Dios lhämet tä hit'untejche Abram lhäy'e leles tä lepes lheley
1Tä Abram hiw'en p'ante noventa y nueve nekchämis, Lhawuk lhain'ältej wet tahuyej tä yok:
–Ohäpe Dios tä lajit letumfwaya. Woye m'ak tä one'tek lewoye wet amaj amej häpkhilek newache ates, 2wet owohiyeja ame olhämet. Oyämla wujpey ales.
3Tä Abram iläte, t'upeyhchä pajtha letacho taj honhat. Wet Dios tahuyej tä yok:
4–Häp täja olhämet tä owoyej ame: Ahäpkhila lajcha wichi tä wujpey tä w'enhache lhamej. 5Nemla ey Abram tä yok, N'ojcha tä lewujyaj ihi. Mat tälhe fwalana eyla Abraham tä yok, Wujpe wichi lajcha. Tsi oayen häpeya wujpey wichi tä w'enhache lhamej lajcha. 6Oyämla wujpey ales, tälhila ame niyatey lhäy'e wichi tä w'enhache lhamej. 7Wet olhämet tä owoyej ame lhäy'e ales tä tatay alhoho, häp täja: Lajit lepesa tä ohäpkhila aka Dios wet ohäpkhila ales laka Dios yäk nichäte lepes lheley. 8Am lhäy'e lhamel ow'enla amhohen honhat tä Canaán, häp honhat tä kahaw'eta tä lhehi athana, wet häpkhila ales laka honhat yämlek tiyäj'attsiy, wet ohäpkhila lhamel laka Dios.
N'otetnek tä õ'tiyej elh t'isan
9Wet Dios äp yok:
–Am yej leyej tä lewoye olhämet, häte ales pajla'tha nichäte ales tä lepes lheley. 10Häp täja olhämet tä owoyej amehen, oyok, Nilhokej hin'ol tä i'amejen is chik n'olhijtsek iyej t'at t'isan. 11-12Tälhe fwalana is chik õyiset lho t'äj häp han'äfwaj chik häpe chik hiw'en ocho fwalas tälhe tä nichätchä. Häte iset lho t'äj häp akawo chik häpe chik nichäthihchä haw'et, lhäy'e akwenkay tä tälhe wichi tä w'enha lhamej tä lechäjej aka chinaj t'äj. Tsi täjtso häp tä lhatetnekej lhalhämet tä y'at'unhatche n'amejen, amel lhäy'e olham. 13Elh weihalhapej iwohiyet'ak n'olhijtsek newayej t'isan, häpkhilek n'äl tä nittäya olhämet tä owoyej amehen. 14Elh chik n'olhijtsek newayej t'isan, is chik nem i'amejen, tsi yen w'et m'ayeka olhämet tä owoyej amehen.
Dios ifwenho Abraham tä lhäs ihichela
15Dios ifwenho Abraham wet yok:
–Hach'efwa Sarai nemla lhey täjtso. Tälhe fwalana lheyla Sara. 16Otihiyeja okäpfwayaj tä is, ow'enla amho äs tä tälho lham. Matche, otkäpfwayhiyela lham wet häpkhila wichi tä w'enhache lhamej lako, wet leles tä lepes lheley häpkhila wichi kaniyatey.
17Tä Abraham iläte, t'upeyhchä pajtha letacho taj honhat. Wet iti lhamhi letichunhayaj tä yok, “¿Chiwoye hin'o tä hiw'en cien nekchämis, nech'ehilak lech'efwa iwo lhäsahlä? ¡Tsi Sara lhamtej hiw'en noventa nekchämis!”
Tä letichunhayaj mälhyejtso, lak'aj t'ischeyhi lhamej. 18Wet tahuyej Dios wet yok:
–¡Isin'ek olhäs Ismael t'at chik ihi akäpfwayajay tä isen!
19Dios nichulho wet yok:
–Kha, hach'efwa Sarahilak iwo äsa, wet lhenla lheya Isaac. Wet lhamlak omattejche olhämet, lhäy'e leles tä lepes lheley yämlek tiyäj'attsiy.
20Häte olät ame tä let'alhyen n'oye äs Ismael. Otkäpfwayhiyela, oyenla häpeya hin'o tä wujpey leles, häpkhilek lhäy'e lhip leles tä tälhe. Häpkhila doce niyatey tä lhamenya lajcha, wet ow'enhihola laka wichi tä wuj. 21Mat Isaac t'at tä ot'untejche olhämet, häp Sara lhäs tä iwohiyela ahilä chik nichäte lewhäyna chik nekchäm elh.
Abraham iwo lhijtsekayej t'isanis hin'ol tä ihi lew'et
22Tä Dios ileyej tä yämhoplhi Abraham, wet yik. 23Wet fwalatso Abraham iwo lhijtsekayej lhäs Ismael t'isan, häte nilhokej lakawos tä nichäthihchä lew'et lhäy'e iyhäj tä ichäjej laka chinaj t'äj. Tä mälhyejtso, nilhokej hin'ol tä ihi Abraham lew'et tä tachumhoplhi, õ'wo n'olhijtsekayej t'isanis, mälhyej tä Dios ne'tek Abraham iwoye. 24Abraham hiw'en p'ante noventa y nueve nekchämis 25wet lhäs Ismael hiw'en trece nekchämis 26tä õ'wo p'ante lhijtsekayejwethä t'isanis häp fwalatso, 27lhäy'e nilhokej hin'ol tä ihi Abraham lew'et.
