Gén 24

₁Abraham häpe hin'o tä wuj tä hich'ut, wet Lhawuk itiyej lakäpfwayaj tä is m'ak at chik häpek iwoye. ₂Fwala elh p'ante lham t'äne lakawo tä thaläkwej tä t'uye nilhokej m'ak tä iyej, wet tahuyej tä yok:

–Tichufwi akwey häp olheche. ₃One'tek let'unhatche n'oyej ämet tä lewoyej n'oye tä y'ehi tä Lhawuk tatache, häp Dios tä niyatej pule lhäy'e honhat. Fwel n'oho tä kalelhäj tä tek let'uhikwela atsinha tä lew'et Canaán, häp honhat tä y'ehina, häpkhilek olhäs Isaac lech'efwa. ₄Mat lehohiyela oka honhat wet let'uhikwela atsinha tä häpe olhamel oka'tsinha.

₅Lakawo tay'ätshane wet yok:

–¿Mat chihla iwoyek atsinha nineka chik ofwetaj ot'äne? ¿Atsi m'ak chik owoye? ¿Elat is chik oyachaje äs honhat tä letälhe p'ante?

₆Abraham nichulho lakawo wet yok:

–¡Kha, isit'ak lehän kanhi olhäs! ₇Häp Lhawuk Dios tä ipuleye, lham tä itonphähten'o tä oihi ojcha lew'et lhäy'e tä oihi opuhfwas kahonhat, wet äp ifwelte n'oho tä hiw'enhihola oles häp honhatna, lhamlak ichen laka ángel wet ichunla ahilä häpkhilek lechäj atsinha tä tälh kanhi wet häpkhila olhäs lech'efwa. ₈Chik atsinha lhamlak nineka amche, ates ihihit'ahlä ämet chik let'unhatche n'oyej. ¡Mat yej chäj kanhi olhäs!

₉Tä mälhyejtso, lakawo itichufwi Abraham lheche häp takwey wet yok:

–Ot'unhatche amej olhämet tä owohiyela m'ak tä lene'tek owoye.

₁₀Abraham lakawo tachuma m'ayhay tä lhäy'e lhip tä isis tä lewuk käywet. Wet ichäj diez camellos wet yik tä ihoye hupuy tä Abraham lech'inij Nacor lew'et tä ihi honhat tä Mesopotamia. ₁₁Wet ifwala p'ante nichäte hupuy, takasthi lhip tä iwhäye. Häpe t'at lewhäy tä honaj t'at, wet häp tä atsinhay lakey tä nämhen tä neke inät. Wet Abraham kawo iwhäye n'opek tä iwo t'elakw'eta camellos, ₁₂wet iwo let'alhyaja wet yok:

–Dios tä owuk Abraham laka Dios, ch'ot n'oye fwalana häpkhilek ois alhoho. P'altsene t'at häp owuk. ₁₃Olham oikana tä oiwhäye n'opekna, wet nekhen atsinha lhutshay tä neke inät. ₁₄Otahuyhiyeja elh lhamel, oyohlak, “Tihchä äkwe, oyähiyeja lhip inät tä ihi.” Wet chik atsinha yohlak, “Is t'at, yäyej, häte ow'enhihola lhip häp camellos”, is chik häpe t'at atsinha tä letshupyeneje akawo Isaac. Wet chik mälhyejtso, ohanhiyeja tä matche tä lep'altsene owuk Abraham.

₁₅Tä kamaj Abraham lakawo iwo let'alhyaja, näm atsinha lhutsha tä tilhäj lhäkwe. Häpe Rebeca, Betuel lhäse. Betuel lajcha häpe Nacor, Abraham lech'inij, wet lako lhey Milca. ₁₆Rebeca häpe lhutsha tä wuj tä isilataj, wet kamaj tek lhay'aje hin'o chik häpe. Lham ihoye n'opek wet itsäche inät häp lhäkwe. Tä tapoyej, wet tilhäj wet yik. ₁₇Wet Abraham kawo inu alhoho tä ihoye, tä nichäte wet yok:

–P'altsenn'o, w'en n'oho lhiphaj inät tä ihi äkwe. Owatläk oyäyej.

₁₈Lhutsha nichulho wet yok:

–Eh.

Wet itihchä lhäkwe wet tatsufwelej wet lham t'at tä iyäynej hin'o inät. ₁₉Tä ileyej, yok:

–Häte otonhiphäla lhip inät wet camellos iyähiyeja pajla'tha yäkw'ethen.

₂₀Tä mälhyejtso, ikelit tä itsäyho itshätäy lhäthi häp inät tä ihi lhäkwe, wet yäplepej n'opek pajtha nilhokej camellos yäkw'ethen. ₂₁Wet Abraham kawo iyahin t'at mat tek tahuy, t'uhläk ihanej chik kalelhäj tä Lhawuk isyen alhoho lew'ekyaj.

₂₂Tä camellos ileyej inät, Abraham kawo tachuma n'onhus lhele tä oro tä wuj laha, lhäy'e n'otkwet'äfwates tä oro tä wus, wet hiw'enho Rebeca. ₂₃Wet yok:

–Woye tä owoye, fwel n'oho atsi tä ajcha. Häte elat iche p'iya lew'et chik olhamel oihi honatsina p'iya.

₂₄Lhutsha nichulho wet yok:

–Ojcha Betuel tä Nacor lhäs, wet ojcha lako Milca. ₂₅Iche t'at lew'et chik amel lhehi honatsina, wet iche hup tä camellos lhäk.

₂₆Tä Abraham kawo iläte Rebeca lhämet, itihi honhat lakamchetey wet n'okwiyej Lhawuk ₂₇wet yok:

–¡Lewujyaj ihi Dios tä owuk Abraham laka Dios! Tsi lajit lepesa tä iwoyeje lep'altsenyaj lhäy'e m'ak tä matche, wet ihän n'oye owuk lepuhfwas.

₂₈Rebeca inu alhoho tä ihoye lew'et wet ifwenho lepuhfwas nilhokej m'ayhaytso. ₂₉Wet lechila tä lhey Labán yik tä inu alhoho tä t'ukwe Abraham kawo, ₃₀tsi hiw'en n'onhus lhele lhäy'e n'otkwet'äfwates tä oro tä ihi lech'inhä kweyey, lhäy'e tä yäme häp hin'o tä hiw'en. Wet Labán ihoye Abraham kawo tä lham kamaj iyej camellos tä iwhäye n'opek, ₃₁wet tahuyej tä yok:

–¡Ahäpe hin'o tä Lhawuk lakäpfwayaj iyej! ¡Is chik lenek n'okwe, tsi haw'et ihi lhäy'e camellos lew'et! ¡T'uhawethiyejt'a chik lemähi täja!

₃₂Tä mälhyejtso, Abraham kawo ihoye Labán lew'et. Tä nichäte, Labán itihchä nilhokej m'ayhay tä i'pe camellos, wet hiw'enhomche lhäk. Wet nech'e ichäj inät yämthilek Abraham kawo lhäy'e iyhäj tä nekche, lhamel ilejen lepach'ol. ₃₃Wet Labán hiw'enho lhäk lhamel. Mat Abraham kawo yok:

–Tä kamaj n'am nen lhämeta m'ak tä owuk lhämet tä onekchufwi, otufwit'a ayej olhäk.

Labán yok:

–Tä mälhyejtso, äme t'at.

₃₄Wet hin'o yok:

–Ohäpe Abraham kawo. ₃₅Lhawuk takäpfwayeje m'ak tä wuj häp owuk wet yen häpeya hin'o tä wuj lakäywet tä hiw'en. Hiw'enho tson'atas, w'asetas, oro, plata, lhäy'e lakawos tä hin'ol lhäy'e tä atsinhay, lhäy'e camellos, lhäy'e asnolis. ₃₆Häte lech'efwa Sara iwo lhäsa tä nichäte fwalas tä wuj tä hich'ut, wet owuk yen lewuka nilhokej lakäywet häp lhäs. ₃₇Owuk ne'tek ot'untejche olhämet wet yok, “Unhatche n'oyej ämet tä kalelhäj tä tek let'uhikwela atsinha tä lew'et Canaán, häp honhat tä y'ehina, häpkhilek olhäs Isaac lech'efwa. ₃₈Mat lehohiyela wichi tä ojcha iyhäj wet let'uhikwela elh tä häpe olhamel oka'tsinha.” ₃₉Wet olham onchulho owuk wet oyok, “¿Chihla iwoyek nineka n'okwe atsinha?” ₄₀Wet lham yok, “Häp Lhawuk tä owoye lham lenech'ethayaj, ichenla laka ángel wet yikhila amche. Wet isila alhoho han'äyij yämthilek letachuma elh olhamel oka'tsinha tä iyej ojcha iyhäj, häpkhilek olhäs lech'efwa. ₄₁Tajlhamat chik opuhfwas niwahna amej laka'tsinha, tek oayenla tesa amej ämet tä let'unhatche n'oyej.”

₄₂“Wet tä onäm mathi fwalana wet oiwhäye n'opek, owo ot'alhyaja wet oyok, Dios tä ahäpe owuk Abraham laka Dios, is chik lhäm is alhoho ow'ekyajna. ₄₃Athana olhaip'altsen ame tä oiwhäye n'opek. Chik atsinha lhutsha ihoye n'opek tä t'ukwe inät, olham otahuyhiyeja wet oyohlak, P'altsenn'o, w'en n'oho lhiphaj inät tä ihi äkwe, owatläk oyäyej. ₄₄Wet chik lham yohlak, Is t'at, yäyej, häte otonhiphäla lhip häpkhilek camellos iyäyej - is chik häpe t'at atsinha tä am, Iwuk Dios, letshupyeneje owuk lhäs.

₄₅“Wet tä kamaj n'am leyej ot'alhyaj tä oti lhamhi, näm Rebeca tä tilhäj lhäkwe tä ihoye n'opek wet itonphä inät. Tä lhäkwe tapoyej, ohoye wet oyok, P'altsenn'o, w'en n'oho lhiphaj inät. ₄₆Tä ilät n'oye, wet itihchä lhäkwe wet yok, Is t'at, yäyej, häte otonhiphäla lhip häpkhilek camellos iyäyej.

“Wet hiw'en n'oho inät wet hiw'enho camellos. ₄₇Wet nech'e oty'ätshane tä oyok, ¿Atsi tä ajcha? Lham nichulh n'oho wet yok, Ojcha Betuel tä Nacor lhäs, wet ojcha lako Milca.”

“Wet otihi n'onhus lhele tä oro häp lenhus, wet otihi n'otkwet'äfwates tä oro häp takweyey. ₄₈Tä oleyej, otihi honhat okamchetey wet owujyen häp Dios tä owuk Abraham laka Dios, tä lham ihän n'okwe n'äyij tä is alhoho wet onchäte owuk cheyäs yämthilek otchuma lhäse wet ohäne owuk lhäs.

₄₉“Athana fwel n'oho chik matche tä amel lewohiyejela ahumnhayaj häp owuk. Wet chik nimälhyayejtso, häte fwel n'oho, häpkhilek otetshan m'ak chik owohiyela.”

₅₀Tä Labán lhäy'e Betuel iläte Abraham kawo lhämtes, lhamel yok:

–Nilhokej tähestso kalelhäj tä tälhe t'at Dios. Olhamel ohanhiyejt'ak oyok, kha, wok oyok, is t'at. ₅₁Lhek yahin, ikana Rebeca. Chuma wet chäj t'at. Is chik häpe awuk lhäs lech'efwa, mälhyej Dios lenech'ethayaj.

₅₂Tä Abraham kawo iläte, itihi honhat lakamchetey tä ihi tä Lhawuk tatache wet t'upeyhchä pajtha letacho taj honhat. ₅₃Wet nech'e itonphä m'ayhay tä oro lhäy'e plata, lhäy'e atsinha lew'uyis tä isis, wet hiw'enho Rebeca. Häte hiw'enho t'awayhat tä laha ihi häp Rebeca lechila lhäy'e lako. ₅₄Tä ileyej, nech'e lham lhäy'e hin'ol tä nekche t'ekhen wet iyä, wet honatsitso lhamel iyej t'at Rebeca lew'et. Wet tä ifwala tä nech'e fwamlafwaj, lhamel nechephä wet Abraham kawo yok:

–Ch'anlha n'oye tä oyik, oyäple owuk lew'et.

₅₅Mat Rebeca lechila lhäy'e lako lhamel yok:

–Kha. Is chik Rebeca i'aj n'oyejen fwalas iyhäjfwas, wet nech'ehilak yik amche.

₅₆Mat Abraham kawo yok:

–Yej tsoklhin'o, tsi Dios hi'isyen alhoho ow'ekyaj. Ch'anlha n'oye tä oyäple owuk lew'et.

₅₇Lhamel nichulho Abraham kawo wet yok:

–N'at'äne Rebeca. Y'aläthiyela lham letichunhayaj lhäy'e m'ak tä iwoye.

₅₈Tä mälhyejtso, lhamel t'äne Rebeca wet tay'ätshane tä yok:

–¿Hä lhekche t'at hin'otsi tä yäpil?

Rebeca yok:

–Oyikche t'at.

₅₉Tä mälhyejtso, lhamel tach'anlhaye Rebeca tä yik, lhäy'e atsinha tä t'uye, lhäy'e Abraham kawo lhäy'e iyhäj tä nekche. ₆₀Wet nech'e lhamel takäpfwayeje m'ak tä is häp Rebeca wet yok:

–Am, olhamel och'inhä, ¡is chik ahäpe wichi tä wujpey lako t'at! ¡Is chik ales tä tälh ame ikalhiche letayhfwas!

₆₁Wet nech'e Rebeca lhäy'e lakawos tsinhay lhamel iche'pe camellos wet yikche Abraham kawo. Mälhyej p'antetso tä Abraham kawo ichäj Rebeca wet yäple lewuk.

₆₂Wet häp fwala tä lhamel yämhen p'ante, Isaac tapil tä tälhe lepek tä lhey “N'ilataj hiw'enn'o” tä ihi t'at honhat tä Négueb. ₆₃Wet tä honaj ilunlhi t'at, wet hiw'enlä camellos tä tatay alhoho. ₆₄Häte Rebeca tä hiw'enlä Isaac, inuhchä tä i'pe camello ₆₅wet tay'ätshane Abraham kawo wet yok:

–¿Atsi hin'o tä häpe täjtsi?

Abraham kawo nichulho wet yok:

–Häpe owuk.

Tä mälhyejtso, lhutsha tachuma tateyp'ot wet hip'o'pe tatey.

₆₆Wet lakawo ifwenho Isaac nilhokej m'ak tä iwoye. ₆₇Wet nech'e Isaac ihänchufwi Rebeca häp lako Sara lewukwe tä tsänt'äj wet iyej. Wuj tä ihumin Rebeca, wet nemhit wuj tä yen tichunhayaja lako tä ileyej honhat.