Gál 2

₁Tä tajyämehte catorce nekchämes, oyachajo tä ohoye Jerusalén, olhäy'e Bernabé, wet ot'äne Tito yämthilek nek n'okwehen. ₂Tsi Dios ipäyen n'oye tä is che ohoye, häp tä tamenej tä oyik. Wet tä oyäm kanhi, ots'ilkat hin'ol tä fwetaj lhayen lhetekayej Dios leles tä oyämhoplhi. Wet okalelhtho lhamel häp Dios Silätyaj tä owopej silätayej wichi iyhäj, häp wichi tä kahäpeya Judío lhayis. Okalelhtho lhamel täjtso, yämthilek oläte lhamel che yok, “Is t'at”, häp m'ak tä tälhe tä owo tesa tä owoye, wok ne'tek o'isyen alhoho m'ak che niwujak is. ₃Mat is t'at, tsi ot'unfwa Tito, tej tä lham kahäpeya Judío, mat lhamel tek ne'tek ikatej n'otetnek tä n'olhijtsek.

₄Iche t'at hin'ol tä fwetaj häpehen Dios leles, lhamel lhaiskatwethä tä lhay'uytho olhamel tä olhaihutwek. Tsi t'uhläk iläte m'ak tä olhamel tä matche tä ohänlhi Jesús oyäme, häpkhilek yen tesa n'oyejen wet len'äyij ihi lhamel letichunhayaj tä t'uhläk ilhuhyen n'oyejen m'ayhay tä ihi Ley p'ante tälhe Moisés, wet yen kwenkaya olhamel häp m'ayhaytso tä Jesús pajche ifwayhat n'oyejen. ₅Mat olhamel tek otch'anlhaye yämthilek ikalh n'ohihen lhamel letichunhayaj. Otch'anlhahiyet'a, tsi ot'uhläk ot'amajej amhohen Dios Silätyaj tä häpe m'ak tä matche, wet nittäya tä i'amejen.

₆Mat häp hin'ol tä fwetaj lhayen lhetekayej Dios leles, ihichet'a m'ayhay che lhamel ne'tek owoye. (Tej tä pajche tä len'ohyajay ihichepa, mat häpkhit'ak otetshanej täjtso, tsi Dios tek itetshan m'ak tä tumphä.)

₇Mälhyej tä oyäme, ihichet'a m'ayhay che lhamel ne'tek owoye, tsi ow'en tä ikachuhit'a tä Dios hiw'en n'oho ochumet yämthilek oyen lhämetayej häp wichi tä kahäpeya Judío lhayis lham Lesilätyaj, mälhyej tä hiw'enho lechumet Pedro yämthilek yen lhämetayej häp Judío lhayis. ₈Wet mälhyejtso tä Dios yen häpeya apóstol häp Pedro wet ichene Judío lhayis, häte olham yen n'oye apóstol wet ichen n'oye wichi tä kahäpeya Judío lhayis.

₉Wet häp tä Santiago lhäy'e Pedro lhäy'e Juan, häp lhamel tä iyhäj yen häpeya iglesia laka ch'utey, lhamel ikachuhit'a tä Dios itshupyenej n'oye ochumettso. Wet lhamel itsokho otkwech'o, lhäy'e Bernabé takwech'o, tä yen tetneka n'oyejen tä lhamel tachumlä olhamel yämthilek ohäpehen lech'otfwas. Wet lhamel yok, “Is t'at tä amel lew'enhayej wichi tä kahäpeya Judío lhayis, wet olhamel ow'enhayej Judío lhayis.” ₁₀Wet y'isej tä yok, “Yej p'ethatlä wichi tä p'elitses tä in'oyejen.” Wet olham oyok, “Is t'at.” Tsi pajche tä oyenpej tichunhayaja yämthilek owoye täjtso.

₁₁Matkat tä Pedro ihoye hupuy tä Antioquía, olham ofwoneje m'ak tä iwoye, tsi isit'a. ₁₂Tä ichun, is m'ak tä iwoye tä tachufwiyejpej Dios leles tä kahäpeya Judío lhayis. Mat tä nämhen hin'ol tä tälhe Santiago, wet nech'e lham ileyej wet nemhit tachufwiyej. Tsi nowaye hin'oltso tä häpehen iyhäj tä ihän Jesucristo mat yok, “Nilhokej Dios leles iwohiyet'ak n'otetnek tä n'olhijtsek newayej.”

₁₃Wet häp iyhäj Judío lhayis tä t'ekhaye Jesús, tä lhamel hiw'en m'ak tä Pedro iwoye, lhamel lhaip'ajtej. Y'aje Bernabé tä lhamel ikalheji t'akanyaj tä iwoye. ₁₄Wet tä ow'en tä lhamel wetayej len'äyij tä is alhoho, tek yiwitche m'ak tä matche tä Dios Silätyaj yäme, wet ofwenho Pedro tä ihi tä nilhokej wichi tatache tä oyok, “Häp am tä ahäpe Judío pajche letiyej kanhi Judío lhayis lakeyes wet aletech'aynej che akahäpeya Judío. Tä mälhyejtso, ¿chipte tä athana let'uhläk lenityeneje lhamel tä kahäpeya Judío lhayis yämthilek lhaitech'aynej Judío lhayis wet iten lakeyes?

₁₅“N'amel n'ahäpehen Judío lhayis tä matchehen, n'ahäpkhihent'a wichi tä õyen lheya n'och'isukyaj länhay, häp lhamel tä kahäpeya Judío lhayis wet newahi Ley p'ante tälhe Moisés. ₁₆Matkat n'amel y'ahanej t'at tä ihichet'a elh che häpe tä iwoye m'ayhay tä Leytso ne'tek õ'woye wet Dios hi'isyen, mat tajlhama che t'ekhaye tä Jesús häpe N'ofwayhthi tä Dios Chenek. Wet häte n'amel pajche y'at'ekhaye Cristo Jesús, yämthilek Dios n'a'isyenhen tä n'aisej lhat'ekhahyajna, häpkhit'a tä y'awoye m'ayhay tä Ley p'ante tälhe Moisés ne'tek y'awoye che tamenej. Tsi mälhyej tä oyäme, nehit katsik isej tä iwoye m'ayhay p'ante Ley tä tälhe Moisés ne'tek õ'woye wet Dios hi'isyen.

₁₇“Mat tä tajlhamat lhat'ekhahyaj tä y'atiyej Cristo tä Dios hi'isyen n'amejen, n'äl tä y'alhaitihi lew'et wichi tä kahäpeya Judío lhayis. Wok oyok, y'alhaitech'aynej t'at lhamel tä õyok, n'och'isukyaj länhay. Mat tä y'awoyetso, ¿hä y'en n'och'isukyaj kaniyata Cristo? ¡Kha, häpkhit'a! ₁₈Mat chik owasthi m'ak tä pajche ot'ekhaye, tä häpe m'ayhay tä ihi Ley p'ante tälhe Moisés, wet tä paj wet oyachajo tä okhajyen, häp tä olhain'älit tä otes ihihlä Leytso.”

₁₉Mat olham ohäpe t'at lep'itsek tä oihi tä tatache Leytso, tsi häp tä lelänekn'o, mat täjtso häpkhilek oläy wet Owuk Dios. Tsi hätet iwoyek op'akej Cristo tä õhp'ajtej cruz, ₂₀nemhit häpe olham tä oläy, mat Cristo tä iläyit n'ohi. Wet häp ow'atshancheyaj tä iläyitn'o athana, oisej t'at ot'ekhahyaj tä otiyej Dios Lhäs, häp tä ihuminn'o wet lhayachaje t'ilek yämthilek ifwayhatn'o. ₂₁Tek w'et oyen m'ayeka Dios lep'altsenyaj. Tsi che häpkhi Ley p'ante tälhe Moisés tä wichi lha'isyeneje Dios, laha ihihit'a Cristo t'ilek.