Gén 47

_1-2José ichäj lhamche cinco lechilalis wet ihäne Egipto kaniyat yämthilek nitäfwelej lhamel. Tä nichäte, wet yok:

–Ojcha lhäy'e leles nämhen tä tälhe Canaán. Ichäj leläy tson'atas, kayla lhayis lhäy'e w'asetas, lhäy'e nilhokej lakäywet tä iyej, wet ihi t'at honhat tä Gosén.

₃Wet niyat tay'ätshane lhamel wet yok:

–¿Atsi m'ak tä amel achumet?

Lhamel nichulho wet yok:

–Ika niyat, olhamel tä akawos ohäpehen tson'ataswos t'at, mälhyet iwoye olhamel ochätilis p'ante. ₄Mat ifwalasna wuj nehlä tä ihi oka honhat Canaán. Honhat tamchäy wet ihichet'a hup chik oläy lhäk. Wet häp tä olhamel onämhen kana, ot'uhläk oihi t'at honhatna Egipto. Ika niyat, olhamel ot'uhläk lewoye tä owoye wet lewahin n'oyejen honhat tä Gosén yämthilek olhamel oyen ow'eta.

₅Niyat tahuyej José wet yok:

–Ajcha lhäy'e achilalis lhamel t'uhläk i'amej wet häp tä nämhen. ₆Wet am t'at tä lehanej tsi Egipto ihi t'at akwey. W'enho honhat tä Gosén tä lhäy'e lhip tä is wet yenla lew'eta. Wet chik iche hin'ol tä iyej lhamel tä wuj tä ihanej tä t'uye n'oläy, uhyene olham oläy.

₇Tä ifwala elh p'ante José ihäne lajcha Jacob häp niyat. Tä Jacob nichäte, n'okwiyej. ₈Wet niyat tay'ätshane wet yok:

–¿Chihätefwas nekchämis tä lew'en?

₉Jacob nichulho wet yok:

–Olunpe honhat ciento treinta nekchämis. Wujit'a, w'awulhiyejt'a nekchämis p'ante ochätilis ilunpehen honhat, wet atha on'äyij häp nekchämistso.

₁₀Wet Jacob n'okwiyej wet iwo tsilhekayej, wet yikch'oye. ₁₁Wet José itihi lajcha lhäy'e lechilalis yämthilek yen lew'eta Egipto lhip tä lhäy'e lhip tä is tä ihi Ramsés kahonhat, mälhyej tä niyat ne'tek José hiw'enho lhamel. ₁₂Häte José hiw'enhopej nilhokej lepuhfwas häp lhäk tä lhamel iwatlä.

₁₃Nilhokpe honhat tä nem iche lhäk wichi, wet ihi Canaán pajtha nichätho Egipto wuj nehläs tä ilänhen lhamel. ₁₄Wet José ihutwek chinaj t'äj tä Egipto lheley lhäy'e Canaán lheley ichäjej lhäk, wet t'amajej tä ihi niyat lewukwe. ₁₅Wet tä noj laka chinaj t'äj häp wichi tä ihi Egipto lhäy'e Canaán tä lhamel ichäjej lhäk, wet wichi tä Egipto lheley ihoye José wet yok:

–¡Noj olhamel oka chinaj t'äj! ¡Yej tach'anlhayek nehläs ilänhen olhamel! ¡W'en n'ohohen olhäk!

₁₆José nichulho wichi wet yok:

–Chik nem lew'enay chinaj t'äj, hän kana aläy wet ow'enla amhohen äk.

₁₇Tä mälhyejtso, lhamel ihäne José yel'atas, tson'atas, kayla lhayis, w'asetas, lhäy'e asnolis, wet ithatlä lhäk. Wet nekchäm weihalha tä José hiw'enho lhäk häp wichi. ₁₈Wet tä noj nekchäm, wichi yachajo tä ihoye José wet yok:

–Iwuk, olhamel tek oskat amho tä noj t'at olhamel oka chinaj t'äj, lhäy'e oläy nech'e alewuk t'at. Nemhit iche m'ak chik olhamel othatlä olhäk, tajlhamat olhamel lhäy'e oka honhates. ₁₉Olhaip'altsen ame, ¡yej tach'anlhayek oy'inhen wet tatäy okäsw'etes! ¡Is chik lechäj t'at olhamel, p'ajtit n'oyejen oka honhates wet w'en n'ohohen olhäk! Wet ohäpkhihena niyat kawos, wet otutcheyhihichela oka honhates wet lewukla t'at niyat. Mat w'en n'ohohen yachuyaj lhoy häpkhilek otutcheyhen, häpkhilek nehläs nilänahen olhamel wet äp nittäya tä is t'at honhates tä yachuyajw'etes.

₂₀Tä mälhyejtso, José ichäj nilhokej yachuyajw'etes tä ihi Egipto yämthilek lewuk t'at niyat. Tsi nehläs tä tamenej tä Egipto lheley iwom laka honhates. Tä mälhyejtso, honhates nech'e lewuk t'at niyat ₂₁wet nilhokej wichi tä ihi Egipto nech'e häpehen t'at niyat lakawos. ₂₂Tajlhama häp sacerdotes tä niwoma laka honhates tä lewuk lhamel, tsi niyat hiw'enho t'at lhäk häp lhamel.

₂₃Wet José tahuyej wichi wet yok:

–Lehanej t'at tä olham ochäj amel lhäy'e aka honhates, wet athana nech'e amel lhäy'e aka honhates lewuk t'at niyat. Athana chuma yachuyaj lhoy wet utcheyhen. ₂₄Mat woye täja: Chik wak'alh yachuyaj, achaje lhip niyat wet lhip amajej yämthilek lhachajok letutcheyhen, häpkhilek amel äk iche, lhäy'e haw'et lheley.

₂₅Wichi nichulho wet yok:

–Ahäpe hin'o tä hip'altsen olhamel tsi lefwayhat n'oyejen nehläs. Ohäpehen t'at niyat kawos.

₂₆Wet José yen häpeya ley tä ihi Egipto tä elh chik wak'alh yachuyaj tä yenlhi, iwohiyet'ak nachajaye lhip häp niyat. Wet häp leytso kamaj iche t'at. Tajlhama sacerdotes tä niwoya m'ak chik tiskanpe, tsi lhamel laka honhates lewukhit'a niyat.

₂₇Israel leles lhayen lewuhuya honhat tä lhey Gosén tä ihi Egipto, wet lhäy'epej lhip lhamel pajtha wujpey. ₂₈Wet diecisiete nekchämis tä Jacob ihi p'ante Egipto, wet nech'e hiw'en p'ante ciento cuarenta y siete (147) nekchämis. ₂₉Wet tä tatäy p'ante lhimphaj wet ileyej honhat, wet t'äne lhäs José wet ifwenho tä yok:

–Chik matche tä lehuminn'o, woye tä owoye, tichufwi olheche akwey wet unhatche ämet häpkhilek ow'en tä matche t'at, lewohiyela m'ak tä ot'alhej ame. Olhaip'altsen ame, yej tihila op'itsek häp Egipto. ₃₀Chik nichäte ifwalak oy'inhila wet ohoye ochätilis, mälachufwi op'itsek wet häna n'oye lhamel lep'itseyhayw'et.

José nichulho lajcha wet yok:

–Owohiyela.

₃₁Wet Jacob äp yok:

–¡Unhatche n'oyej ämet!

José yok:

–Ot'unhatche amej olhämettso tä owoyej ame.

Wet Israel t'upeyhchä tä i'pe lemäwet lhip tä lhetekw'et.