Esdras 10

₁Esdras itihi honhat lakamchetey tä ihi tä Dios Lew'et tatache. Wet iwo let'alhyaja, ifwenho Dios häp wichi lech'isukyajay wet wuj tä tafwlhi. Wet iche wujpe Israel lhayis, hin'ol, atsinhay, nä'tshas, tä lhamel lhaihutej Esdras, wet nilhokej lhamel wuj tä tafwchehchä. ₂Wet Secanías, Jehiel lhäs tä letes p'ante häpe Elam, lham tahuyej Esdras wet yok:

–Olhamel oleyejte n'amel lhaka Dios, wet oyen ch'efwasa atsinhay tä w'enha lhamej tä häpe wichi tä i'pe honhat leles tsinhay. Mat kamaj lakacha iche Israel. ₃Is chik olhamel owoyeje lhaka Dios häp olhämet tä matche. Is chik ochen wichi tä w'enha lhamej ka'tsinhay tä oyen ch'efwasa, lhäy'e leles. Olhamel owohiyela Dios lhämet, mälhyej tä am lhäy'e wichi tä nowaye Dios ne'tek owoye. ₄Nephä, häp täjtso m'ak tä am achumet. Olhamel otch'otla ame. Akhajyen wet enlhi.

₅Wet Esdras nephä wet takasit. Wet tahuyej sacerdotes tä len'ohyajay ihiche, lhäy'e Leví kawichi, lhäy'e nilhokej Israel lhayis, wet yok:

–¿Chiwoye, hä amel lewohiyela täjtso?

Wichi nichulho wet yok:

–¡Owohiyela!

₆Wet nech'e Esdras yikch'oye tä ihi tä Dios Lew'et tatache, wet ihochufwi Johanán, Eliasib lhäs, lew'et, wet iyej t'at honatsitso. Mat t'ekhit'a wet iyähiyejt'a inät, tsi wuj tä lefwitajayaj ihi tä yen tichunhayaja häp wichi tä ileyej Dios.

₇Tä tajyäme täjtso, Esdras t'äne wichi tä ihi Judá lhäy'e Jerusalén yämthilek nilhokej lhaihutwek tä ihi Jerusalén, häp wichi p'ante letayhfwas ichäje honhat tä kalew'eta. ₈Wet niyatey lhäy'e wichi tä thänhäy, lhamel lhämet yokwe:

–Elh chik häpek nihoyaye iyhäj tä lhaihutwek, chik tajyäme tres ifwalas, is chik õ'soyej nilhokej lakäywet tä iyej wet õ'chen, is tä yikch'oye wichi.

₉Tä mälhyejtso, tä tajyäme tres ifwalas nilhokej hin'ol tä Judá kawichi lhäy'e Benjamín kawichi, lhamel lhaihutwek tä ihi Jerusalén. Häpe t'at iwel'a nueve, ifwala veinte. Wet nilhokej lhamel tatachephä tä iwhäye Dios Lew'et, wet chettichehen tä yen tichunhayaja lhamejen m'ak tä ni'isa tä iwoye, wet äp ikofwahen tsi wuj tä iwomchä. ₁₀Wet nech'e Esdras takasit wet tahuyej wichi wet yok:

–Amel lewoyaye hach'isukyaj tä lhen hach'efwasa atsinhay tä w'enha lhamej. Tä lewoyaye täjtso, let'isayej lhip Israel letes. ₁₁Tä mälhyejtso, afwelejo hach'isukyajay häp Lhawuk, ajchalis laka Dios, wet woyaye lham lenech'ethayaj. Mäyaych'oye wichi tä i'pe honhat wet leyayej tä lhen hach'efwasa laka'tsinhay.

₁₂Wet nilhokej wichi ifwitsenej tä nichulho wet yok:

–Olhamel owohiyela ämet chik häpek lene'tek olhamel owoye. ₁₃Mat lew'en tä wujpey olhamel, wet äp iwomchä, wet isit'ak olhamel oi'alhoye. Tsi täja häpkhit'ak w'awulhihola ifwala tefwajni wok ifwalas täkwfwas, tsi wujpey olhamel tä owoye och'isukyajna. ₁₄Mat is t'at chik ts'ilak olhamel oka niyatey chik ikana, yämthilek elhpej lhamel nich'oleyej t'at iyhäj tä laka wichi. Wet is chik nilhokej wichi tä ihiche hupuy elh tä lech'efwa atsinha tä w'enha lhamej, is chik nämhen chik nichäte ifwala tä lewhäy tä õ'tetshan. Wet is chik hin'ol tä thänhäy nekche, lhäy'e n'okalelhthayajwos tä ihi hupuy tä lhamel lew'et, wet itetshan m'ak tä mälhyejna, yämthilek tafwaytshi Dios lewäk tä iti n'amejenpe häp lhach'isukyajna.

_15-17Wet nilhokej wichi tä ihuminche t'at wet iwoye, yäpnhomche lew'etes. Tajlhama Asael lhäs tä lhey Jonatán, lhäy'e Ticva lhäs tä lhey Jahazías, tä lhamel nhuminache, lhäy'e Mesulam, lhäy'e Leví lhayis elh tä lhey Sabetay.

Wet nech'e sacerdote Esdras itshupyene hin'ol tä thänhäy tä iyhäjpej yen laka niyateya, yämthilek lhamel lhayen lewosa tä itetshan hin'ol tä laka wichi tä lech'efwas atsinhay tä w'enha lhamej. Wet häp iwel'a tä diez, ifwala tä ichun, hin'oltso iwo huseya'pe m'ak tä iwohiyejela lhamel. Wet tä tajyäme tres iwel'as, nech'e wak'alh lechumet.

₁₈Wet häp sacerdotes tä lech'efwas atsinhay tä w'enha lhamej häpehen tähesna:

Iyhäj tä tälhe Jozadac lhäs p'ante lhey Josué lhäy'e lham lepuhfwas. Lhamel lheyis Maasías, Eliezer, Jarib, lhäy'e Gedalías. ₁₉Lhameltso kalelhäj letichunhayaj tä ichen t'at lech'efwas, wet lhamel ilänhen tson'atas tä yen lahaya lech'isukyajay.

₂₀Iyhäj tä letes p'ante Imer, tä lhamel lheyis Hanani lhäy'e Zebadías.

₂₁Iyhäj tä letes p'ante Harim, tä lhamel lheyis Maasías, Elías, Semaías, Jehiel, lhäy'e Uzías.

₂₂Iyhäj tä letes p'ante Pasur, tä lhamel lheyis Elioenay, Maasías, Ismael, Natanael, Jozabad, lhäy'e Elasa.

₂₃Wet iyhäj tä Leví lhayis tä lech'efwas atsinhay tä w'enha lhamej häpehen tähesna:

Jozabad, Simey, Kelaías, wok oyok Kelita, Petaías, Judá, lhäy'e Eliezer.

₂₄Häte elh tä ichoylhi tä lhey Eliasib, lhäy'e iyhäj tä t'uye Dios Lew'et tä lheyis Salum, Telem, lhäy'e Urí.

₂₅Häte iyhäj Israel lhayis tä lech'efwas häpehen atsinhay tä w'enha lhamej häpehen tähesna:

Iyhäj tä letes p'ante Parós, tä lhamel lheyis Ramías, Jezías, Malquías, Mijamín, Eleazar, elh Malquías, lhäy'e Benaías.

₂₆Iyhäj tä letes p'ante Elam, tä lhamel lheyis Matanías, Zacarías, Jehiel, Abdi, Jeremot, lhäy'e Elías.

₂₇Iyhäj tä letes p'ante Zatu, tä lhamel lheyis Elioenay, Eliasib, Matanías, Jeremot, Zabad, lhäy'e Aziza.

₂₈Iyhäj tä letes p'ante Bebay, tä lhamel lheyis Johanán, Hananías, Zabay, lhäy'e Atlay.

₂₉Iyhäj tä letes p'ante Bani, tä lhamel lheyis Mesulam, Maluc, Adaías, Jasub, Seal, lhäy'e Ramot.

₃₀Iyhäj tä letes p'ante Pahat-moab, tä lhamel lheyis Adna, Kelal, Benaías, Maasías, Matanías, Besalel, Binuy, lhäy'e Manasés.

₃₁Iyhäj tä letes p'ante Harim, tä lhamel lheyis Eliezer, Isías, Malquías, Semaías, Simeón, ₃₂Benjamín, Maluc, lhäy'e Semarías.

₃₃Iyhäj tä letes p'ante Hasum, tä lhamel lheyis Matenay, Matata, Zabad, Elifelet, Jeremay, Manasés, lhäy'e Simey.

₃₄Iyhäj tä letes p'ante Bani, tä lhamel lheyis Maday, Amram, Uel, ₃₅Benaías, Bedías, Keluhi, ₃₆Vanías, Meremot, Eliasib, ₃₇Matanías, Matenay, lhäy'e Jaasay.

₃₈Iyhäj tä letes p'ante Binuy, tä lhamel lheyis Simey, ₃₉Selemías, Natán, Adaías, ₄₀Macnadebay, Sasay, Saray, ₄₁Azarel, Selemías, Semarías, ₄₂Salum, Amarías, lhäy'e José.

₄₃Wet iyhäj tä letes p'ante Nebo, tä lhamel lheyis Jeiel, Matatías, Zabad, Zebina, Jadau, Joel, lhäy'e Benaías.

₄₄Nilhokej hin'ol tä lheyis täjtso, häp tä lhamel lech'efwas atsinhay tä w'enha lhamej, mat lhamel ileyejen wet ichen, lhäy'e leles.