Ot'änhiyela wichi tä tälhe honhatil iyhäj tä lakeyis matche tä ni'isahen, häpkhilek isohen lhamel lewukwey. Wet osohiyeja len'ohyaj häpkhilek nemhit lhaichäjwethä, wet len'okhayajw'etes nemla häpe m'ak tä õyen t'amajchetesa. 25Chik lenowayhyaj näme lhamel, fwetajla t'ukwe letamsek, mat tek nilhokhiyela. 26Ilhahila'pe lewit'äyhyaj chik näme lhamel, wet nilhokej ifwalas lhamel iläthiyela wichi tä ifwel lhamhomche m'ak wit'äyhyaj tä iche. W'et lhamel t'uhikwela häp profetas, t'uhläk ihanej m'ak tä ihichela ifwalas tä tatay alhoho, mat profetas nemhit lew'enhay ihihila. Wet sacerdotes w'et sacerdotes t'at, nemhit ichufwenej olhämtes, wet hin'ol tä thänhäy w'et thänhäy t'at, nemhit ichufwenwethä lhamel. 27Wet niyatey lhamel lefwitajayajay tapohikwela, wet wichi tachetteyhiyejchehena tä inuhat lhamho. Wet m'ak tä olham owohiyejela, mälhyej lakeyis tä iwoye. Okalelhthila lhamel, mälhyej lhamel lakalelhthayaj tä itiyej iyhäj. Wet häp tä nech'e lhamel ihanhiyeja tä olham tä ohäpe häp Lewuk Dios.”
