Gén 37

₁Jacob yen lew'eta Canaán, häp honhat tä lajcha yen p'ante lew'eta. ₂Wet häp täja m'ak tä Jacob leles iwoye.

Tä José nech'e mamse p'ante tä hiw'en diecisiete nekchämis, lham t'uye t'at lajcha Jacob leläy, lhäy'e lechilalis tä lako Bilja lhäy'e Zilpa leles, häp atsinhay iyhäj tä Jacob yen ch'efwasa. Wet José ifwenhopej lajcha häp m'ak tä ni'isa tä lechilalis iwoye.

₃Jacob, wok oyok, Israel, lham wuj tä ihumin lhäs José, inu'pe lehumnhayaj tä itiyej leles iyhäj, tsi José nichätchä tä lham häpe hin'o tä hich'ut t'at. Wet häp tä yenhoplhi lew'uy tä wuj tä isilataj. ₄Matkat tä lechilalis hiw'en tä lajcha lhäy'e lhip tä ihumin, inu'pe lhamel, nech'e lhamel n'äyiho wet isit'a lhämtes tä iwoyeje.

₅Wet José lefwilhek iche wet ifwenho lechilalis. Mat tä lhamel iläte, nech'e nem koyhyaj tä n'äyiho lech'inij. ₆Tsi ifwenho lhamel tä yok:

–Ch'ahuyay n'oye, ofwel amhohen ofwilhek. ₇Otfwilhan tä n'amel y'ehi yachuyajw'et wet y'äythomche trigo. Wet oseltejpa tä trigo tä olham oyäytho nephä wet takasit. Wet nech'e iyhäj tä amel lhäythomche lhamel lhailunkatej wet t'upechehchä wet n'okwiyej.

₈Lechilalis nichulho wet yok:

–¿Hä lefwetaj ahäpkhila olhamel oka niyat wet ohäpkhihena akawos?

Wet nem koyhyaj tä lhamel n'äyiho'pe lefwilhey lhäy'e lhämtes.

₉Tä paj yachajo tä lefwilhek ihi, wet ifwenho lechilalis wet yok:

–Honatsimattso ofwilhek iche. Otfwilhanej ifwala lhäy'e iwel'a lhäy'e once katetsel tä nilhokej lhamel t'upechehchä wet n'okwi n'oyejpa.

₁₀Tä José ifwenho lefwilhektso lajcha lhäy'e lechilalis, wet lajcha ifwoneje wet yok:

–¿Atsi m'ak tä häpe afwilhektso? ¿Hä olham lhäy'e ako lhäy'e achilalis olhamel ot'upechehlahchä wet on'okwihla amej p'iya?

₁₁Wet lechilalis itiyej t'ischenyaj häp José. Mat lajcha wuj tä yen tichunhayaja m'ayhay tä José yäme.

₁₂Fwala elh p'ante José lechilalis ihoye Sikem tä lhamel ihänch'oye hup häp lajcha läy. ₁₃Wet Jacob, wok oyok, Israel, tahuyej lhäs José wet yok:

–Lehanej tä achilalis ihi Sikem, lhamel hit'ekyenwethä oläy. Mäh, is chik lehoye lhamel.

José nichulho lajcha wet yok:

–Is t'at, ohohiyela.

₁₄Israel yok:

–Chik lechäte, tetshana chik isen t'at lhamel wet newache lewit'äyhyaj oläy, häpkhilek lefwel n'oho chik lenäm.

Tä mälhyejtso, Israel ichen lhäs José tä tälhe honhat tä w'awulhchä tä hupuy tä lhey Hebrón ihi. Wet tä José nichäte p'ante Sikem, ₁₅weta. Mat iche hin'o tä hiw'en, wet tay'ätshane tä yok:

–¿Atsi tä let'ukwe?

José nichulho wet yok:

₁₆–Ot'ukwe ochilalis. ¿Hä lekalhik lefwel n'oho lhip tä lhamel ihi tä t'uye leläy?

₁₇Hin'otso yok:

–Pajche yikhen. Olätenaj tä lhamel yok, “N'ahoye Dotán.”

Tä José iläte, wet yik tä ihoye Dotán tä t'ukwe lechilalis. ₁₈Tä lhamel hiw'enlä tä tott'aye, lhamel yok:

₁₉–¡Lhek yahin, näm hin'o tä afwilhnhatsaj! ₂₀¡Mäh n'alän wet n'athatchela chowej lep'itsek wet n'olak, “T'owalhaj tä tufw”! ¡N'ayahinak isej lefwilhey!

₂₁Mat tä Rubén iläte lech'inhis, lham t'uhläk ifwayhat José wet yok:

–Kha, isit'ak y'alän. ₂₂Yej wo m'akayej, mat n'athatche chowej tä ihi ts'anisna.

Rubén iwoynejetso lhämet, häp tä t'uhläk ifwayhat lech'inij José wet yachaje lajcha. _23-24Wet tä José nichäte p'ante lechilalis, lhamel itsoklhi wet isoyej lew'uy tä isilataj tä lajcha lhenek. Wet lhamel ithatche José chowej tä laj inätahi, ₂₅tä ileyej wet t'ekhen.

Tä paj tä lhamel t'ekhen t'at, nech'e hiw'enlä wichi tä Ismael lhayis tä nämhen tä tälhe Galaad tä lhamel ilhuhyenejen camellos häp m'ayhay tä lenij akäjche tä ihäne Egipto. ₂₆Wet Judá tahuyej lepuhfwas wet yok:

–Niwohit m'ak chik y'akalhik y'alän lhach'inij wet y'askat lep'itsek wet y'opejkwe, “Olhamenhit'a tä olän.” ₂₇M'ak tä is chik y'awoyeje, n'awom, n'aw'enho Ismael lhayis tä nämhen, wet lhamel hiw'enla n'amhohen chinaj t'äj. Isit'ak y'alän tsi lhapuhfwa t'at.

Tä iyhäj iläte Judá lhämet, wet yok:

–Is t'at atichunhayaj. Häp täjtso m'ak tä is chik y'awoyeje.

₂₈Wet Ismael lhayis, tä lhey elh Madián lhayis, tä lhamel inukwe lhip tä José lechilalis ihi, wet lechilalis itonphä lech'inij José tä ihi chowej wet iwom, hiw'enho Ismael lhayis, wet õhw'enho lhamel laha tä veinte chinaj t'äj. Wet Ismael lhayis ihäne José Egipto.

₂₉Wet tä paj Rubén fwetaj yäple chowej tä t'uhläk itonphä lech'inij José. Mat tä nichäte, hiw'enhit'a. Wet hich'esajche lham lew'uy tä yen tetnekayej tä lhäy'e lhip lelhakli lhäy'e lewäk. ₃₀Wet yäple lech'inhis wet yok:

–¡Lhach'inij José nemhit ihi chowejmat y'athatche! Athana ¿atsi m'ak tä owoye?

₃₁Tä mälhyejtso, lhamel ilän kayla wet y'ilenej lew'oyis häp José lew'uy, ₃₂wet yikhen tä ichäje lajcha. Tä nichäte, wet ifwenho tä yok:

–Olhamel onlhoke mathi täja. Tetshan chik häpe äs w'uy wok kahäpeya.

₃₃Jacob iyahinlhi wet yok:

–¡Häpe t'at olhäs José tä lew'uy! ¡Tshäwet tä fwitsaj tä tufw olhäsaj José!

₃₄Wet Jacob hich'esajche lham lew'uy tä yen tetnekayej lelhakli tä äytaj. Wet taw'uyhi lew'uy tä yelaj, wet pitaj lewhäy tä yen lhafwyhayaja lhäs. ₃₅Wet nilhokej leles lhäy'e leles tsinhay t'uhläk tach'ote yämthilek niwujak lefwitajayaj ihi, mat iwohiyet'a. Yok:

–Olehiyejt'a tä oyen lhafwyhayaja olhäs, pajla'tha oy'il wet op'akej t'at tä oihi honhat tä n'op'itseyhay lew'et.

₃₆Wet tä Madián lhayis nichäte Egipto, lhamel iwom José. Elh tä ichäj lhey Potifar, häpe Egipto kaniyat lech'otfwa wet sip'äl tä t'uye niyat lhamel laka niyat.