Gén 44

₁Tä tajyäme täjtso, wet José ifwenho lakawo tä t'uye lew'et wet yok:

–Äm tapokwe n'olhäk häp hin'oltso lakhäyhis, wet thatche'pe lhamel laka chinaj t'äj. ₂Wet elh tä nithaläkwa, thatho lakhäyhi häp olhäthi tä plata lhäy'e laka chinaj t'äj.

Wet José lakawo iwoye, iwaklhat lhamel lelhuy. ₃Wet tä ifwala inuphä José ne'tek lepuhfwas yikhen. ₄Wet tä pajfwaj tä kamaj ni'tosache, José tahuyej lakawo wet yok:

–Mäh hän häp hin'ol tä yikhen mathi, wet chik lefwit olak, “¿Chipte tä lhen lahaya m'ak tä ni'isa häp m'ak tä is, tä let'etanaye n'olhäthi tä plata ₅tä owuk lhäthi tä yen lechaya tä t'uhläk ihanej m'ak chik häpe? ¡Wuj tä ni'isa m'ak tä lewoyaye!”

₆Tä mälhyejtso, lakawo yik tä ihän lhamel. Tä ifwit, itenche t'at José lhämtes tä ne'tek iwoye. ₇Wet tä lhamel iläte, nichulho wet yok:

–¿Chipte tä lewoynejetso ämet tä letahuy n'oyejen? Olhamel okeyhit'a m'ak tä lhämetso. ₈Lhek yahin, olhamel otälhe Canaán wet onekhen yämthilek onachaj chinaj t'äj tä olhamel ow'en tä ihiche okhäyhis. ¿Chiwoyek mälhyejtso wet nech'e ot'etane plata wok oro tä ihi awuk lew'et? ₉¡Elh chik häpek olhamel chik lelhoke awuk lhäthi chik ihi lakhäyhi, is chik õ'län! ¡Wet häte nilhokej olhamel ohäpkhihena akawos!

₁₀José lakawo nichulho lhamel wet yok:

–Is t'at. Mat ts'ilakhilat elh chik owuk lhäthi ihi lakhäyhi häpkhilek häpe okawo. Mat iyhäj tek letes ihichela.

₁₁Wet nilhokej ikelit tä itichehchä lelhuy wet ifwoyenche'pe. ₁₂Wet José lakawo iyahnhomche, ichunkat elh tä thaläkw pajtha nichäte elh tä nithaläkwa, häp Benjamín lakhäyhi, wet häp tä hiw'en n'olhäthi tä ihi. ₁₃Tä lechilalis hiw'en, hich'esaj lhamel lew'uyis tä yen tetnekayej tä matche tä äytaj lelhakli. Wet yachajpe lelhuyis häp asnolis wet yäple hupuy.

₁₄Tä Judá lhäy'e lepuhfwas nichäte José lew'et, lhamel hiw'en tä kamaj ihi t'at. Wet lhamel ihi tä tatache wet t'upechehchä pajtha letachol taji honhat. ₁₅Wet José tahuyej lhamel wet yok:

–¿Chipte tä lewoynejetso m'ak tä lewoyaye? ¿Hä lehanhiyejt'a tä hin'o tä mälhyej olham ihanej tä hin'älte m'ak at chik häpe?

₁₆Judá nichulho wet yok:

–Newache olhamel olhämet. Ohanhiyejt'a owoyneje olhämet chik oyok, “Otes ihichet'a”, tsi Dios hiw'en t'at olhamel och'isukyaj. Chuma olhamel, ohäpehen t'at akawos. Tan'iset n'oyejen elh tä äthi ihi lakhäyhi.

₁₇Mat José yok:

–Tek mälhyejtso. Ts'ilak elh tä olhäthi ihi lakhäyhi, häp tä otsoklhi wet häpe okawo. Mat amel is chik lhekhen wet lhäple ajcha wet atamsekis ihi.

₁₈Wet Judá ihowhäye José wet yok:

–Olhaip'altsen ame, iwuk, ch'anlha n'oye tä akawon'o chik oyämlhi amho. Yej afwitsaj n'oye, tsi am ahätet iwoye Egipto kaniyat tä lhamya. ₁₉Am letay'ätshannaj n'oyehen tä lhok, “¿Hä kamaj iche amel ajcha?” Wet äp lhok, “¿Hä iche elh amel hach'inij?” ₂₀Wet olhamel onchulhnaj amho tä oyok, “Iche t'at ojcha, häpe hin'o tä hich'ut t'at. Häte iche och'inij elh tä nithaläkwa tä ojcha ch'utwo t'at. Wet ojcha wuj tä ihumin häp lhäs, tsi lechila tä lako lhäs pajche y'il, wet tajlhama lham tä imälhehi.”

₂₁“Wet tä lene'tenaj chik ochäj kana tä let'uhläk lew'en, ₂₂wet ofwelnaj amho tä mamse ikalhihit'ak yikch'oye lajcha. Chik yikch'oye, wet lajcha y'inhila. ₂₃Mat am lhonajkwe, Chik nineka amchehen, yej tapil alhoho.

₂₄“Wet häp tä onchäte naji olhamel ojcha, ofwenho t'at ämet tä lefwel n'ohohen. ₂₅Wet tä lham t'uhläk olhamel otpil kana yämthilek ochäj lhip olhäk, ₂₆wet ofwenho tä oyok, Oyikhihent'a, matlak och'inij yikche olhamel, häpkhilek oyikhen. Tsi niyat tek iwatläk hiw'en olhamel chik och'inij nekache olhamel.

₂₇“Wet olhamel ojcha yok, Amel lehanej tä täkwfwas oles tä ihihlä och'efwa. ₂₈Wet elh yik och'oye, tälhe ifwalatso ohanhiyejt'a chik ow'en. Oyenek itshäwet tä fwitsaj häp p'ante tä iwo lhipeya. ₂₉Wet chik äp lechäjay elh tä in'oyej, wet chik lewit'äyhyaj ihi, amenlak letamenay n'oyej chik oy'uyejot honhat olhaklis tä och'ut.

₃₀“Tä mälhyejtso, n'äl tä ojcha matche tä yen at lehuseka häp lhäs. Wet chik mamse imälhehchä kana tä oyäpil, ₃₁kalelhäj tä y'inhila ojcha chik niw'ena lhäs. Wet chik mälhyejtso, olhamel t'at tä otmenhiyeja olhamel oka thaläkw chik lefwitajayaj ilän. ₃₂Wet ofwenho naji tä oyok, Olham t'at tä ot'uye mamse. Wet äp oyonaj, Chik n'am nachaj ame äs, lajit lepesa tä otes ihihla ahilä.

₃₃“Häp tä tamenej tä ot'uhläk olham t'at tä olhayen lahaya mamse, wet tsoklhin'o. Ch'anlhaye, is chik yikche lechilalis. ₃₄Tsi tek ot'uhläk tajlhama olham chik oyäple ojcha, chik mamse imälhehchä. Okalhihit'a, häpkhilek n'am w'enej chik wuj tä lelhakli ihi ojcha.”