Esdras 9

₁Tä wak'alh p'ante m'ayhay tä wichi yenlhi, niyatey iho n'oye wet lhamel yok:

–Israel lhayis, lhäy'e sacerdotes, lhäy'e Leví kawichi, lhamel nemhit w'enha lhamejlä wichi tä i'pe honhat. Oyäme wichi tä Canaán lhayis, Het lhayis, Ferez lhayis, Jebús lhayis, Amón lhayis, Moab lhayis, lhäy'e wichi tä lew'et Egipto, lhäy'e Amorreo lhayis. Lhamel hiw'en at thayej tä wuj lakeyis tä ni'isa tä wichitso iwoye, mat lhamel ihumin t'at. ₂Lhamel lhäy'e leles yen lech'efwasa wichitso leles tsinhay, wet Dios laka wichi tä t'amajchet lhayej t'at wichi tä w'enha lhamej. Wet lhamel tä ichun tä iwoye m'ak tä ni'isa häpe t'at niyatey.

₃Tä oläte täjtso, och'esajche ow'uyis wet oyisetche ow'oley lhäy'e opäsey tä oyen tetnekayej tä wuj tä äytaj otichunhayaj. Wet ottayphä wet wuj tä ofwitajayaj ihi. ₄Wet nilhokej wichi tä nowaye Israel laka Dios lhämtes, lhamel lhaihut n'oyej tä yen tichunhayaja m'ak tä ni'isa tä iwoye häp lhamel tä tafwayej tä õyen kwenkaya. Wet olham ofwitajayaj ihi t'at pajtha honaj, nichäte hora tä lewhäy tä õ'länhen tson'ataj tä õyen n'okhayajayej Dios. ₅Wet nech'e yachajo tä otkhajay, mat kamaj otw'uyhi t'at ow'uyis tä pajche och'esajen. Wet otihi honhat okamchetey, wet opiynejphä otkweyey häp Owuk Dios ₆wet oyok:

–Ika Dios, wuj tä on'äfwlhi ihi. Okalhihit'ak oyahinphä amej, ika Dios. Olhamel och'isukyajay lhäy'e lhip tä wuj wet hip'ajtitchä olhamel, wet otes lhaichihelit pajtha nichät puleye. ₇Tälhe ifwalas tä ojchalis iche yäk nämena, wuj tä ni'isa olhamel och'isukyajay, oka niyatey lech'isukyajay, lhäy'e sacerdotes. Häp tä tamenej tä lhachaj p'ante n'oyehen häp niyatey tä i'pe honhat, wet ilän n'oyejen lefwajnhates, õ'hän n'oyehen honhat tä w'enha lhamej, õ'so n'oyejen m'ak tä olewuhuy, wet õyen n'oyehen m'ak tä lajit lahaya. Täjtso häp tä kamaj oihi t'at ifwalasna.

₈“Mat athana, Iwuk Dios, hap'altsenyaj i'aj n'oyejen lhimphaj, wet häp tä kamaj iche t'at iyhäj tä tafwayhen. Wet lhachajo tä leti n'ohihen olhamel ow'et tä ihi honhat tä amajchet. Yachajo tä alepäyne olhamel wet lew'en n'ohohen lhimphaj ow'atshancheyaj. ₉Tej tä ohäpehen n'okwenkay, mat lewomhit'a n'ohen. Len'älit n'oyejen hap'altsenyaj tä nittäya tä olhamel oinajchufwi Persia kaniyatey lakhajyhayaj, wet lhamel tek ilänhen olhamel, yämthilek onech'aynhi Awukwe tä wasi, wet let'u n'oyehen tä oihi Judá lhäy'e Jerusalén.

_10-11“Athana, ika Dios, olhämet ihichet'a, tsi olhamel owoye m'ak tä ni'isa. Owohiyet'a ämtes tä lefwenho p'ante profetas tä häpehen aka silätwos yämthilek ifwel n'ohohen. Lhamel yok, Häp honhat tä amel lehohiyela yämthilek lhenla haw'eta, häpe t'at honhat tä ni'isa. Wichi tä ihi wuj lech'isukyajay, yen häpeya laka dios m'ak at chik häpe, lhäy'e lakeyis tä lhamel iwoye häpe t'at m'ak tä kok'aye. ₁₂Tä mälhyejtso, isit'ak amel ales yen ch'efwasa wichitso leles, wet yej tach'ote wichitso yämthilek iwo letamseka wet ihut lhamej lakäywet. Lefwel n'ohohen, chik olhamel owoye tähestso, häpkhilek olhaikhajyenhen wet oisej t'at m'ayhay tä tälho honhat, yämthilek lewuhuy oles tä lepes lheley pajla'tha tiyäj'attsiy.

₁₃“Ika Dios, häp täjtso ämtes. Mat tä ilepese och'isukyajay tä wuj tä ni'isa tamen n'oyejen wet otes ihi ahilä. Mat atasnhayaj tä leti n'oyejen wujit'a, w'awulhihot'a och'isukyajay tä wuj, wet lewahnej iyhäjfwas olhamel yämthilek tafwayej lewit'äyhyaj. ₁₄Tä mälhyejtso, isit'ak olhamel oyachajo tä n'am woye ämtes wet olhaip'ajtej wichi tä lakeyis wuj tä ni'isachehen. Tsi afwitsajla n'oyehen wet letäyhthila olhamel, wet niwohit elh tefwajnik imälhehihila.

₁₅“Iwuk tä ahäpe Israel laka Dios, ais alhoho wet lemälhthi olhamel, wet häp tä tek oy'inhen, mälhyej ifwalana ow'en t'at. Matche t'at tä olhamel otes ihi ahilä, häp tä tamenej tä olhamel ohanhiyejt'a olhaiwoyneje yämthilek oho ame.”