Yachajo tä wichi n'okwiyej Dios tä lhamel ihi Jerusalén
1Tä nichäte p'ante iwel'a siete, Israel lhayis nech'e ihiche t'at hupuy tä pajche lew'etes, wet nilhokej lhaihutwek tä ihi Jerusalén. 2Wet Josué, Josadac lhäs, lhäy'e lech'otfwas tä häpehen sacerdotes, lhäy'e Zorobabel tä häpe Salatiel lhäs, lhäy'e lepuhfwas, lhamel yenlhi Israel lhayis laka Dios laka altar yämthilek õ'wunho itshätäy tä õ'länhen, mälhyej tä Dios lakawo Moisés lelesaynek ne'tek wichi iwoye. 3Lhamel yenlhi altar tä t'un, tsi lhamel nowaye t'at wichi tä ihi häp honhat. Wet tä nech'e fwalapej ilänhen itshätäy, lhäy'e tä honaj, wet iwunhomche, iti'pe altartso yämthilek yen n'okhayajayej Lhawuk.
4Häte lhamel iwo lakäjyajayej häp ifwalas tä yen lheya N'ohupelis, mälhyej tä n'olesaynek tä häpe Lhawuk lhämet ne'tek wichi iwoye. Wet ifwalapej lhamel ilänhen itshätäy wet iwunhomche, hiw'awlhatej m'ak tä Lhawuk ne'tek iwoye. 5Häte iche itshätäy iyhäj tä lhamel ilänhen wet iwunhomche ifwalapej, mälhyej tä Lhawuk lhämet ne'tek iwoye, lhäy'e tä iwel'a nech'ayek, lhäy'e ifwalas iyhäj tä õyen käjyajayej häp Lhawuk, lhäy'e m'ak at chik häpek elh t'uhläk yen t'awayhata Lhawuk, häp tä õ'ti'pepej häp altartso. 6Tälhe iwel'a siete, häp ifwala tä ichun, lhamel iwo tesa tä ilänhen itshätäy wet iwunhomche tä yen t'awayhata Lhawuk, tej tä kamaj niwoya tesa tä lhamel inech'aynhi Lhawuk Lew'et.
Albañiles iwo tesa tä inech'aynhi Dios Lew'et
7Wet wichi hiw'enho chinaj t'äj häp hupwos lhäy'e hin'ol tä yen chumeta hal'ä, wet hiw'enho wichi tä ihi Tiro lhäy'e Sidón häp lhäk, lhäy'e hat'es, lhäy'e aceite, yämthilek lhamel inuhatche lewomekitaj häp hal'äy tä pino tä tälhe Líbano pajtha ichätyene Jope, mälhyej tä rey Ciro tä ihi Persia iwahnej lhamel. 8Tä tajyäme nekchäm weihalha lhäy'e iwel'as täkwfwas tä wichi ihi Jerusalén tä yäple, wet nech'e Zorobabel tä häpe Salatiel lhäs, lhäy'e Josué tä häpe Josadac lhäs, lhamel iwo tesa tä inech'aynhi Dios Lew'et, lhäy'e lepuhfwas sacerdotes lhäy'e Leví lhayis, lhäy'e nilhokej iyhäj wichi tä yäple Jerusalén tä tälho honhat tä yen kwenkaya. Wet lhamel yachaje Leví lhayis tä inu'pe veinte nekchämis yämthilek lhamel itetshan häp n'ochumetna. 9Wet lhamel tä itetshan lechumet häpehen Josué lhäy'e leles lhäy'e lepuhfwas, lhäy'e Cadmiel lhäy'e leles, lhäy'e wichi tä tälhe hin'o tä lhey Henadad, lhäy'e Leví lhayis iyhäj. Cadmiel lhäy'e leles lhamel letes p'ante lhey Hodavías.
10Tä nichäte ifwala tä õyenlhi lefwetes häp Lhawuk Lew'et, wet sacerdotes y'uchehen lew'uyis tä sacerdote w'uyis. Wet tä hupwos yenlhi lefwetes, sacerdotes takasthen, ichäjwethä lefwolis trompetas, wet Leví lhayis tä tälhe letes Asaf, lhamel ichäjwethä chinaj lhipey tä y'ajwek yämthilek iwunit häp Lhawuk, mälhyej tä rey David p'ante ne'tek Israel lhayis iwoye. 11Iyhäj ichoywethä tä iwunit Lhawuk, wet iyhäj yok:
“N'awunit Lhawuk tsi lham häp tä hap'altsentsaj,
wet lehumnhayaj tä itiyej Israel lhayis tek tatäy.”
Wet nilhokej wichi t'änhen tä iwujyen häp Lhawuk, tä lewos iwo tesa tä yenlhi lefwetes Lhawuk Lewukwe. 12Wet wujpe sacerdotes lhäy'e Leví lhayis, lhäy'e hin'ol tä thänhäy, wet nech'e häpehen hin'ol tä hich'uthen tä lhamel hiw'en p'ante Dios Lew'et tä ichun. Wet lhamel ifwitsenej tä tafwchehchä tä hiw'en tä õ'wo tesa tä õyenlhi lefwetes Dios Lewukwe tä õ'nech'aynhi. Wet wujpe iyhäj tä t'änhen tä akäswethä. 13Wet kalelhäjit'a lepak häp iyhäj tä tafwchehchä, tsi wujpey wichi tä nichulhwek tä t'änhen tä akäswethä. Wet wichi tä lew'etes atosehen iläte t'at.
