Gén 33

₁Tä Jacob hiw'enlä Esaú tä näm, lhäy'e cuatrocientos hin'ol tä nekche, lham hiw'enhathen leles, hiw'enhatej iyhäj Lea, wet hiw'enhatej iyhäj Raquel, wet hiw'enhatej iyhäj lakawos tsinhay. ₂Wet m'ak tä iwoye, itumtejlä wichi tä nämhen häp lakawos tsinhay lhäy'e leles, wet nech'e Lea lhäy'e leles iw'echehi, wet Raquel lhäy'e lhäs José iw'echehi Lea. ₃Wet nech'e Jacob ichunlä lhamel, wet tä yik t'upeypej katsi, nephäpej, wet äp yikpej. Mälhyej'attso tä iwoye yäk siete veces tä iwoynejepejtso, pajtha tott'aye t'at lechila Esaú. ₄Wet tä lechila hiw'enlä, inu alhoho tä ihohlä lech'inij. Tä nichäte, tatsufwelej wet hits'u lech'alo, wet nech'e lhamel tafwchehchä. ₅Wet Esaú iyahin atsinhay lhäy'e Jacob leles wet yok:

–¿Atsi tä häpe tähestsi?

Jacob nichulho wet yok:

–Lhamel häpehen oles tä Dios hiw'en n'oho tä akawon'o.

₆Wet nech'e Jacob lakawos tsinhay lhäy'e leles lhamel ihoye Esaú wet t'upeyhchä pajtha letachol taji honhat. ₇Wet nech'e äp Lea lhäy'e leles lhamel ihoye wet n'okwiyej. Tä lepes Raquel lhäy'e lhäs José lhamtej n'okwiyej. Nilhokej lhamel t'upeyhchä pajtha letachol taji honhat. ₈Wet Esaú tay'ätshane Jacob wet yok:

–¿Atsi m'ak tä lewoyeje itshätäy tä onchutejen tä õyokwes?

Jacob nichulho wet yok:

–Häp tä ot'uhläk okäjyenejlhi owuk tä onäme.

₉Esaú yok:

–Ipuhfwa, kha, naya t'at m'ak tä in'oyej. Amajej t'at m'ak tä alewuk.

₁₀Mat Jacob yok:

–Kha. Woye tä owoye, chik matche tä akäjlhi n'oyej tä onäm ame, chum'atlä m'ak tä oyen awayhata. Tsi tä ow'en ate'pe, hätet iwoye Dios te'pe tä ow'en, tsi letachum n'ohlä tä onäm. ₁₁Olhaip'altsen ame, chumlä awayhat tä ohän amena. Tsi Dios yenn'o häpeya hin'o tä wuj lakäywet wet niwohit m'ak chik tatäy n'oyej.

Wet tä Jacob inityenej lechila Esaú, tä lepese tachum'atlä m'ak tä lech'inij hiw'enho.

₁₂Wet Esaú äp yok:

–Mäh n'ekhen, olham ochun ahilä.

₁₃Mat Jacob nichulho lechila wet yok:

–Ipuhfwa tä ohumnek, lehanej t'at tä oles tek takhajayhen, wet äp wuj tä oyen lhakliya tson'atas lhäy'e w'asetas lhäy'e leles. Chik n'am p'altsen wet oyikchufwi ifwala imälhewek, y'inhiyejena t'elak. ₁₄Is t'at chik lechun n'ohlä. Olham oyik t'at mat oläfwenhit'a tä oyik. Ochunkattshi itshätäy wet oyikche oles, wet oaifwitla chik lhehi Seír.

₁₅Esaú yok:

–Is t'at. Mat is chik on'äy amej iyhäj hin'ol tä nek n'okwe.

Mat Jacob nichulho lechila wet yok:

–Kha, yej lhen alhakliyan'o.

₁₆Wet ifwalatso Esaú yäple lew'et Seír, ₁₇mat Jacob tatshupiye lhip tä lhey Sukot. Tä nichäte, yenlhi lewukwe tä ihi wet äp yenlhi leläy huplawtes. Wet häp tä tamenej tä õyen lheya honhattso Sukot tä yok, Huplawtes.

₁₈Tä Jacob tapile p'ante Canaán tä tälhe Padán-aram, newache lewit'äyhyaj chik häpe. Wet iwo p'ante lew'etahi honhat lhip tä tatayhlä hupuy tä Sikem. ₁₉Tä paj p'ante, ichäj honhat lhiptso tä lewuk Hamor leles tä häpehen hin'o tä lhey Sikem lepuhfwas. Wet laha tä itihi cien monedas. ₂₀Wet yenlhi laka altar, wet yen lheya “Dios häpe Israel lhayis laka Dios.”