Dios ifwenho Abram tä lhäs ihichela
1Tä tajyäme tähestso, Lhawuk iwo lew'eneka Abram wet tahuyej tä yok:
–Abram, yej noway. Ohäpe afwamthi wet ow'enla amho awayhat tä wuj.
2-3Mat Abram nichulho wet yok:
–Iwuk Dios, niwohit m'ak chik oisej chik lew'en n'oho otw'ayhat, tsi lehanej t'at tä newache oles. Wet tä kaw'ena n'oho olhäs, elh tä lewukla m'ak tä in'oyej häpkhila Eliezer tä lew'et Damasco, elh tä okawo t'at.
4Lhawuk nichulho Abram wet yok:
–Elh tä lewukla m'ak tä i'amej häpkhila äs, häpkhit'ala hin'o tä w'enha lhamej.
5Wet Lhawuk ihän alhoye Abram wet tahuyej tä yok:
–Yahin pule, ¿hä lehanej tä lewo t'ufwahtesa katetsel? Mälhhiyejattso ales tä lepes lheley.
6Wet Abram t'ekhaye Lhawuk, häp tä tamenej tä Lhawuk yen häpeya elh tä is alhoho.
Dios hit'untejche lhämet Abram
7Wet Lhawuk tahuyej Abram tä yok:
–Ohäpe Awuk Dios. Oaitonphähte tä lhehi Ur tä ihi Caldeo lhayis kahonhat, tsi ot'uhläk ow'en amho honhatna wet alewuk t'at.
8Abram tay'ätshane wet yok:
–Iwuk Dios, ¿atsi m'ak chik tamenhiyejak ohanej tä matche wet kalelhäj tä olewukla honhatna?
9Dios nichulho wet yok:
–Chäj alhoho w'asetaj lhäs tä atsinha tä hiw'en tres nekchämis, lhäy'e kayla tä atsinha tä hiw'en tres nekchämis, lhäy'e tson'ataj tä asnak tä hiw'en tres nekchämis. Häte p'ajtej pop lhäy'e hokwinaj lhäs.
10Wet Abram ichäj alhoho itshätäytso, wet hich'esajchehen lechowhal wet itayyenlä lhipey iyhäj lhipey. Mat häp afwenchey tek hich'esajen. 11Wet istiwin lhayis inuyejchä tseyhay, mat Abram istun wet yikhen.
12Wet tä honaj, tott'ayek y'uy ifwala, nahati ilän Abram wet imä. Wet lefwilhek ihi tä honataj nichätpe wet wuj tä noway. 13Wet Lhawuk tahuyej wet yok:
–Is chik lehanej tä achetsos ihihila honhat tä kalew'eta, wet õyenla kwenkaya, wet wujla leteläythayaj chik iyej lhamel, pajla'tha cuatrocientos nekchämis. 14Mat wichi tä yen kwenkaya otasnhila, wet achetsos yikhilach'oye lhamel, wet wujla m'ak chik ichäj lhamchehen. 15Mat am let'inlak wuj chik athaläkw, wet atamsek ihi t'at chik lehoye ajchalis. 16Mat ofwel amho, chik tajyäme cuatrocientos nekchämis nech'ehilak tapil alhoho achetsos. Tsi kamaj tek taw'ulhphä m'ak tä ni'isa tä Amorreo lhayis iwoye.
17Wet nech'e matche tä ifwala y'uy p'ante, wet nech'e honatsi nichätpe honhat. Wet Abram hiw'en n'onhonthi tä tutsaj tälhche, wet iche n'ochäkw tä y'uho tä inukwe lechowej itshätäy lhipey. 18Wet ifwalatso Lhawuk hit'unhatche lhämet tä iwoyeje Abram wet yok:
–Honhatna häpkhilek ow'enho ales tä lepes lheley, tälhe tewok tä tumejlä Egipto yäk nichäte tewokitaj tä lhey Éufrates, 19häp honhates tä lewuhuy Ken lhayis, Kenaz lhayis, Kadmón lhayis, 20Het lhayis, Ferez lhayis, Refaím lhayis, 21Amorreo lhayis, Canaán lhayis, Gerges lhayis, lhäy'e Jebús lhayis.
