Jacob weskatlä lewithok Labán wet yik
1Jacob ihanch'oye tä Labán leles yopejkwe:
–Jacob hiw'en m'ayek tsi tachuma lhajcha käywet wet lhayen lewuka.
2Häte Jacob nitäfwelej tä Laban nemhit t'amajej. 3Wet Lhawuk tahuyej Jacob wet yok:
–Äple ajchalis kahonhat tä apuhfwas ihi. Olham oyikhila amche.
4Tä mälhyejtso, tä Jacob iyej tson'atas tä hit'ekyenwethä, iwo chenekaye lech'efwas, Raquel lhäy'e Lea, ne'tek lhamel ihoye. Wet tä lhamel nichäte, 5tahuyej wet yok:
–Ontäfwelej tä amel ajcha nemhit t'amaj n'oyej, hätehit'a iwoye täjte nech'e onäme. Mat is t'at, tsi ojcha laka Dios ilehit'a n'oyej. 6Amel lehanej tä wuj tä olhaikhajyen tä otchumhoplhi ajcha, 7mat lham itipej n'oyej t'akanyaj wet tek hiw'awlhatchä okaha tä tisn'o. Mat Dios tach'anlhahiyet'a tä fwetaj iwoyej n'oye m'ak tä ni'isa. 8Tä ajcha yok, “Akahahila itshätäy tä lefwukus ihi”, wet nilhokej itshätäy lefwukus ihi t'at leles tä nichätchehchä. Wet äp yok, “Akahahila itshätäy tä lefwukus tatshupichehchä”, wet äp nilhokej itshätäy lefwukus tatshupichehchä leles tä nichätchehchä. 9Mälhyejtso tä Dios isoyej leläy ajcha wet hiw'en n'oho.
10“Ichehte ifwala tä ot'uye t'at itshätäy wet ofwilhek ihi. Ow'en tä itshätäy tä inukwe'pe iyhäj tä atsinhay, häpehen lhamel tä lefwukus w'enhache lhamej lhäy'e iyhäj tä talesachehen. 11Wet ofwilhektso häte oläte Dios laka ángel tä t'än n'oye tä yok, ¡Jacob! Wet onchulho tä oyok, Oikana. 12Wet nech'e ángel yok, Lhek yahin, lew'en kayla lhayis tä lefwukus w'enhache lhamej lhäy'e iyhäj tä talesachehen tä inukwe'pe iyhäj tä atsinhay. Olham tä owoynejek täjtso, tsi ow'en tä Labán iti amej t'akanyaj. 13Ohäpe Dioste lhain'älit amej tä lhehi Betel, täjte lhen amajcheta tunte wet let'unhatche ämet tä lewoyej n'oye. Athana awaklhat, mäch'oye honhatna, äple honhatte lechäthihchä.”
14Tä Raquel lhäy'e Lea iläte Jacob tä iwoyetso, wet lhamel nichulho wet yok:
–Nemhit iche m'ak chik ojcha käywet lhip chik lewukla olhamel. 15Tajlhama tä yen n'oyehen atsinhay chik w'enha lhamejen, wet iwom n'ohen, wet lham t'at tä iwo kotsayej olhamel oha tä lew'enho yämthilek ohäpehen hach'efwas. 16Mat olhamel ow'en t'at tä matche tä Dios isoyej lakäywet häp olhamel ojcha, wet nech'e olewuhuy t'at lhäy'e lhales. Tä mälhyejtso, woye t'at m'ak tä Dios ifwel amho.
17-18Wet Jacob lhaiwaklhat tä yäple lajcha Isaac tä ihi honhat tä Canaán. Itiche'pe lech'efwas häp lew'utey camellos, lhäy'e leles, wet ichäj nilhokej m'ak tä iyej, häp itshätäy tä häpe lakaha tä tachumlhi tä ihi Padán-aram, wet yikhen. 19Wet Labán pajche yik tä ihoye lhip tä leläy ihi yämthilek yisetchehen tson'atas lew'ole. Wet tä Raquel hiw'en tä newa katsi lajcha, t'etane lecheyälis tä yen lhamel laka dios lhayisa.
20Mälhyej p'antetso tä Jacob iwo t'akanyajayej häp Labán wet ifwenhihot'a tä yikch'oye. 21Tä yik, ichäj nilhokej lakäywet tä iyej. Wet tä nichäte p'ante tewokitaj tä Éufrates, yistho wet tumej lhip elh, wet tujlhache len'äyij pajtha nichäte chenhas tä Galaad.
Labán ihän Jacob
22Tä tajyäme p'ante tres ifwalas, wet Labán ihanch'oye tä Jacob yik. 23Tä mälhyejtso, t'äne iyhäj tä lew'etfwas wet lhamel ihän Jacob. Wet tä siete ifwalas nech'e ifwit tä ihi chenhas tä Galaad. 24Matkat honatsitso Labán lefwilhek ihihlä Dios tä lhain'ältej wet yok:
–Ch'ahuye olhämet. Yej woyejela ämet chik ni'isa häp Jacob.
25Jacob iwo ayej kasthaweta tä nichäte chenhas tä Galaad. Wet tä Labán ifwit, lhäy'e iyhäj tä yikche, lhamel häte iwo lakasthawetahi honhattso. 26Wet Labán ihoye Jacob wet tahuyej tä yok:
–¿Atsi m'ak tä lewoyej n'oye? ¿Chipte tä leti n'oyej akanyaj wet äp lechäj oles tsinhay, hätet iwoyek n'okwenkay tä õ'tälhte n'oka'tshayaj, 27wet lefwenhit'a n'oho tä lenekhen? Chik lefwenhin'aj n'oho, owohin'aj okäjyaja tä owo tsilheka amejen. Ihichen'aj iyhäj tä tachuma músicas, arpas lhäy'e n'opumis. 28Nits'ilakhiyet oles tsinhay chik lewahin n'oyej chik ots'uhen lech'alos, lhäy'e ochetsos. ¡Alhen häpeya hin'o tä ni'isa tä lewoynejetso m'ak tä lewoye! 29Ohanej owoyneje chik owo m'aka amejen nilhokej amel. Mat honatsimattso tahuy n'oyej ajcha laka Dios wet yok, “Ch'ahuye olhämet. Yej woyejela ämet chik ni'isa häp Jacob.”
30“Wet olham ohanej tä wuj tä letichune ajcha lew'et wet häp tä tamenej tä lhek, ¿mat chipte tä let'etane oka dios lhayis?”
31Jacob nichulho Labán wet yok:
–M'ak tä tamenej tä n'am fwel amho tä onek, häp tä onowayhläk leso n'oyej ales tsinhay. 32Mat häp aka dios lhayis tä lhäme, chik iche elh olhamel tä oikana tä iskat lhamel, is chik õ'län. Tä lhehi tä lhaw'etfwas tatache, mäh ukwe m'ak tä alewuk, wet chik lelhoke chäj.
Jacob ihanhiyejt'a tä lech'efwa Raquel tä t'etane lajcha laka dios lhayis wet ichäj tä yik.
33Tä mälhyejtso, Labán tiyäjchufwi Jacob lewukwe tä tsänt'äj, tä ileyej tiyäjchufwi Lea lewukwe lhäy'e lakawos tsinhay lewukwe, mat nilhokhiyet'a laka dios lhayis. Tä inuphä, nech'e tiyäjchufwi Raquel lewukwe. 34Mat Raquel iskat lajcha laka dios lhayis, y'uytho lehowet tä itipejpe camello wet nech'e lham tatayphä'pe. Wet Labán ifwiläjiche m'ayhay tä t'ukwe laka dios lhayis, mat hiw'enhit'a. 35Wet nech'e Raquel yok:
–Ijcha, yej afwitsaj tä n'am nephä tä ottayphä, häp tä w'oyis tä in'oyej.
Tä mälhyejtso, Labán tek nilhoke laka dios lhayis tä fwetaj t'ukwe. 36Wet Jacob wuj tä tawäkwäylhi, wet tahuyej Labán wet yok:
–¿Atsi m'ak tä ni'isa tä owoye? ¿Atsi och'isukyaj tä häpe tä tamenej tä alekhajyen tä lehänn'o? 37¿Hä pajchen'e letetshan nilhokej oka m'ayhay? ¿Hä iche m'ak tä tälhe haw'et tä iyej oka m'ayhay tä lelhoke? Chik lelhoken'e, ¡tihi tä tatache häp wichi tä nek amche lhäy'e wichi tä in'oyej, wet kalelhäjila elh tä matche lhämet, am wok olham! 38Tichunche, veinte nekchämis tä otchumlhi amho wet nehichet elh aläy chik leles y'inhiche, tson'atas lhäy'e kayla lhayis, wet ihichet'a ifwalak otufw elh aläy tä asnak. 39Wet otilhäjit'a ame tson'ataj wok kayla tä t'owalhaj länek, mat olham t'at tä owo lahaya. Tä ifwala wok tä honatsi, chik etantses t'etane elh itshätäy, am let'alh n'oye'pe yämthilek owo lahaya. 40Tä ifwala nahayoj ilänn'o, tä honatsi fwiy'et ilänn'o wet omähit'a. 41Veinte nekchämis tä oi'amej, wet catorce nekchämis tä otchumlhi'pe ales tsinhay, wet äp seis nekchämis tä otchumlhi yämthilek okalhi aläy tä okaha. Mat tek lew'awlhatchä akaha tä letisn'o. 42Mat oisej tä in'oyej Abraham laka Dios tä ojcha Isaac n'okwiyej. Chik nimälhyayejtso, niwohit m'ak chik lew'en n'oho tä lechenn'o. Mat Dios hiw'en ofwitajayaj, lhäy'e ochumyaj tä owoye, häp tä n'äyejmat amho m'ak tä let'uhläk lewoyej n'oye.
Jacob lhäy'e Labán iwoyej lhamehen lhämet tä hit'unhatche
43Labán nichulho Jacob wet yok:
–Atsinhay, oles tsinhay t'at, wet leles ochetsos t'at, wet tson'atas oläy t'at. Nilhokej m'ak tä atey hiw'en olewuk t'at. Mat ohanhiyejt'a m'ak chik owoyeje lhamel. 44Tä mälhyejtso huwa, n'awoyej n'amehen lhalhämet tä y'at'unhatche n'amejen, am lhäy'e olham, häpkhilek y'enpej lhatichunhayaja.
45Wet Jacob tachuma tunte wet ikasthayen. 46Wet tahuyej wichi tä iyej wet yok:
–Is chik amel leskonwek iyhäj tuntey.
Wet lhamel iwoye, iskonwek tuntey, wet tä paj wet t'ekhen tä iwhäye. 47Wet Labán iwo lheya honhattso tä lham Arameo lhämet yok, Jegar Sahaduta. Wet Jacob iwo lheya tä lham lhämet yok, Galaad. N'olhämtesna yok, M'ak tä oskonwek yämlek oyen tichunhayaja.
48Wet nech'e Labán tahuyej Jacob wet yok:
–Ifwalana tuntey tä n'oskonekna häp tä itichunyen n'amchehen lhalhämet tä y'awoyej n'amehen.
Häp tä tamenej tä õyen lheya Galaad häp honhattso. 49Häte õyen lhey elha Mispa tä yiwitej n'olhämet tä yok, N'oyahnhayajw'et. Tsi Labán yok:
–Is chik Dios t'at tä iyahin n'ohen chik nemla olhaiw'enhen. 50Chik ka'amajayej oles tsinhay, wok lhenla hach'efwasa atsinhay iyhäj, tejlak newache elh chik iyahin n'amel, mat Diosla t'at chik n'aiw'en.
51Wet Labán äp yok:
–Lhek yahinya tunteyna tä õ'skonwek, lhäy'e tunte tä am lekasthayen. 52Lhamelna häp tä itichunyenla n'amchehen tä ihichet'ala ifwalak y'awoyej n'amehen m'ak chik ni'isa wet tamenhiyejak y'anu w'echehi täja. 53Is chik achäti Abraham laka Dios lhäy'e olham ochäti Nacor laka dios, häp tä n'aikalelhthen.
Tä mälhyejtso, Jacob hit'unhatche lhämet tä iwoyeje Labán, wet iwo lheya Dios tä lajcha Isaac n'okwiyej. 54Wet nech'e Jacob ilänhen itshätäy tä yen n'okhayajayej Dios tä lhamel i'pe chenaj, wet t'äne wichi tä iyej yämthilek t'ekhen. Wet honatsitso lhamel i'pe chenaj.
55Tä nech'e fwamlafwaj Labán nephä wet hits'uhen lechetsos ch'alos, lhäy'e leles tsinhay. Tä ileyej, wet takäpfwaye. Wet nech'e iwo tsilhekayej wet yäple laka honhat.
