Gén 34

₁Häp Dina, Jacob lhäse tä ihihlä Lea, yik tä isikaye atsinha lhutshay tä ihi hupuy. ₂Wet hin'o mamse tä lhey Sikem, tä lajcha Hamor häpe Hiv lhayis kaniyat, lham itsoklhi Dina wet imäyej wet iwoyeje m'ak tä ni'isa. ₃Mat tä wuj tä ihumin lhutsha, häte t'uhläk atsinha itiyej lehumnhayaj. ₄Wet häp tä Sikem tahuyej lajcha wet yok:

–Hoye lhutsha, is chik iwoye t'at tä ot'uhläk oyen ch'efwaya.

₅Jacob ihanch'oye tä Sikem iwoyeje m'ak tä ni'isa lhäse. Mat tä newache katsi leles, iyej t'at leläy w'asetas tä hit'ekyenwethä, häp tä tamenej tä newache lhämet, inihich'oye chik nämhen lhamel.

₆Wet Sikem lajcha Hamor ihoye Jacob yämthilek yämhoplhi. ₇Wet nech'e nämhen Jacob leles, wet tä lhamel iläte m'ak wit'äyna, lhäy'e lhip tä lhamel lewäk ihi. Tsi tä Sikem itsoklhi Jacob lhäse wet imäyej, häpe n'oläkwyhanyaj tä lhäy'e lhip tä ni'isa tä õ'tiyej Dios laka wichi Israel lhayis wet lakeyhit'a tä õ'woynejetso. ₈Mat Hamor tahuyej lhamel wet yok:

–Olhäs Sikem wuj tä ihumin amel hach'inhä. Woye tä owoye, is chik lewahnej t'at häpkhilek iyej. ₉Wet ahäpkhihena wichi tä olhamel oiyhäj t'at, wet olhamel oihiyejawethä aka'tsinhay, wet amel lhehiyejawethä olhamel oka'tsinhay. ₁₀Yej lhekch'oye olhamel. Wet nehit katsik n'äyhiyeja amhohen m'ak at chik häpek let'uhläk lhenlhi tä lhehi oka honhat, yämthilek lelun'atpe wet lechäj aka honhates wet lhen haw'etesa.

₁₁Wet Sikem häte tahuyej Dina lajcha lhäy'e lechilalis wet yok:

–Olhaip'altsen amehen, is chik lewoyaye t'at. Ow'enla amhohen m'ak at chik häpe chik let'alhej n'oye. ₁₂Onowayhiyet'ak häpe m'ak chik wuj, wok inu'pe laha tä t'uhawetej, wet oyämla wuj m'ak chik oyen awayhtesa. Mat ch'anlhaye lhutsha yämthilek oiyej.

₁₃Matkat Jacob leles yen lätyaja tä Sikem itiyej leläkwyhanyaj lhamel lech'inhä Dina. Wet lhamel iwoyeje lhämet tä t'akanyaj t'at häp Sikem lhäy'e lajcha wet yok:

₁₄–Olhamel okalhihit'ak ow'enho och'inhä hin'o tä n'olhijtsek newayej t'isan. Tsi häpe m'ak tä lhäy'e lhip tä ni'isa alhoho chik owoye täjtso. ₁₅Tajlhamat chik lewoye m'ak tä one'tek lewoye, wet häpkhilek olhamel owohiyela m'ak tä let'alhej n'oyehen. Is chik amel ahätet iwoye olhamel, wok oyok, is chik nilhokej hin'ol tä ihi hupuy iti lhamejen n'otetnek tä õyiset lho t'äj lhip. ₁₆Wet chik amel lewoyaye täjtso, häpkhilek lhewejwethä olhamel oka'tsinhay wet olhamel oihiyejawethä amel aka'tsinhay. Wet oihlat amejen wet häpkhilek n'ahäpe wichi tä weihalhahchä. ₁₇Mat chik amel kawoyaye täjtso, olhamel oyikhihena wet ochäjla och'inhä.

₁₈Tä Hamor lhäy'e lhäs Sikem iläte Jacob leles lhämtesna, ihuminche t'at. ₁₉Wet mamse Sikem yofwajkwet iwoyej lhame n'olhijtsek, tsi matche tä ihumin Jacob lhäse. Wet tä wichi tä häpehen Hamor iyhäj wuj tä yen hin'oya häp Sikem, ₂₀lham lhäy'e lajcha lhamel ihoye hupuy lepe, häp lhip tä wichi lhaihuthiwek yämthilek itetshan m'ayhay. Wet tahuyej wichi wet yok:

₂₁–Häp Jacob lhäy'e leles n'amel lhakalay'is t'at. Is chik in'amejen wet nehit katsik n'äyejo chik ilunpe lhaka honhat. Tsi lew'et iche t'at lhamel. Wet n'amel y'enla lhach'efwasa laka'tsinhay wet lhamel yenla lech'efwasa lhaka'tsinhay. ₂₂Mat oyok, chik y'at'uhläk n'ahäpe wichi chik weihalhahchä yämthilek lhamel in'amejen, is chik nilhokej hin'ol iti lhamejen n'otetnek tä õyiset lho t'äj lhip, mälhyej lhamel lakey. ₂₃Wet nilhokej m'ak tä lewuk lhamel, lhäy'e leläy, n'alewuhuy t'at. Mat is chik y'äm kalelhäj tä y'awoye t'at, wet lhamel ihlat n'amejen.

₂₄Tä wichi iläte Hamor lhäy'e lhäs Sikem lhämet, lhamel ihuminche wet yok:

–Is t'at.

Wet nilhokej hin'ol iwoyej lhamehen n'olhijtsek.

₂₅Tä tajyäme p'ante tres ifwalas tä hin'oltso kamaj lhailäthen tä õyisthen t'äj lhipey, Simeón lhäy'e Leví, häp Jacob leles tä lhamel lech'inhä Dina, lhamel yikhen tä ihoye hupuy wet ichäj lefwajnhates. Tä nichäte, newache hin'ok tatayhlä lhamel tsi kamaj äytes lhipey tä õyisthen. Wet Jacob lelestso ilänhen nilhokej hin'ol tä ihi hupuy. ₂₆Häte ilän Hamor lhäy'e lhäs Sikem, wet ichäj lech'inhä Dina tä ihi Sikem lew'et wet yikhen. ₂₇Wet nech'e nämhen iyhäj Jacob leles, wet itonphä nilhokej m'ak tä ihi hupuy tä yen lahaya n'oläkwyhanyaj tä õ'tiyej lech'inhä. ₂₈Ichäj tson'atas, kayla lhayis, w'asetas, asnolis, lhäy'e m'ak at chik häpe tä ihi hupuy lhäy'e tä i'alhoye. ₂₉Lhamel tachuma m'ayhay tä ichechufwi wichi lew'etes, wet ichäj atsinhay lhäy'e nä'tshas wet yen kwenkaya.

₃₀Wet Jacob tahuyej Simeón lhäy'e Leví wet yok:

–Matche tä amel lewo otesahlä wichi. Athana wichi tä ihi honhatna, Canaán lhayis lhäy'e Ferez lhayis, n'äyihila n'oho. Lhaihutlawek wet inuhla n'oye, wet tä nintäkwa hin'ol tä in'oyej, ilänlan'o lhäy'e nilhokej ow'et lheley.

₃₁Mat lhamel nichulho lajcha Jacob wet yok:

–¿Hä is t'at tä õ'tech'aynej atsinha tä kain'oyaj länek olhamel och'inhä?