Gál 5

₁Cristo n'ailanche yämlek nemhit n'ahäpe n'okwenkay. Tä mälhyejtso, at'unthiche tä lheyayhi täjtso, wet yej lhäplej Ley p'ante tälhe Moisés tä ayen kwenkaya.

₂Lhek tetshan olhämet, olham Pablo ofwel amhohen tä oyok, Chik amel alhenay häpeya iyhäj tä ikatej n'otetnek tä n'olhijtsek, nemla aisej Cristo. ₃Oyachajo tä ofwenho elh chik häpe tä ikatej n'olhijtsektso, häte iwohiyet'ak nit'amajayej nilhokej m'ayhay tä Ley p'ante tälhe Moisés ne'tek õ'woye. ₄Amel tä lefwetajay Dios a'isyenej tä lewoyaye Ley p'antetso, oyok, Nemhit lep'akayej häp Cristo, wet aletiyayej kanhihlä Dios lep'altsenyaj. ₅Mat häp olhamel tä n'am hän täjtso, oisej t'at Dios laka Espíritu lhäy'e ot'ekhahyaj, wet häp tä tamenej tä ohanej tä kalelhäj t'at tä Dios hi'isyenla olhamel. ₆Tsi elh chik lhaip'ajtej Cristo Jesús, tej chik häpe elh tä n'otetnektso iyej wok newayej, mat häpkhit'a chik isej täjtso. Tsi m'ak tä laha ihi, häpe t'at chik iwo t'ekhahyaja, wet t'ekhahyaj iwo lehumnhayajayej iyhäj.

₇Iste alhoho m'ak tä lewoyaye fwalas tä ichun. Mat athana, ¿atsi tä aistakyenej m'ak tä matche? ₈Dios tä pajche t'än amehen, lhamhit'ak iwoynejetso m'ak tä iwoyej amehen. ₉Mat amel lehanej t'at tä wichi yok, “Tej chik lhimphaj levadura, mat iwojyenhi imälhewek harina tä õ'lhethi.” ₁₀Mat tej tä iche m'ak tä mälhyejtso tä i'amejen, ot'ekhayej amehen, häp tä isej Lhawuk, wet ihichet'ala atichunhayaj elh chik ni'isa. Mat häp elh tä nitch'anlhaya amehen, Dios itihiyeja letasnhayaj, tej chik häpe elh tä ihan m'akej wok nhana m'akej.

₁₁Wet häp olham, ipuhfwas, chik kamaj otujlhache p'iya tä owo olhämeta wet oyok, “Iwohiyet'ak wichi tä t'ekhaye Jesús nikatayej n'otetnek tä n'olhijtsek”, chik mälhyejtso m'ak tä owoye, kalelhäj tä opuhfwas tek itihin'e n'oyej laka'tshayaj. Tsi chik oyen silätyaja Cristo t'ilek tä i'pe cruz, mat äp oy'isej tä one'tek wichi ikatej n'olhijtsek, osilätyajtso tek ilätyenhin'ewethä häp lhamel tä ihumin n'otetnektso. ₁₂¡Oyok, häp lhamel tä ailhaklitwethä, is chik häpehen iyhäj tä lajit lelesa!

₁₃Häp amel, ipuhfwas, Dios t'änte amehen yämlek ahäpehen iyhäj tä nemhit häpe n'okwenkay. Mat yej lhok, “Is t'at, athana owoye m'ak tä olham ohuminche.” Mat huminay aiyhäj wet ch'ot amehen. ₁₄Tsi imälhewek Ley p'ante tälhe Moisés, w'awulho elh tefwajni tä yok, “Humin aelh, tech'ayen amej tä alehumin.” ₁₅Mat uyayhlä, isit'ak aletech'aynej itshätäy tä fwitses tä lhayokwajwethä wet lhatufwen. Chik amälhyejentso, anofwiyeja.

₁₆Häp m'ak tä ofwel amhohen, oyok, Hänaylhi Dios laka Espíritu, wet häpkhilek kach'ahuyaye anech'ethayajay. ₁₇Tsi lhanech'ethayajay tatayhlä Dios laka Espíritu, wet Dios laka Espíritu tatayhlä lhanech'ethayajay. Lhaletayhfwas t'at, wet häp tä lehanhiyejt'a lewoyneje yämthilek lewoye m'ak tä lehuminche. ₁₈Mat chik lehänaylhi Dios laka Espíritu, lhehit'achufwi lakhajyhayaj häp Ley p'ante tälhe Moisés.

₁₉Lhäy'e lhip tä n'äl m'ayhay tä tälho wichi lenech'ethayajay. Lhamel iwo lakain'oyaja, wet iwoye m'ak tä kok'aye, lhäy'e tä lhaich'atej m'ayhay tä ni'isa. ₂₀Lhamel n'okwiyej lecheyälis wet lhayen hiyawula. Häte n'äyi lhamhomche, wet tatayejpejwek lhämtes, wet aschentses, awäkwyhatses, alhaknhatses, wet lhaiw'enhathen. ₂₁Äytentses lhamel, wet lhayenpej w'oknhasa, wet iwo lakäjyaja pajtha ilän lhamejen hat'es tä iyä. Wet iche iyhäj m'ayhay tä mälhyejentso tä iwoye. Lhek tetshan olhämet, mälhyej tä ofwelte amhohen, oyok, Elh chik häpe chik iwoye tähestso, lew'et ihihit'ala Dios Niyatyaj.

₂₂Mat häp m'ak tä tälho Dios laka Espíritu, häpe t'at n'ohumnhayaj tä lhamya, lhäy'e n'okäjyaj, lhäy'e n'otamsek, wet tek onlhak'alhihlä m'ak at chik häpe. Häte ohäpe elh tä lechowej ihi, wet okänitwethä oiyhäj, o'afwtintsaj, ₂₃tek olhaichäjlhi, wet otumlä onech'ethayajay tä ni'isachehen, ikalhit'a n'ohi. Ihichet'a ley chik tatayhlä tähestso. ₂₄Wet häp iyhäj tä Cristo Jesús laka wichi, pajche hip'ajtej cruz häp lechumyaj wumhay lhäy'e lenech'ethayajay tä ni'isachehen. ₂₅Wet athana chik Dios laka Espíritu t'at tä n'amel n'aisej, is chik häte y'awoyepej m'ak tä Espíritu ne'tek y'awoye. ₂₆Isit'ak y'alhaichäjwethä, wet tek y'alhailätyenwethä, wok y'at'äyten lhamehen.